Kikkut tamarmik pisinnaatitaaffitik nalussanngilaat

“Inuit innarluutillit pisinnaatitaaffii pillugit isumaqatigiissut kikkunnit tamanit paasineqarlunilu atuarneqarsinnaasariaqarpoq”. Maannamut Naalagaaffiit peqatigiit isumaqatigiissutaat Nunatta 2012-mi malissallugu akuerisimasaa, kalaallisut taamaallaat isumaqagiissut tamakkiisoq atuarneqarsinnaagaluarpoq. Tamannali Inuit Innarluutillit Illersuisoqarfianiit allanngortipparput, isumaqatigiissutit atuaruminarsarlugu saqqummiunnerasigut, taamaasillunilu isumaqatigiissutit siunertaa paasiuminarnerulerlunilu atuaruminarnerulissaaq.

– Uannut pingaaruteqarluinnarpoq innuttaasut tamarmik pisinnaatitaaffitik nalunngissagaat, tamaattumik isumaqatigiissut atuaruminarsarlugu saqqummersipparput, neriulluta innuttaasut pisinnaatitaaffimminnik paasinnilluassasut, Inuit Innarluutillit Illersuisuat Christina Johnsen oqarpoq.

Isumaqatigiissut atuaruminarsagaq Sisimiuni 9-11. november 2018-mi Tiliup isumasioqatigiisitsinerani ataatsimeersuartitsineranilu saqqummiunneqassaaq, saqqummersinneqarneralu NunaFondimit taperneqarpoq.

Isumasioqatigiinnermi ataatsimeersuarnermilu Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaat sammineqassaaq, aammalu isumaqatigiissut atorlugu inuiaqatigiinni qanoq ililluta inuit innarluutillit atugaat pitsanngorsarsinnaanerigut paasiniarneqassalluni.

Isumasioqatigiinnermut innarluutillit peqatigiiffii Nunatsinneersut tamarmik Tiliuminnganniit qaaqquneqarput. Peqatigiiffiit amerlanersaat peqataajumallutik nalunaaruteqarput, peqataasussallu inuit 30-it missaaniittut peqatigiiffinnit 12-it missaaneersunit aggersuupput. Peqataajartortullu avannamit Ilulissaniit kangimut Ittoqqortoormiit tikillugit peqataajartortuupput.

Peqatigiiffiit nammineq kajumissutsimik suliaqartarneq, aaqqissuussaaneq, paasisitsiniaanerlu isumaqatigiissut qitiutillugu sammisaqassapput. Taakkulu saniatigut aamma Thorkild Olesen Dansk Handicaporganisationimi siulittaasoq isumasioqatigiinnermi peqatigiiffilerisarneq pillugu misilittakkani oqalugiutigissavai.

Ulluni marlunni isumasioqasigiisitsineq nuna tamakkerlugu ataatsimeersuarnermik naggaserneqassaaq. Ataatsimeersuarnermut Namminersorlutik oqartussat, kommuneqarfiit, pisortat ataanni susassaqarfiit, innarluutillinnut tunngassuteqartunut soqutigisallit aggersarneqarput. Ataatsimeersuarnermi Kalaallit Nunaanni inuit innarluutillit pisinnaatitaaffii pillugit isumaqatigiissutip atuutsinneqarnera killiffissiorneqassaaq.

Tassani inunnik innarluutilinnik suliaqartut 60-it sinnillit peqataasussaapput. Tassanilu peqataassapput ilaatigut, kommuunineersut, politikkerit Nunatsinni Danmarkimilu innarluutillit peqatigiiffii.

Ataatsimeersuarnermi killiffilersuinerup saniatigut aamma inuit innarluutillit pisinnaatitaaffii pillugit isumaqatigiissut tunngavigalugu qanoq suleqatigiinnerunikkut inuit innarluutillit atugaat pisinnaatitaaffiilu siunissami eqeersimaartumik pitsanngorsarneqarsinnaanersut qimerloorneqassaaq.

Peqatifiiffinnut isumasioqatigiisitsineq ulluni marlunni ingerlanneqassaaq, tassa novembarip 9-aniit qulingat tikillugu ingerlanneqalluni. Sapaatiuppallu inunnut innarluuteqartunut attuumassutilimmik suliaqartut ataatsimeersuartinneqarneranik naggaserneqassalluni.

Isumasioqatigiinnermi ataatsimeersuarnermilu peqataasut tamarmik inuit innarluutillit pisinnaatitaaffii pillugit isumaqatiigissummik atuaruinarsakkamik tunineqassapput. Allallu soqutiginnittut Tiliumut atugagaaqqamik akeqanngitsumik aaneqarsinnaavoq.

Aaqqissuussap piviusunngortinneqarsinnaaneranut NunaFondi qujaffigaarput.

Inussiarnersumik inuulluaqqusillunga
Christina Johnsen, Inuit Innarluutillit Illersuisuat
e-mail: cjo@tilioq.gl
telefon: 55 19 50

Gå tilbage
Skip to content
Skip to toolbar