Inuit innarluutillit pillugit FN-ip ullorititaa: Periarfissat assigiit – tamannali ilaannatsinnut atuuppoq

Ullorsiutit malillugit 2019-i naak qanilligaluartoq, Kalaallit Nunaanni assigiinngisitsineq suli atuuppoq. Inuit innarluutillit immikkoortillugit assigiinngisitsineq suli akuersaagaavoq. Taqqakkut milikartoorneq imaluunniit arlaatigut ajoqusernermik tunngaveqarluni pisinnaasat apparneri pillugit sulisutut soraarsitaasarneq suli akuerineqarluni atuuppoq. Issiavinnik kaassuartakkanik atuisut diskotekinut neriniartarfinnulluunniit isersinnaaneri killilersorneqarput. Issiavinnik kaassuartakkanik atuisut bussinut taxanullu atuinissaat suli ajornarsaarunneqartarpoq. Kalaallit Nunaanni inuit innarluutillit immikkoortinneqartarnertik pillugu suliffeqarfiup iluaniippat avataaniikkaluarpalluunniit suli illersugaanngillat. Kalaallit Nunaanni inuit innarluutillit immikkoortillugit assigiinngisitsisarneq kinguneqartinneqarneq ajorpoq.

FN-ip nunani assigiinngitsuni inuit innarluutillit pillugit ulloritittagaani Kalaallit Nunaanni inuit innarluutillit tamaasa Tilioq, KNIPK, NIIK, Sugisaq aamma Nuummi Gigtertut sinnerlugit pilluaqquavut. Ullumikkut ulloq nalliussineqartariaqarpoq, pingaartuummat. Sulili siunissami suliassarpassuaqarpugut, taamaattumik kaammattuutigaarput, Kalaallit Nunaanni inatsisiliortoqarnissaa inuit innarluutillit immikkoortinneqartarnerannik inerteqqutitalimmik assigiinngisitsisoqartillugu pisariitsumik akikitsumillu ataatsimiititaliornikkut maalaartarfeqalernissaq anguniarlugu.

Inuit innarluutillit assigiinngisinneqartarnerat pinaveersaarniarlugu nunani avannarlerni inatsiliortoqarnikuuvoq. Norgemi assigiinngisitsisarneq 2004-imi inerteqqutaalerpoq, 2014-imilu Finlandimi inerteqqutinngorpoq. Sverigemi 1999-imili inuit innarluutillit atugarisaat pillugit assigiinngitsunik malittarisassanik aaqqiissuteqartarpoq. Danmarkimi juuli 2018 sioqqullugu suliffeqarfinni immikkoortitsisoqannginnissaanik inerteqquteqarneq taamaallaat atuussimavoq, tassalu suliffeqarfinni immikkoortitsisoqannginnissaanik inerteqqut, julilli aallaqqaataa 2018 aallarnerfigalugu inatsit nutaaq atuutilerpoq. Danmarkimi kikkunnut tamanut atuuttumik immikkoortitsisoqartannginnissaanik maanna inatsiseqarput.

Ilisimasat killeqarnerat
Isiginnittariaatsit ilisimasaqarluarnikkut pinaveersaartinneqartarput, inuiaqatigiinnili suli annertunerusumik inuit innarluutillit inuunerannik qaammarsaasoqarnissaa pisariaqarpoq. Inuit innarluutillit amerlasuut isigineqarnerat qulartumillu tunngavissaqanngitsumik nalilersorneqartarnerat suli pisortani inuillu akornanni takussaavoq.

Massakkulli takusinnaasagut naapertorlugit inuiaqatigiinni inuit innarluutillit qitiutillugit sammineqarnerat takussaaleriartorpoq. Inuit innarluutillit pillugit massakkut oqallittoqartarpoq, suliniutillu arlallit pitsaasut aallartisarneqarput, tamannalu peqatigiiffinni kattuffinni Tilioq-miillu aamma annertuumik sulissuteqarfigineqarput. Inuit innarluutillit pillugit taakkununngalu atugassaritaasut pisinnaatitaaffiillu suli qaammarsaaffiginissai siunniuteqqavarput, tamannali kisimi naammanngilaq. Inatsisitigut toqqammaveqarluni inuiaqatigiinni inuit innarluutillit iluamik kiffartuunneqarnissaannut najoqqutaqarnissaq pisariaqartipparput.

Inuiaqatigiit ilutsinni nutaaliaasumi nukittuutut isigissagutta inuiaqatigiinnilu kikkunnut tamanut peqataatitsisagutta inatsisitigut tulluarsaanissaq pinngitsoorneqarsinnaanngilaq, kikkut tamat assigiimmik pineqarlutik immikkoortitaasutullu misigisannginnissaat pinngitsoortinniassagutsigu inatsimmik naapertuuttumik tunngaveqartariaqarpugut.

Pisut aallaavigalugit arlaannik isorisaqaraangatta sakkortuumik qisuariarsinnaasarpugut, soorlu suviaassuseq, suminngaaneersuuneq, qanoq qalipaateqarneq, upperisaq atoqatigiinnikkut inissisimaneq, ukiut, politikkikkulluunniit isummersortaatsit pillugit oqaluttoqartillugu sakkortuuliorsinnaasarpugut. Taava sooq inuit innarluutillit eqqartorneqartillugit assigiinngitsilluni pissusilersorneq akuersaassavarput?

Inussiarnersumik inuulluaqqusilluta

Christina Johnsen, Inuit Innarluutillit illersuisuat

KNIPK: Kalaallit Nunaanni Innarluutillit Pisinaanikitsullu Kattuffiat

NIIK: Nunatsinni Inuit Innarluutillit Kattuffiat

Sugisaq: Inuit tarnimikkut innarluutillit ilaqutaasalu peqatigiiffiat

Nuummi Gigtertut/Gigtforeningen I Nuuk

 

Paasissutissat:

info@tilioq.gl

Tlf.: 345090

Gå tilbage
Skip to content
Skip to toolbar