Inuit Innarluutillit illersuisoqarfianni ima pisoqarpoq

Novembarip aallaqqaataani ukiumi ataatsimi pioreersimassaagut. Ukioq ataaseq ulapaarfiunikooqisoq. Allatseqarfik ingerlallualereernikuuvoq, sulisussallu sisamat tamarmik atorfinereernikuupput. Isumaqarpugut inuttalerluarsimalluta angusaqallaqqilluta, isumassarsiarpassuaqarluta nukittuffippassuaqarlutalu.

Tamatta ulapinnikooqaagut, tamattaallutalu suliassaqarnikooqaagut.

Ukiup kaajallanneranut suliassagut agguataarnikuuvagut, ukiunullu pingasunut taama iliorpugut. Angusassatsinnullu iliuusissanik eqqarsaatersuuteqarnikuulluta. Missingersuuserinikuuvugut, naatsorsuutinut akissarsialerinernullu programmit tunngasut paasiniarsarinikuuvagut. Nittarsagarput ulapputiginikuuvarput, maanna piareerluinnangajalersoq. Amigaatigaarpulli oqallittarfiup atulivissinnaanissaa. Neriuppugullu oqallittarfimmi inuit innarluutillit ilaqutaasullu unammilligassatik misilittakkatillu pillugit avisseqatigiissinnaajumaartut.

Innuttaasunik attaveqarneq
Saaffiginnittut arlalippassuit akissutissarsissunnikkuuagut oqarasuaatikkullu tiimerpassuit atorlugit oqaloqateqarnikuuvugut. Innuttaasullu tatiginnillutik saaffiginnittarnerannut assorsuaq qujavugut. Unneqqarillutik oqaluttuartorpassuarnit paasissutissarpassuit pissarsiarisarpagut. Aliatsannarporli sianertartut sivisuumik oqaloqatigisariaqartarneri, taakkumi takutippaat oqartussani ikiorneqarneq killeqarluinnarsimasoq.

Ataatsimiinnerit attavissarsiornerlu
Ilaatigut politikkerinik, ikorfartortit ataqatigiissaarisuinik, kommuuninik, tarnip pissusaanik ilisimasalinnik, aamma ilisimasalinnik pikkorissorpassuarnik ataatsimeeqateqarnikuuvugut. Pissassarfillu ataatsimeeqatigiittalernikuuvugut suleqatigiinnermullu nukittarsarlutigu.

Augustimi soqutiginarluinnartunit tikeraaqarpugut, taakkuli pillugit uani nutaarsiassat ilaanni annerusumik atuagaqarsinnaavutit.

Oktobarip aallartilaannerani Inuit Innarluutillit Illersuisuat Nuummut angalavoq, tassanilu ataatsimeeqatigineqarput Isumaginninnermi aqutsisoqarfik. Aammali Inatsisartuni ilaasortat ilarpassui Tiliumi suliagut, pilersaarutigut, aqqusaartakkagut unammillernarsinnaasut aningaasaqarnerput (aningaasanik amigaateqarnerput) pillugit paasisaqarusuttut ataatsimeeqatigineqarput.

Taakku saniatigut aamma amerlasuut malugisimassajunnarsivaat kommuunnit innarluutilinnut sullissinnerata qiviaqqittariaqarnerat pillugu annertuumik tusagassiutitigut saqqummillattaartugut.

Paasissutissiuneq attaveqaqatigiinnerlu
Sisimiut TV-p suliffipput pillugu nangeqattaartunik allakaatitsinikuuvoq. Nangeqattaartuni inuit innarluutillit illersuisoqarfiani suut suliarisarnerigut sammineqarput, aammali inuttut innarluutilittut inuuneq qanoq aqqusaagaqarfiusinnaanersoq sammineqarluni. Aallakaatitassiat uani takusinnaavasi: https://tilioq.gl/2018/06/12/tilioq-pillugu-knr-tv-mi-nangeqattaartut/

Facebookkimi quppernitsinni suliuteerannguamik ingerlataqaqqammivugut: ”Innarluutiga kinaassusinniinngilaq” taaguutilimmik. Isumaqarpugut suliniuteerannguarput kusarnartuusoq torrallataasorlu. Takutinniarsaraarpummi tamatta assigiinngitsuugatta – innarluuteqarutta innarluuteqanngikkuttaluunniit, inuimmi innarluutillit aamma allatulli tunniussassaqaqaat.

Isumasioqatigiinnermi ataatsimeersuarnermilu inuit innarluutillit pisinnaatitaaffii pillugit isumaqatigiissut eqqartorneqassaaq
Ukiarmi isumasioqatigiisitsinissarput ataatsimeersuartitsinissarpullu ulapputigingaatsiarparput. Novembarimi peqatigiiffinnit aallartitat Sisimiunut tikinnissaat naapinnissaallu assorsuaq qilanaarinikuuarput. Nunatta annersarujussuarniit peqataasoqarpoq, ilaatigullu avannaani Ilulissaniit, kujataani Nanortalimmiit, tunumiillu Ittoqqortormiuniit peqataasoqarluni.  Taakku saniatigut aamma Danmarkimiit peqataasoqarpoq. Tamannalu uagutsinnut pissanganarluinnarpoq.

Siunissap isikkulernera
Siunissaq naluarput, suliassarpassuarnilli pissanganartunik piareersaavugut maannakkut eqqaanianngikkallakkatsinnik. Qilanaarutissaqarpusi, taamaattumik nittartakkatsinnut facebookkitsinnullu malinnaagit, suliagummi pilersaarutigullu pillugit sumut killinnersugut tamaana malinnaasinnaavutit.

Gå tilbage
Skip to content
Skip to toolbar