Inunnik innarluutilinnut attuumassuteqartut: Suli inuit innarluutillit pisinnaatitaaffiisa iluanni unammillernartoqarpoq

Tiliup november 2018-imi peqatigiiffinnut isumasioqatigiinnera ataatsimeersuarnermik naggaserneqarpoq.

Isumasioqatigiinneq ataatsimeersuarnerlu Nunatsinni inuit innarluutillit pisinnaatitaaffiisa siammarterniarnerani suliap ilagaa.

Ataatsimeersuarnermi inunnut innarluutilinnut arlaatigut attuumassuteqartut katersorneqarput. Tamanna isumaqarpoq, inuit innarluutillit, inuit innarluutillit peqatigiiffii oqartussallu nerrivimmi ataatsimi katersorneqartut taamaalillutillu ulluinnarni eqqarsuutitik pillugit apuussuisinnaasut. Killormullu aamma oqartussat suliffeqarfiillu inunnik innarluutilinnik sullissisut  tusarsinnaavaat “illua tungaani” unammillernartut suut misigineqartarnersut.

Ataatsimeersuarnermi ilisimasallit oqallinnissaannut peqataasut apeqqutissatik katersorpaat, taamaasillutik tassani apeqqutit suulluunniit akineqarsinnaassammata oqallisigineqarlutillu.

Oqallittoqannginneranili, Inuit Innarluutillit Illersuisuat inuit innarluutillit pisinnaatitaaffii ullutsinni nammineq misigisani naapertorlugit qanoq inissisimanersoqarnersoq saqqummiivoq.

– Erseqqarilluinnarpoq inuit innarluutillit pisinnaatitaaffii pillugit isumaqatigiissut Nunatsinni suli ilisimaneqarnera annertuallaanngitsoq. Taamaappoq inuit innarluutillit aamma oqartussat akornani. Saaffiginnittartorpassuit takutippaat suli annertuumik suliassaqartugut, Inuit Innarluutillit Illersuisuat Christina Johnsen oqarpoq.

Tusaaneqarneq

Ataatsimeersuarneq Tiliumut, kommuninut, Peqqissutsimut, Isumaginninnermut Inatsisinillu Atuutsitsinermut Naalakkersuisoqarfimmut allanullu susassaqartunut inuit innarluutillit ulluinnarni atugaannik aammalu inuit innarluutillit pisinnaatitaaffiinut malinninnerup qanoq ingerlaneranik tipisiuinissamik periarfissiivoq.

– Inunnut innarluutilinnut, ilaqutaasunut soorunami aamma inunnut innarluutilinnut tamanut attuumassuteqartunut ataatsimoortinneqarneq tusarneqarnerlu isumaqarsimaqaaq, Christina Johnsen oqarpoq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq ataatsimeersuarnermut peqataanissaminut aporfeqarnini pissutigalugu ataatsimeersuarneq immiussamik tamanut takuneqarsinnaasumik nassiussinermigut ammarpaa.

Ullup ingerlanerani peqataasut aggerfitik akimorlugit ulluinnarni unammillernartut aqqusaartakkatik taakkulu qanoq aaqqinneqarsinnaanersut oqallipput.

Aggerfiit akimorlugit oqallinnerup saniatigut aamma arlaleriinnik saqqummiisoqarpoq, ilaatigut Mette Fransen, Institut for Menneskerettighederimeersoq saqqummiisunut ilaavoq. Taanna inuit innarluutillit pisinnaatitaaffii pillugit isumaqatigiissut aamma Nunatsinni isumaqatigiissutip atuutsinniarnerani sumut killiffik pillugu saqqummiivoq.

– Inuit innarluutillit pisinnaatitaaffii pillugit isumaqatigiissut inunnik innarluutilinnik sullissinermi sakkutut atorneqarnissaa pingaaruteqartorujussuuvoq. Taannami uuttortaatitut atortarparput taamaattumillu Kalaallit Nunaanni inunnik innarluutilinnik sullissisut taassuminnga ilisimannilluarnissaat pingaaruteqartorujussuuvoq. Mettep isumaqatiigiissutip atuutsinniarnerani sukkut ingerlalluartoqarnersoq sukkullu unammillernartoqarnersoq oqaluttuarivaa. Aatsaat suleqatigiikkutta inuit innarluutillit sullinneqarnerat kivissinnaavarput inuillu innarluutillit pisinnaatitaaffii malinneqarnissaat qulakkeersinnaavarput. Ataatsimeersuarnerummi tamanna isumaraa, aaqqissuussinermi suliamik aqutsisoq Anna Ida Hallgaard Jonsson taama oqarpoq.

Saqqummiisut ilagaat Qeqqata Kommuniani ilaqutariinnermut immikkoortortaqarfimmi pisortaq Kirsten Bødker. Kirsten Bødkerip kommuunimi inuit innarluutillit pisinnaatitaaffii pillugit isumaqatigiissut qanoq sulinerminni atortarnerlugu oqaluttuarpoq.

– Nuannerpoq kommuunit inuit innarluutillit pisinnaatigaaffii eqqumaffigileriartoraat. Siuariartuinnartariaqarpugut, Anna Ida Hallgaard Jonsson naggasiivoq.

Gå tilbage
Skip to content
Skip to toolbar