Meeqqat innarluutillit piginnaatitaaffeqarput

All.: Jonna Ketwa, Siulersuisunut siulittaasoq Meeqqat Ikiortigit Kalaallit Nunaat

Meeqqat innarluutillit inuiaqatigiit akornanni suli sanngiitsumik inisisimatitaapput inatsisitigullu allannguisoqartariaqarpoq piginnaatitaaffii isumannaarneqassappata.

Inuiaqatigiittut akisussaaffigivarput meeqqat innarluutillit ikiorneqarnissamut, pakkutarineqarnissamut ilinniartinneqarnissamullu piginnaatitaaffii isumannaassallugit, angujumallugit meeqqat ”annertunerpaamik imminnut tatigilersinnaanissaat aammalu inuunermik imaqarluartumik uninngaannarfiunngitsumillu inuusinnaanissaat” (Meeqqat pillugit isumaqatigiissummi anguniakkatut allassimasut 23-iat). Tamannami Kalaallit Nunaata atsioqataffiginikuuaa, FN-imi Meeqqat Piginnaatitaaffii Pillugit 1993-imi isumaqatigiissusiaasut ilannguffigigatsigit.

Kalaallit Nunaat meeqqat innaarluutillit piginnatitaaffii isumannaarumallugit suli unammiugassaqaqaaq. Meerarpassuarnummi innaarluutilinnut tamatigut naatsorsuutigineqarsinnaanngilaq pisariaqartumik ikiorneqarlunilu ikorfartorneqarnissaq, tamannalu inuiaqatyigiittut iluarsisariaqarparput. Ajornartorsiutaavoq inatsisartut peqqussutaanni manna atuuttumi meeqqat innaarluutillit ikiorneqarnissaat pillugu immikkut inatsisiliuussisimannginneq. Qilanaaraarpullu, tamatuma Innaarluutillit pillugit Inatsisissami nutaami ilanngunneqarnissaat.

Meeqqammi innarluutillit meeqqatut inuttullu innarluutilittut piginnaatitaaffeqarput. Piginnaatitaaffiillu isumannaarneqassapput, pingaartinneqarlutik qitiutinneqarlutik pakkutarineqarnissaat aammalu meeqqat innaarluutillit tamarmiusut ineriartornissamut periarfissaqarnissaat.

Kalaallit Nunaanni Meeqqat Ikiortigit tungaanit meeqqat tamarmik piginnaatitaaffeqarnissaat suliniutigivarput, taamaattumillu tapersersorpagut meeqqat innarluuteqartut pillugit suliniutaasut. Isumaqarpugut, pingaaruteqarluinnartuusoq oqartussaasut, meeqqat innaarluuteqartut piginnaatitaaffii isumannaarumallugit, suliniaqatigiiffinnik soorlu Tilioq aamma Inooqat-tut ittunik oqaloqateqalernissaat.

Annertunerusunik paasisaqarumasut qinnuvigineqarput saaffigeqqullugu, siulersuisunut siulittaasoq Jonna Ketwa +299 246550

Gå tilbage
Skip to content
Skip to toolbar