Ajornartorsiutit qanoq qaangerniarneqarsinnaanersut pissutsit piviusut qaqilerneqarnerisigut ataatsimoorussamik siunnerfeqarlersissavaatigut

Ippassaq 23.januar 2019 AG-imi anaanaq ernermi oqalunniarnikkut ajornartorsiutillip siunissaanik pitsaasumik sorsunnera soqutiginnilluta atuarparput. Ilaqutariit ulluinnarni unammillernartunik aqqusaagaqartareeraluartut, qaavatigut ikiorneqarnissamik pisinnaatitaaffeqarnertik sorsuutigaat. Taassuma anaanap ilungersuuteqarnera tusaqquneralu kisiartaanngilaq. Oktobarimi tusagassiuutitsigut aamma alla anaanaq ajornartorsiutip asserluinnaanik oqariartuutilik atuarneqarsinnaavoq. Ippassaq aamma saqqummerpoq Ombudsmandip kommuuni alla sivisuumik suliamik ingerlatsisimanera isornartorsiorujussuaraa. Oqaluttuarineqartut tamakku Tiliomut saaffiginnissutaasartut, Sermersuullu kommuuniata nakkutilliinermi nalunaarusiap saqqummiunneqarnerani isornartorsiorneqartup uppernarsaqqippaa aaqqiivigisassanik peqartoq. Naleqqutinngitsumik sullissineq kommuunimut ataasiinnarmut attuumanngilaq, ajornartorsiut kommuunini tamani atuuppoq.

Ungasinngitsumi aamma saqqummiunneqarpoq, inuit qassit annilaangalluni ersinermik,  isumatsannermillu nalaanneqarsimasut qassiuneri pillugit kisitsisaateqanngitsugut. Kalaallit nunaanni innuttaasut pillugit ataqatigiissaartumik aaqqissuussilluni nalunaarsuutinik paasiniaanissamut misissueqqissaartoqarnissaanik MIO-p oqariartuutai tunngavilersuutaalu tapersersuinnarsinnaavagut.

Ajornartorsiut piffinni tamani innarluutillit atugarisaanni takussaavoq.

Meeqqat innarluutillit naggataarutaasumik soraarummeereerlutik atuarfimmik anisarnerat aamma kisitsisinngorlugu piginngilarput. Meeqqat immikkut atuartinneqartartut akornanni qassit innarluuteqartuunersut aamma kisitsisaatigineqanngilaq. Nuna tamakkerlugu inuit qassit innarluuteqarnersut aamma kisitsisinngorlugu pigineqanngilaq. Naatsumik oqaatigalugu, pissutsit piviusut eqqortullu amigaatigaagut.Tamakku eqqortumik qulaajartinnagit ajornartorsiutit siunnerfilimmik pitsaasumik ikiorsiiffiginissai ajornarput. Inuit innarluutillit inuuniarnermikkut atugaat erseqqissunik piviusorsiortumillu tunngavissaqartinnagit naluarput Kalaallit Nunaanni qanoq annertutigisumik ajornartorsiut annertutiginersoq. Ajornartorsiutip sorlaa ilisimatinnagu inuiaqatigiittut ineriartortitsiniarnitsinni kisitsisinik tunngavissaqartigata suut ilorraap tungaanut allanngortissimanerlugit takussutissaqarnavianngilagut.

Takussutissalimmik tunngaveqartigani politikkikkut ajornartorsiutip ukkanneqarsinnaanissaa killeqarpoq, aammalu nalunaarsorsimasanik kisitsisaateqanngikkaanni aaliangiisartunut ajornartorsiutip qanoq annertutigineranik oqariartuuteqarsinnaaneq killeqassalluni. Aaliangiisartut sattallutillusooq pissapput misissukkanik tutsuiginartunik eqqortunillu tunngavissaqanngikkunik. Politikkikkut suut pingaarnersiussallugit suliniutissat aningaasaliinissallu nalorninassaqaat, inuiaqatigiittut ullumikkut Kalaallit Nunaanni soorpiaat ajornartorsiutini initunertut takussutissaqartinngikkutsigit.

Ulluni makkunani tusagassiuutitsigut Kalaallit Nunaanni innuttaasut amerlassusaat sammineqarlunilu oqallisaavoq. Qulaani arnat marluk eqqaaneqartut saqqummiutereerpaat ikiortissat pitsaanerusut ujartoramikkit qallunaat nunaannut nuunnissartik eqqarsaatersuutigisimallugu. Taakku taama misilisallit kisimiinngillat.

Angajoqqaat kikkulluunniit tamarmik meerartatik innarluuteqartuuppata innarluuteqanngippatalu pitsaasumik atugaqarnissaanik kissaassisarput. Ajornartorsiutip taama annertutiginnginneranik pisariaqartitsivinnerlu tunngavigalugu ikiorserneqartussaagaluit nunatsinni ikippallaarnerput tunngavilersuutigissallugu atorsinnaanngilluinnarparput. Kalaallit Nunaaanni FN-ip Inuit Innarluutillit isumaqatigiissutaanik atortussanngortitsinikuuvoq, taamaattumillu pisussaaffeqarluni inuit innarluutillit innarluuteqarnertik pillugu immikkoortinneqartussaannginnerannik illersuissalluni akisussaaffeqarpoq.

Inuit innarluutillit inuit allat assigalugit nalinginnaasumik inuunissartik allatulli periarfissaqarlutik akoorusupput, taamattaaq ilaqutaasut kissaateqarput. Taamaattumik pakkersimajunnaarluta  ajornartorsiuteqarnerput nassuerutigisariaqarparput – pitsaanerusumik anguniagaqarnissaq siunnerfigisariaqarparput – taamali iliussagutta pitsaasumillu ingerlanerput sullissinermullu ajunnginnersoq paasissagutsigu kisitsisinik tunngaveqarluta sulisariaqarpugut.

Tamatta peqatigiiffiit, kattuffiit, kommuunit, Inatsisartut Naalakkersuisullu akunnitsinni siunnerfilimmik piffissaq ungasinnerusoq isigalugu politikkikkut oqariartuut ataatsimoorfiusoq tunngavigalugu inuit innarluutillit atugaasa pilersaarusiugaasumik kisitsisit tutsuiginartut atorlugit siunissami inuit innarluutillit atugaasa ineriartortinneqarnissaannut ikioqatigiiffigisariaqarparput. Kikkut tamarmik kalaallit nunaanni inissaqartinneqarnerat ikioqatigiinnitsigut anguniartariaqarparput. Pisariaqartitsineq tunngavigalugu ikiorserneqarnissamillu pisinnaatitaaneq qinerniarlugu kalaallit nunaat innuttaminik qimagaaffigineqarnissaa tamatta pakkersimaartussaavarput.

Arlaannik apeqqutissaqartoqarpat itisiliinerusumik nassuiaateqarnissatsinnut ammavagut attavigineqarsinnaallutalu.

Inussiarnersumik inuulluaqqusilluta

Inuit Innarluutillit Illersuisuat
Christina Johnsen
info@tilioq.gl
Oqarasuaat.: 345090

Gå tilbage
Skip to content
Skip to toolbar