Immikkoortoq 1 – Isumaqatigiissutip siunertaa

Inuit innarluutillit pillugit isumaqatigiissutip siunertaraa, inuttut allatulli inuit innarluutillit assigiimmik pisinnaatitaaffeqarnerat qulakkiissallugu, inunnut tamanut inuttut pisinnaatitaaffiit kikkunnut tamanut atuuttuummata.

Inuit innarluutillit allat tamat assigalugit ataqqineqarlutik naligiimmik pineqartussaapput.

Inuit innarluutillit pillugit isumaqatigiissutip iluani inuit innarluutillit tamarmik, innarluuteqarnertillu pillugu inuiaqatigiinni akimmisaaruteqarsinnaasut assigiimmik pineqarnissaat pillugu isumaqatigiissummi pineqarput.