Immikkoortoq 4 – Qanoq iliuuseqarnissamut kalaallit nunaata pisusassaaffii
Namminersorlutik Oqartussat isumagissavaat inuit innarluutillit inuttut pisinnaatitaaffii kiffaanngissuseqarfiilu sutigut tamatigut inuusinnaatitaaneq innarluuteqarnerlu pillugu immikkoortitsinngitsumik suliniuteqassallutik.
Tamanna ilaatigut ima paasineqassaaq:
Namminersorlutik Oqartussat inatsitigut akuersissutigisariaqarpaat qulakkiissallugu inuit innarluutillit pillugit isumaqatigiissummi pisinnaatitaaffiit atuutsinneqarnissaat sulissutigissallugu. Namminersorlutik Oqartussat aamma allannguillutik imlt. inatsisinik maleruagassanilluunniit inunnik innarluutilinnik assigiinngisitsinermik kinguneqarsinnaasunik allanngortitserissallutik pisinnaanngillat.
Namminersorlutik Oqartussat pisussaaffigaat sutigut tamatigut inuit innarluutillit atugaat inuit pisinnaatitaaffii naapertorlugit suliniuteqarfigissallugit .
Namminersorlutik Oqartussat Inuit innarluutillit pisinnaatitaaffii pillugit isumaqatigiissut naapertorlugu, eqqunngitsumik iliorsinnaatitaanngilllat. Namminersorlutik Oqartussat pisussaaffigaat pisortani suliffeqarfinni paaqqinniittarfinnilu inuit innarluutillit pillugit isumaqatigiissummi peqqussutit eqquutsinneqarnissaat sulissutigissallugu.
Namminersorlutik Oqartussat suliassarivaat inuit tamarmik nunamilu suliniaqatigiiffiit suliffeqarfiillu inuit innarluutillit assigiinngitsumik pineqannginnissaat sulissutigissallugu.
Namminersorlutik Oqartussat isumagisassaannut ilaavoq inuit innarluutillit tamakkiisumik inuiaqatigiinni inuunissaat anguniarlugu ikiorsiissutaasinnaasut assigiinngitsut misissuiffiginissaannnik sulissuteqassallutik.
Namminersorlutik Oqartussat qulakkeertussaavaat inuit innarluutillit ikiorsiissutit assigiinngitsut suut periarfissaaneraat ilisimasariaqarneraallu atuisunut sulissutigissallugu.
Namminersorlutik Oqartussat isumagisassaraat inunnik innarluutilinnik sulialinnut tamanut inuit innarluutillit pillugit isumaqatigiissutip imarisai paasititsiniutigissallugit, sulisut isumaqatigiissut naapertorlugu sulinissaat siunertaammat.
Namminersorlutik Oqartussat sapinngisaq tamaat inuit innarluutillit pillugit isumaqatigiissut naapertorlugu suliaqarneq piviusunngortittariaqarpaat. Aningaasaqarnikkut, inuttut atukkatigut kulturimullu tunngasutigut ataatsikkut aaqqiivigineqarsinnaanngillat, taamaattorli Namminersorlutik Oqartussat siuariartuuteqartuaannarnissaq sulissutigisariaqarpaat.
Namminersorlutik Oqartussat inatsisinik maleruagassanillu nutaanik suliaqartillutik inuit innarluutillit inatsisinut qanoq isumaqarnerat naalaartariaqarpaat. Namminersorlutik Oqartussat nunamilu inuit innarluutillit kattuffii aqqutigalugit tamakkuninnga suleqatigiiffigisinnaavaat.
Namminersorlutik Oqartussat inuit innarluutillit pillugit isumaqatigiissummi allassimasasut saniatigut suli annerusumik iliuuseqarsinnaavoq. Tassa imaappoq, Namminersorlutik Oqartussat inuit innarluutillit annerusumik pitsanngorsaavigineqarnissaat isumaqatigiissummi allaqqasut saniatigut suliniuteqarsinnaapput.