Immikkoortut 31-50

Nunat suleqatigiinneri

Kalaallit Nunaata isumaqatigiissutip siunertaata atuutsinneqarnera eqqortinneqarnersoq pillugu nunanik allanik suleqateqartassaaq. Nunani allani kattuffiit aamma suleqatigineqartassapput. Ajornanngippat inuit
innarluutillit kattuffii suleqatigineqartassapput.

Isumaqatigiissutip eqquutsinneqarnerata misissuiffigineqarnera

Isumaqatigiissut malillugu inuit innarluutillit pisinnaatitaaffii eqquutsinneqarnersut
Kalaallit Nunaata nakkutigissallugit pisussaaffigaa. Kalaallit Nunaat kattuffinnik peqatigiiffinnilluunniit
nakkutilliisussanik Isumaqatigiissut malinneqarnersoq qulakkeerumallugu pilersitsisussaavoq. Nunani assigiinngitsuni peqatigiiffiit kattuffiillu aamma isumaqatigiissutip atuutsinneqarnera
nakkutigissallugu pisussaaffeqarput. Isumaqatigiissutip eqquutsinneqarnerata inunnit innarluutilinnit
immikkut peqataaffigineqartarnissaa aamma pingaaruteqarpoq.

Inuit Innarluutillit Pisinnaatitaaffii pillugit Ataatsimiititaliaq

Inuit innarluutillit pisinnaatitaaffii pillugit immikkut ittumik ataatsimiititaliaqarpoq. Nunat assigiinngitsut
isumaqatigiissummik atuutsitsiniarlutik akuersissuteqarsimasut maleruagassat malillugit ingerlatsinersut
inunnik eqimattaakkaanik nakkutilliisoqarput.

Nunat assigiinngitsut ataatsimiititaliami ilaasortaasartussaapput. Ataatsimiititaliami inuit innarluutillit
aamma ilaasortaasartussaapput.

Ukiut sisamakkaartumik nalunaarusiamik nunat tamarmik ataatsimiititaliamut nassitsisartussaapput.
Nalunaarusiami nunat assigiinngitsut inuit innarluutillit pisinnaatitaaffiini isumaqatigiissut qanoq
suleriuseqarfiginerlugu sumullu suliaq killinnersoq nalunaarusiarisartussaavaat.

Ataatsimiititaliap nalunaarusiat tamaasa misissuiffigereerunigit nunat assigiinngitsut qanoq inuit
innarluutillit pillugit pisinnaatitaaffiisa isumaqatigiissutaat naapertorlugu suleriaaseqarsinnaanerannik
siunnersuuteqartassapput.

Isumaqatigiissut kikkunnit tamanit paasineqarlunilu atuarneqarsinnaasariaqarpoq

Inuit Innarluutillit Pisinnaatitaaffii pillugit Isumaqatigiissummut tunngasunik paasissutissanik tigoriaannarnik peqartariaqarpoq. Paasissutissat atuaruminartuullutillu tappiitsunut tulluarsagaassapput.