Attaveqaqatigiinnermut naalakkersuisumut allakkat ammasut

Inuit Innarluutillit Illersuisuat Christina Johnsen Attaveqaqatigiinnermut Naalakkersuisumut ammasunik allagaqarnermini oqariartuutigaa, Kangerlussuup mittarfia inunnut innarluutilinnut imaluunniit timimikkut piginnaanikitsunut tikikkuminaatsuusoq.

Mittarfinni attaveqaqatigiinnermilu atortuni tamanut tulluarsaalluni ilusilersuinerit tikikkuminassutsillu pilersissigit

Kangerlussuup mittarfiata siunissami atuutiinnarnissaanik erseqqissaasoqarnerata kingorna Inuit Innarluutillit Illersuisoqarfiat Tilioq periarfissaqarumavoq, Kangerlussuarmi mittarfimmi tikikkuminaassuseq maluginiarneqaqqullugu taamatullu Kalaallit Nunaanni angallannikkut isumaqatigiissuteqarfiusuni allani atuummata, ilanngullugulu mittarfissuarnik sanaartortitsisussat KAIR kaammattorumavagut Ilulissani, Nuummi Qaqortumilu mittarfissat sanaartorneqalerpata tamat naligiimmik periarfissaqartinneqarlutik mittarfimmut isersinnaasalernissaat qulakkeerumaaraat.

Nunatta iluani angalasut Kangerlussuarmut aqqusaarnerminni isaariakkut tummerarpassualikkut ingerlasariaqartarput, 1.salimi terminalimi check-in, tammajuitsussanik pisiniarfik kantine neriniartarfillu iserniarunikkit tummerarpassuit aqqusaartariaqartarlugit. Tummerarpassuillu aamma ingerlavigeqqeqqaarlugit Hotel Kangerlussuup receptionia pallinneqarsinnaavoq.

Tummerarpassuit aqqusaagassat inunnut timikkut piginnaanikitsunut, kaassuartakkanik issiavilinnut pitsorluttunullu ajornartorsiutaasarput, tassami isaarissap aamma pisattanik tigusisarfiup eqqaaniittoq elevatori ajormat atorneqarsinnaasanngilaq.

Elevatorilu ajortoq pillugu Inuit Innarluutillit Illersuisuat Christina Johnsen Mittarfeqarfinnut 2019-imi maajimili allakkatigut attaveqartalerpoq suli maannamut iluarsiinermik kinguneqanngitsumik, angallassinermi ulapaarfiunerata nalaa peqqutaatinneqarluni elevatorimik suli iluarsiisoqarani.

Kangerlussuarmi mittarfimmi maanna periuserineqartoq imaappoq, inuk timikkut piginnaanikitsoq innarluutililluunniit timmisartumik tikissatillugu, tikippat aallalerpallu biilimik ingerlanneqartarpoq. Tamannali tamanut iluaqutaasinnaasutut atuutinngilaq, tassami timmisartumik ilaasussap nammineq angalalernermini Air Greenlandimut check-in-ernermini inniminneqqaartartussaavaa. Angalasartorpassuaqarporli allanik inuttut innarluutilittut nalilersugaanngitsunik, soorlu naartusut, utoqqaat imaluunniit inuit pitsorluttut. Kangerlussuarmilu unnuisoqassatillugu ilaasut pisattaminnik pisattanik tigusisarfimmi naqqaniittumiit tummeqqakkut qummut terminalimut majuussuisariaqartarput.

Kangerlussuarmi mittarfimmi iluarsaassinerit tamanut tulluarsagaasariaqarput

Danmarkimi illersornissaqarfik tunngaviusumik isumaqatigiissuteqarfigineqarneratigut erseqqissaasoqarpoq Kangerlussuarmi mittarfik angalasunit siunissami tikinneqartuartarsinnaasoq, illersornissaqarfillu Kangerlussuarmi mittarfimmik iluarsaassinissamut akisussaatinneqarpoq. Iluarsagassat suunersut suli ilisimaneqaqqissaanngikkaluartut, Tiliumiit Naalakkersuisut oqariartorfigiumavagut Kangerlussuarmi mittarfimmik iluarsaassinermut atatillugu tamanut naleqqussakkanik ilusilersuinerit tikikkuminartuunerillu pisariaqartinneqarmata.

Kalaallit Nunaanni najugaqartut timikkut piginnaanikitsut kisiisa eqqarsaatiginagit, kisianni aamma takornariat siunissami tikittalerumaartut eqqarsaatigalugit, taakkumi aamma utoqqaasinnaapput, utoqqaat takornariat Kalaallit Nunaanni takornariaqarnermi maanna aningaasarsiornikkut iluaqutaapput. Utoqqaat takornariat aamma timikkut piginnaanikitsuusinnaapput, inuttut innarluutillit, kaassuartakkamik issiaveqartut imaluunniit pitsorluttut.

Danmarkimi Pakke-rejse Ankenævnet Kalaallit Nunaannut takornariat innarluutillit taarsiiffigineqarnissaannik kingunilimmik aalajangiisoqartoq takoreerparput, taakkumi Kalaallit Nunaanni attaveqaqatigiinnermi atortulersuutit ajornerinik naammangittaalliuuteqarput (takuuk Sermitsiaq nr. 31 2019 qupp. 22 Takornariat innarluutillit Nunatsinni ilungersunartorsiortartut, qallunaat nuliariit nulia pitsorluttuusoq angalanertik iluatsinngitsoortoq pillugu taarsiiffigineqartut).

Inuit Innarluutillit Illersuisoqarfiat Kangerlussuarmi mittarfiup aamma hotelip tikikkuminaannersui pillugit innuttaasunit saaffigineqartarpoq, tassami taakku inunnut innarluutilinnut aamma kaassuartakkamik issiavilinnut nunattalu iluani angalasunut aqqusaarlugit ilungersunarluinnartarput. Angalasut kaassuartakkamik issiavillit ingiaqateqanngippata Hotel Kangerlussuup receptionia Air Greenlandilluunniit Check-in-ia 1.salimi terminalimiittoq pallikkuminaassinnaasarmata.

Assersuut: Inuk innarluutilik aamma ingiaqataa Kangerlussuarmit ingerlaqqinnginnerminni akunneri arfinilinni utaqqisussaapput, taamaanneranilu eqqissisimaarfissatut inimik tunineqarlutik. Inimut eqqissisimaarfissaminnut appakaanniartillutik neriniartarfikkut inuit nerrittut akornisigut ingerlasariaqarput, asaasut asaataasiviat sulisullu atisalersortarfiat aqqusaaqqaartariaqarlugit. Inissamut aqqummi akimmiffissat naammareeraluartut inigisaanni aamma perusuersartarfik kaassuartakkanik issiavilimmut iserfigineqarsinnaanngitsoq misigaat. Aallariartussallutillu aninialeramik, neriniartarfiup matoqqanera peqqutigalugu ingerlariaqqinnaveeraluarput, tassami aningasuarfissaq appussaasimavoq illullu silataatigut issiavik kaassuartagaq ingerlanneqarsinnaanani. Asaasumik nalaatsornerinnakkut naapitsinermi aallariartortarfimmut matut ammarneqarput.

Inuit timimikkut piginnaanikitsut, innarluutillit, kaassuartakkamik issiavillit pitsorluttullu taamatut atugassaqartittuarsinnaanngilagut, aamma Kangerlussuarmi mittarfik siunissami iluarsartuullugu sanaartorfigineqareerpat imaluunniit Ilulissani, Nuummi aamma Qaqortumi mittarfiit siunissami atulerpata.

Naalakkersuisut inuit innarluutillit pisariaqartitaat tunulliuppaat

Kangerlussuarmi mittarfik kisimi inunnut innarluutilinnut tikikkuminaatsuunngilaq, innuttaasut innarluutillit Narsarsuarmi Nunattalu Kujataani (Namminersorlutik Oqartussat aamma angalatitseqatigiiffiup angallassinissamik isumaqatigissuteqarfigisaanni) angalasut tikikkuminaassutsimik tunngaveqartunik assigiinngitsunik ajornartorsiutinik misigisaqartarput, soorlu illoqarfinni nunaqarfinnilu sissami angalasussanut utaqqisarfiit (terminalet) aamma angallatit inunnut innarluutilinnut  naleqquttut amingaatapput, taamatullu ajornanngitsumik pisariitsumillu illoqarfinnut nunaqarfinnullu tikissinnaaniassammata.

Meeqqamut angisuumut innarluutilimmut kaassuartakkamillu issiavilimmut anaanaq, nammineq meeqqani kissumiarlugu Targamik umiatsiamut ikiartortariaqartarpoq, puttasut orfaasinnaasartut ukiumilu quasarsinnaasut aqqutigeqqaartariaqartarlugit. Targat angallatit, assersuutigalugu inunnut innarluutilinnut naleqqussakkanik perusuersartarfeqanngillat.

Taamatut angallassinermik aaqissuussani Naalakkersuisut inuit innarluutillit pisariaqartitaannik pisinnaatitaaffiinilu immikkoortoq 20-imik, tassa kikkut tamarmik sumulluunniit ingerlasinnaanerannik tunulliussissarput, pisinnaatitaaffik naapertorlugu Kalaallit Nunaata inuit innarluutillit ajornanngitsumik sumulluunniit ornigussinnaanerat isumagisussaavaat. Inuit innarluutillit nammineq aalajangissavaat sumut qanorlu ornigukkusunnerlutik. Angallassineq taminit akilerneqarsinnaasumik akikitsumillu ikiorsiinissamut aqqutissiuisuussaaq.

Tamanut tulluarsaalluni ilusilersuinerit tikikkuminassuserlu tunngavigalugit isumaloritsi

Inuit innarluutillit tapersersorneqartarnissaannut inatsisissaq 2020-mi januaarip aallaqqaataani atuutilersussap siunertaraa, inuit innarluutillit inuiaqatigiinni allatulli naligiimmik periarfissaqarnissaat, sapinngisamik inuiaqatigiinni tamakkiisumik sunniuteqarluartumillu peqataanissaasa akuunissaasalu qulakkeerneqarnissaat, inatsimmi paragraf 2 imatut allaqqavoq:

Inuk innarluutilik allat assigalugit inuit pisinnaatitaaffiinik aamma tunngaviusumik kiffaanngissuseqarsinnaatitaanerannik tamaginnik tamakkiisumik ilorrisimaaruteqarsinnaatitaavoq. Inatsisartut inatsisaat manna malillugu tapersiineq pisinnaatitaaffinnik taakkuninnga qulakkeerinneqataassaaq.

Tamannalu inuiaqatigiinnut pisussaaffiliivoq tamanut tulluarsakkanik ilusilersuisoqartarnissaanut aamma tikikkuminartuunissamut, taamatullu qulakkeerlugu tamat naligiimmik sanaartukkanut isersinnaalernissaat, aamma Kangerlussuarmi Nunatsinnilu attaveqaqatigiinnikkut naliginnaasumik atortorissaarutini tamani.

Inussiarnersumik inuulluaqqusillunga

Inuit Innarluutillit Illersuisuat

Christina Johnsen

 

 

Nunatta iluani timmisartumik ilaasut Kangerlussuarmut tikikkaangamik tummerarpassuit aqqusaaqqaarlugit 1.salimi terminalimut apuuttarput.

Inuit timimikkut piginnaanikitsut imaluunniit innarluutillit pisattanik tigusisarfimmiit qummut tummerarpassuit ingerlavisariaqartarpaat, tassani elevatori ajortoq atorneqarsinnaanngimmat

Kalaallit Nunaanni attaveqaqatigiinnerni atortuni tamanut tulluarsakkanik ilusilersuinerit tikikkuminassutsillu pisariaqartinneqarput

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest