Immikkut suliniuteqartut ilinniarfinnut tamanut atuutilersut

Immikkut suliniuteqartuniit nutaarsiassaq Tiliumiit ingerlateqqipparput:

Immikkut suliniuteqartut aamma ilinniarfinnut neqerooruteqarput

Ilinniartitaanermi Naalakkersuisoqarfik 2017-mi misileraalluni ilinniarnertuunngorniarfinni ilinniagaqartut immikkut pisariaqartitsisunut aaqqissuisimavoq. Tassani pineqarput ilinniagaqartut innarluutillit imaluunniit nappaatiminnik suussusersimasut, tamannalu pissutigalugu ilinniarnertunngoorniarneq naliginnaasoq naammassisinnaanagu. GUX-S periarfissaavoq ilinniartunut ilinniarnertuunngorusuttunut, tapersersuinerunikkut aamma immikkut pisariaqarpat ilinniarnertuunngorniarneq immikkut aaqqissuunneqarnissaanut periarfissaasinnaalluni.

GUX S misileraaffigineqarnerani immikkut suliniuteqartut aallartinneqarsimapput. Immikkut suliniuteqartut anguniartussaavaat, GUX S-mut illinniarniarlutik qinnuteqartut innersuunnissaat, aamma saniatigut ilinniartumut attaveqartussat ilinniartitsisut mentor-illu ilinniarteqqinnissai. Immikkut suliniuteqartut ilinniarnertuunngorniarfiit immikkut atuarnissamik aaqqissuineranut siunnersuisarput, immikkut pisariaqartitsineq aallaavigalugu aaqqissuinissaq eqqarsaatigalugu.
Ilinniartuniit, angajoqqaaniit, qanigisaniit, ilinniartitsisuniit kiisalu ilinniartunut arlaatigut attuumassutillit GUX S-serusuttumut imaluunniit GUX S-ertumut immikkut suliniuteqartut saaffigineqarsinnaapput.

GUX S pillugu misileraaneq 2017-imiit 2021-p aasaata tungaanut ingerlasimavoq. August 2021-imi misileraaneq aallarteqqissimavoq, ukiut pingasut sivisussuseqartussamik. Misileraaneq ataavartumik nalilersorneqartarpoq, Ilinniaritaanermilu Naalakkersuisoqarfik naliliisimavoq, immikkut suliniuteqartut ilinniartoqarfinnut allanut neqeroorutiginiarlugu. Ilinniarfeqarfiit allat tassaapput brancheskolit, Majoriaq, qaffasissumik ilinniarfeqarfiit il.il.

August 2021-imiit ilinniarfeqarfiit allat GUX-iunngitsut, immikkut suliniuteqartunut ikioqqullutik, tapersersoqqullutik, aqqutissioqqullutik siunnersoqqullutillu saaffiginnissinnaapput, ilinniartoq immikkut pisariaqartitsippat (ass. Autisme, Aspergers Syndrom, ADHD, naqinnernik ilisarsisinnaannginneq il.il.), taamaasilluni ilinniartoq, immaqalu angajoqqaavi imaluunniit angajoqqaatut oqartussaasoq, ilinniartup atuarfia, immikkut ilinniarsimasut kommunialu suleqatigalugit ilinniarnissaanik aaqqissuisoqarsinnaavoq. Suleqatigiinnissaq pisariaqartutut isigineqarpoq ataqatigiissaarissagaanni, soorlu isumaginnittoqarfimmiit ikiorsiissutiniit ilinniagaqarnersiuteqalernissaq anguniarlugu imaluunniit paarlaatumik, immaqa ineqarnermik allannguutit pillugit (soorlu kollegianiit isumaginnittoqarfimmiit initaarnissaq imaluuniit paarlaatumik), immaqa atuagarsoreernerup kingunerisaanik ilinniarnermut atatillugu suliffimmut nikinneq imalunniit paarlaatumik il.il.

Paasissutissanik annertunerusunik il.il. perusukkussi, Immikkut suliniuteqarnermi aqutsisoq, Else Poulsen attavigineqarsinnaavoq: qarasaasiakkut: elmo@cak.gl imaluunniit oqarasuaatikkut: +299 64 78 53.