Inatsisissap akuerineqarnera malunnartillugu Tilioq kaffillerpoq

Inuit innarluutillit tapersersorneqarnissaannut inatsisissaq Inatsisartunit ippassaq pingajussaaneerneqarluni akuerineqarpoq, tamannalu Tiliumi nuannaarutigineqarluni allatseqarfimmi kaffilliutigineqarpoq.

Inuit innarluutillit illersuisuata Christina Johnsenip inuit innarluutillit tapersersorneqarnissaanut inatsisissap akuerineqarnera nuannaarutigeqaa. Inatsisissarmi inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaannik tunngaveqarpoq, inunnillu innarluutilinnik isiginnittariaatsimik allannguivoq.

-Tiliumit inatsisissap akuerineqarnissaa eriniginikuuarput. Tassami inatsisissaq inunnut innarluutilinnut allaanerusumik isiginnittariaaseqarpoq, inuummi innarluutaa inuiaqatigiit akimmiffiliaattut isigineqassammat. Inatsisissaq inuit innarluutillit pisinnaatitaaffii pillugit naalagaaffiit peqatigiit isumaqatigiissutaannik aallaaveqarpoq, inuiaqatigiillu taamaasillutik pisussaaffeqalissapput inuit innarluutillit tamat naligalugit inuiaqatigiinni peqatanissaannut akimmiiffiit piiassallugit, Christina Johnsen oqarpoq.

Inatsisissaq aamma aaqqissuussaalluarpoq tamakkiisumillu takujuminassuseqarluni, oqartussallu akimorlugit aaqqiissuteqarniartuulluni, inatsisissami akuerineqartumi § 3 ima allaqqavoq: “Inuk innarluutilik ataqatigiissaagaasumik, ataqatigiissumik tamakkiisumillu isiginnittumik, inummut tunngasut tamaasa aamma inuup inuunera mianeralugit, tapersersorneqarnissaminut pisinnaatitaavoq.”

Inatsimmi illersuisoqarnissamik tapersersorneqarsinnaaneq aamma periarfissaalerpoq. Takusarpavut inuttaasut nukissaaleqisartut, ilaatigullu aalajangiinernut apeqquserneqarsinnaasunut naammangittaalliuuteqartarfinnut maalaartarfinnulluunniit imaluunniit ombudsmandimut naammangittaalliuuteqarnissaminnut pisinnaasanngitsut. 

Inatsisissap akuerineqarnera nuannaarutigaarput, suliamullu atatillugu ilanngunneqarnerput aamma nuannaarutigalugu. Kalaallit Nunaanni innuttaasut inatsisitaarmata pilluaqqujumavagut. 

Tiliup Sisimiuni allatseqarfiani kaffillerneq nal. 14.00 -16.00 ingerlanneqarpoq, tassani kaffi, tii kaagillu sassaalliutigineqarlutik.