Inuiaqatigiinni peqatatinneqarneq, tamanna nunatsinni kikkut tamarmik pisinnaatitaaffigaat

§§§ Pisinnaatitaaffikka – Pisinnaatitaaffitit – Pisinnaatitaaffivut §§§

Tiliumit Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaanni artikelit sammiumavagut, taakkulu Kalaallit Nunaanni ilinnut uannullu qanoq isumaqarnersut itisilerlugit. Pisinnaatitaaffiit atuarlugit ilikkagaqarfigikkit.

Inuiaqatigiinni peqatatinneqarneq, tamanna nunatsinni kikkut tamarmik pisinnaatitaaffigaat

Inuit innarluutillit inuiaqatigiinni peqataatinneqarnissartik inuttulli allatuulli pisinnaatitaaffigaat. Inuit innarluutillit pisinnaatitaaffiinut isumaqatigiissummi naliginnaasumik tunngavinnut tamanna ilaavoq immikkoortumilu 3-mi allaaserineqarluni. Tammana ima isumaqarpoq, Kalaallit Nunaata isumagissavaa inuit innarluutillit inuiaqatigiinni peqataatinneqarnissaannut periarfissaqarnissaat qulakkiissagaat. Soorlu inatsisiliornermi qulakkeerneqartassaaq sanaartukkat inunnit innarluutilinnit iserneqarsinnaanissaat, inatsisartunut qinersisoqarnerani aamma qinersisinnaanissaannut periarfissaqartinneqartassasut, nipilersornermik ilinnirfinni nipilersornermik sungiusariarsinnaasarnissaat il. Il.

Innarluut qanoq paasisariaava,  akimmiffiit innarluummik pilersitsisarput

Inuit innarluutillit pisinnaatitaaffii pillugit isumaqatigiissummi innarluutip pilersinneqartarnera ima paasisariaasutut nassuiarneqarpoq, inuiaqatigiinni pitsaanngitsumik aaqqissuussisoqarneratigut innarluut pilersinneqartarpoq. Assersuutigalugu atuakkanik atorniartarfimmut isaarissami majorallak pilersinneqarsimanngippat tamatumalu kingunerisaanik inuk kaassuartakkamik issiavilik isersinnaanani. Majorallaqaraluarpammi taava inuk kaassuartakkamik issiavilik iseriaannaasimassaaq. Atuarfimmiluunnit klassimi atuartut amerlapput, taava meeqqat ilaat ADHD-ilik atuarfimmi malinnaalluarnissaminut naleqqussakkamillu atuartinneqarnissaminut periarfissalutsinneqassaaq. Atuartulli klassini ikittunnguuppata, taava meeraq allatuulli atuartitsinermi malinnaalluarnissaminut immaqa periarfissaqarluarsinnaassaaq.

Inuiaqatigiinnut attuumassuteqartumik innarluummik oqariartaaseq

Inuit innarluutillit imatut nassuiarneqartarput, inuk, sivisuumik timimigut, tarnikkut, silassorissutsimigut, imaluunniit maluginnissinnaassutsimigut piginnaanikillisimappat, avatangiisit inuiaqatigiinnilu akimmiffiit assigiinngitsut sunneeqataanerisigut tamakkiisumik pisariitsumillu inuttulli allatuulli peqataasinnaanera.

Inuiaqatigiinni pitsaanngitsumik aaqqissuisoqarsimappat piginnaasakinneq peqqutigalugu (soorlu ADHD-eqaraanni) taava innarluuteqartutut misigisoqarsinnaavoq, naak innarluuteqartutut misigisinneqartariaqanngikkaluartoq. Inuit innarluutillit pisinnaatitaaffii pillugit isumaqatigiissut naapertorlugu Kalaallit Nunaanni inuiaqatigiinni tamat peqataasinnaanerat qulakkerniarlugu sulissutigineqartussaavoq.

Inuiaqatigiit peqataatitsisut tamanut inissaqartitsipput

Inuiaqatigiit peqataatsitsisut tassaasinnaapput, atuarfik imaluunniit suliffeqarneq inunnik innarluutilinnik ilinniartitsillunilu sulisoqarsinnaasoq. Meeqqat atuarfiani atuartitsineq meeqqanut innarluutilinnut naleqqussangaasinnaavoq. Sulisitsisoq sulisumut innarluutilimmut naleqqussakkanik suliakkiissuteqarneratigut suliffiup iluani aaqqissuussinermi peqataatitsisinnaavoq. Taamatullu peqataatitsiiarluni aaqqissuusiniarnerit paasinnilluarnissamik pisariaqartitsipput, inuup innarluutaanut tunngasunik aamma inuk innarluutillip pisinnaatitaaffii suunerinut tunngasunik. Kalaallit Nunaanni inuit innarluutillit pisinnaatitaaffiinut isumaqatigiisusmmi immikkoortoq –mi paasissutissiissutigissallugit pisussaaffeqarpoq, soorlu atuarfimmi ilinniartitsisunut ikiuutitut, sulisitsisunut aamma allanut pisariaqartitsisunut.

Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat

Kalaallit Nunaanni Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat 2009-mi augustip 24-anni atuutilersinneqarput. Isumaqatigiissummi Namminersorlutik Oqartussat imminnut pisussaaffilerput inuit innarluutillit naligiimmik periarfissaqartut pisinnaatitaaffeqartullu. Inuit innarluutillit pisinnaatitaaffii pillugit Nalagaaffiit Peqatigiit isumaqatigiissutaat pingaaruteqarluinnarpoq, tassami inuit innarluutillit allatuulli pisinnaatitaaffeqarnerat siuarsassallugu, illersussallugu aamma qulakkeermagu. Inuit innarluutillit pisinnaatitaapput inuiaqatigiinni allat naligalugit periarfissinneqarnissamut. Taamatullu Namminersorlutik Oqartussat imminut pisussaaffigilerpoq.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest