Inuit innarluutillit illersuisuat ilisimasallit Finlandimi ataatsimiinneranni peqataasoq

Christina Johnsen Nunani avannarlerni ministerit siunnersuisoqatigiivisa meeqqanut inuusuttunullu innarluutilinnut ilisimasalittut eqimattaliaasa Helsinkimi 2020-mi januaarip 14.-ani 15-anilu ataatsimiinnissaanut peqataassalluni angalavoq.

Ilisimasalittut eqimattaq Nunani avannarlerni meeqqanut inuusuttunullu innarluutilinnut ilisimasanik saqqummiussillutillu paarlaasseqatigiissapput, taamatullu meeqqat inuusuttullu peqataatinneqarnerannut ilisimasanik katersinermut aamma meeqqanut inuusuttunullu tunngatillugu ilimagineqarsinnaasunik paasissutissanik katersinermut immersueqataassallutik, paasissutissallu tamakku Nunani avannarlerni ministerit siunnersuisoqatigiivisa innarluuteqarnermut iliuusissatut pilersaarutaannut 2018-2020-mut atuuttumut ilanngunneqassapput.

Nunani avannarlerni atugarissaaneq pillugu centerip ilisimasalittut eqimattamut ilaasussanut tunngatillugu ujartuinerminni siammasissumik piginnaasaqarnissaannik aamma assigiinngitsunik pisariaqartitsisunik tunuliaqutaqarnissaannik pingaartitsisimapput. Aamma kattuffiit meeqqanik inuusuttunillu innarluutilinnik ilaasortallit ilanngukkusunneqarsimapput.

-Neriuppunga ataatsimiinnermit isumassarsilluarumaarlunga, Kalaallit Nunaanni meeqqat inuusuttullu innarluutillit qanoq iliornikkut inuiaqatigiinni pitsaanerusumik peqataatinneqarnerulersinnaanerannut aamma taakku pisinnaatitaaffii qanoq iliornikkut nukittorsarneqarsinnaanerannut tunngasunik, Christina Johnsen Finlandimut aallannginnermini oqarpoq.

Tunuliaqut

Nunani avannarlerni atugarissaarneq pillugu centerip ilisimasalittut eqimattap Helsinkimi ataatsimiinnissaat aaqqissuuppaa, taannalu Nunani Avnannarlerni Ministerit siunnersuisoqatigiivisa isumaginninnikkut peqqissutsimullu aqutsisoqarfiata ingerlataraa. Maannakkut ilisimasanik pilersitsisarput ilisimasallu tunngavigalugit Nunani Avannarlerni atugarissaarnikkut centerimiit politikkikkut suliassatigullu pitsanngorsaaatissanik siunnersuusiortoqartarluni.

Meeqqat inuusuttullu innarluutillit allat naligalugit peqataatinneqarnissaminnut pisinnaatitaaffeqarput, nunanili avannarlerni pissutsit taamaatsillugit taamaattoqanngilaq. Tamannalu avatangiisit tikikkuminaannerinit ilaatigut tunngaveqarpoq aamma inuit pisariaqartinneqartut piginnaasaqarluannginnerinik tunngaveqarluni, tamakkulu peqataasoqarluarsinnaassappat pisariaqartinneqarput.

Nunani avannarlerni ministerit siunnersuisoqatigiivisa meeqqanut inuusuttunullu komiteata (NORDBUK) Nunani avannarlerni atugarissaarnermut centeriat peqatigalugu una suliniut aningaasalersorpaat, nunani avannarlerni ilisimasanik misilittakkanillu avitseqatigiittarnerup nukittorsassallugu meeqqat inuusuttullu innarluutillit peqataatinneqarnerat aamma pitsanngorsassallugu. Tamakkiisumillu isiginnikkaanni meeqqat inuusuttullu pisinnaatitaaffiisa inuiaqatigiinnilu peqataatinneqarnissaasa nukittorsarneqarnissaat aamma anguniarneqarluni.

Ilisimasallit suliassaannut tunngasunik uani annerusumik paasisaqarsinnaavusi: https://nordicwelfare.org/da/projekt/barn-unga-och-delaktighet/

Inuit Innarluutillit illersuisuat Christina Johnsen oqaaseqartissagaanni attavissaq: cjo@tilioq.gl

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest