Immikkoortoq 16 – Nakuusernernut atornerlunneqarnermullu kikkut tamarmik illersugaasussaapput

Namminersorlutik Oqartussat isumagisassaraat inuit innarluutillit atornerlunneqannginnissaat nakuuserfigineqannginnissaallu angerlarsimaffimminni inuiaqatigiillu ataatsimut aaqqissuussaanerani inatsiliuunneqarlutillu maleruagassanik illersugaanissaat isumagissallugu.

Namminersorlutik Oqartussat pinaveersaartittussavaat inuit innarluutillit atornerlunneqannginnissaat, perssutagaannginnissaallu sulissutigissallugu. Tamanna pisinnaavoq ilaqutariit sulisullu ilinniartillugit inuit innarluutillit atornerlunneqarlutik persuttagaasimappata qanoq suleriaaseqartoqarsinnaaneranik qanorlu pisortanut nalunaaruteqartoqarsinnaaneranik ilitsersussallugit.

Namminersorlutik oqartussat pisussaaffigivaat inuit innarluutillit inissiisarfinni paqqinnittarfiusuni allanilu isumaginniffinni attuumassuteqanngitsumik nakkutilliisoqarnissaa inuit innarluutillit atornerlunneqarnissamut persuttagaasinnaanerannullu pinaveersaartitsisussanik.

Inuit innarluutillit arlaatigut atornerlunneqarlutik persuttagaasimappatalluunniit ikorfartorneqarlutillu ikiorserneqarnissaat Namminersorlutik Oqartussanit isumagineqartussaavoq.

Namminersorlutik Oqartussat arnat niviarsiaqqallu innarluutillit ajoquserneqarnissamut qaninnerusarneri immikkut sillimaffigisariaqarpaat.

Ilisimaviuk… Sulisut paaqqinnittarfinni pineqaatissinneqarmannginnemik allagartamik tamatigut ilaatigullu meeqqanik atornerluisimannginnermut uppernarsaammik takutitsisartussaanerat ilisimaviuk. Namminersorlutik Oqartussat immikkut illuinnartumik inuit innarluutillit inunnut allanut sanilliullutik eqqugaasinnaaneri qaninnerusarmat pinerlineqannginnissaat eqqumaffigissallugu pisussaaffeqarput.