Immikkoortoq 26 –Kikkut tamarmik nammineersinnaanissaq anguniarlugu ikiorneqarnissamik pisinnaatitaapput

Namminersorlutik Oqartussat isumagisussaavaat, inuit innarluutillit nammineerlutik inuunissaat siunertaralugu ikiorneqarlutillu ikorfartorneqartarnissaannik sulissuteqassallutik. Inuit innarluutillit tapersersorneqarlutik ikiorneqarnissamillu pisariaqartitsisut inuiaqatigiinni allanik isumalluuteqaratik inuunissaannut aqqutissiuunneqarnissartik pisinnaatitaaffigaat.

Taanna pisinnaatitaaffik, peqqissutsikkut, sammisaqartitsinikkut, ilinniagaqarnikkut inuttullu atukkatigut atuuppoq. Inuit innarluutillit taakku periarfissat immikkut ikiorserneqarnissamut kingusinnerusukkut nammineerlutik ingerlalualernissaannut pisinnaatitaaffigaat.

Namminersorlutik Oqartussat taamaattumik suliassaraat
– Inuit innarluutillit sapinngisamik piaartumik misissuiffigisarnissaat sumik pisariaqartitsinersut sunillu piginnaaneqarnersut sulissutigineqartassaaq.
– Inuit innarluutillit allatulli inuiaqatigiinni akuunissamut ikiorserneqarlutillu tapersersorneqarnissamik pisinnaatitaapput. Ikiorsiineq sapinngisamik inuup innarluutillip angerlarsimaffiata qanittuani pisassaaq. Inuit innarluutillit namminneq aalajangertassavaat ikiorserneqarusunnerlutik.
– Sulisut ikorfartortit allallu inunnik innarluutilinnik suliaqartut sapinngisaq tamaat qanoq ikiorsiinissamut ilinniartinneqartassapput.
– Inuit innarluutillit sapinngisamik namminersinnaanerat anguniarlugu ikiorsiissutit atortut assigiinngitsut ineriartortillugillu ilisimasaqarfiginissaat sulissutigineqassaaq.

Ilisimaviuk… 2018-imi Pissassarfik nuna tamakkerlugu innarluutillit sullissiviat ammarmat.  Pissassarfik ilinniagaqarneq aallaavigalugu ilitsersuinermik, siunnersuinermik atuartitsinermik, peqqissartinnermik eqaarsaartinneqarnermillu inuttut innarluuteqarnerit assigiinngitsut tamarluinnaasa ikiorsiiffiginissaanut neqerooruteqartarpoq.