Inuit innarluutillit tapersersorneqarnissaannut inatsisissaq tamanit peqataaffigineqarluni atuutilersinneqarnissaa pisariaqarpoq

Inuit Innarluutillit illersuisuat Christina Johnsen Inatsisartut Ilaqutariinnermut Peqqissutsimullu ataatsimiititaliaanik Nuummi ataasinngorpat apriilip 8-ani ataatsimeeqateqassaaq, ataatsimiinnermilu Inuit innarluutillit tapersersorneqarnissaannut inatsisissaq oqaluuserissavaat. Inuit innarluutillit illersuisuat ataatsimiititaliamut inuit innarluutillit tapersersorneqarnissaannut inatsisissap ataqatigiissaarluakkamik tamanut atuutilersinneqarnissaanik ingerlatsisoqarnissaanut siunnersuuteqarniassaaq.

-Inuit innarluutillit tapersersorneqarnissaannut inatsisissaq Inatsisartuniit siullermik suliarineqarnerani ataatsimiititaliami suliarineqartussatut ingerlateqqinneqarpoq. Tiliumit inatsisissap akuerineqarnissaa erinigaarput. Inatsisissaq inunnut innarluutilinnut allaanerusumik isiginnittariaaseqarpoq, tassami inuup innarluutaa inuiaqatigiit akimmiffiliaattut isigineqalissammat. Inatsisissaq inuit innarluutillit pisinnaatitaaffii pillugit naalagaaffiit peqatigiit isumaqatigiissutaannik aallaaveqarpoq, inuiaqatigiillu taamaasillutik pisussaaffeqalissapput inuit innarluutillit tamat naligalugit inuiaqatigiinni peqatanissaannut akimmiiffiit piiassallugit.

Inatsisissatut siunnersuummi §3 imatut allaqqavoq, inuk innarluutilik ataqatigiissagaasumik, ataqatigiissumik tamakkiisumillu isiginnittumik, inummut tunngasut tamaasa aamma inuup inuunera mianeralugit, tapersersorneqarnissaminut pisinnaatitaavoq. Tamannalu iluatsittumik piviusunngortinneqassappat Kommunini isumalluutit pisariaqartinneqartut pigisariaqarpaat.

-Inatsisip atuutilersinneqarnissaanut atatillugu kommunini aningaasaqarnikkut kiisalu inunnik sullissisussanik isumalluutinik piareersimasuuteqartariaqarput. Kommunini sullissisut inuit innarluutaannik ilisimasaat killeqarmata Pissassarfimmi sulisut ilisimasaannik atorluaasoqarsinnaangaluarpoq, oqartussallu suliassatut akisussaaffiinik erseqqinnerusumik agguataarisoqarnissaa pisariaqarluni. Kommunini suliassanik annertuunik naammassiuminaatsitaminnik maanna isumagisassaqareerput, inatsisissarlu atuutilerpat inuit suli amerlanerit tapersersorneqarnissaminnut pisinnaatinneqalissapput, inuillu pisariaqartitsisut inatsisissamik iluaquteqarnissaat qulakkeertariaqarparput.

Inatsisip atuutilersinniarneqarnerani inuit inunnik innarluutilinnik sullissisussat ilisimasassaannik piginnaasaqalernissaat isumagineqartariaqarpoq, aningaasallu pisariaqartinneqartut qulakkeerneqartariaqarput, sullissisussallu pisariaqartinneqartut atorfinitsinneqarlutik, tassami inuit tapersersorneqarnissaminnut pisariaqartitsisut amerlanerulertussaapput.

Kommunini immikkoortortat akimorlugit suleqatigiittoqarnissaa pisariaqarpoq, soorlu ilaqutariinnut inunnillu isumaginnittoqarfik, suliffeqarnermut immikkoortortat kiisalu Majoriaq minnerunngitsumillu Peqqinnissaqarfiup kiisalu Kommunip akornnani suleqatigiittoqartariaqarluni.

Kommunini suliassanik isumaginninnissamut piareersimasoqartariaqarpoq, inuit innarluutillit oqartussat akornanni sullinniarneqarneranni arsatut miloriunneqaqattaatarnerat pinngitsoortinniarlugu.

Christina Johnsen Nuummi ataasinngorpat nal. 11.30-p kingorna tusagassiortunit apersorneqarsinnaavoq. Inuit Innarluutillit illersortiata mobiltelefoniata nr. +299 55 19 50

Anders Meilvang NIIK-imi siulittaasoq uani attavigineqarsinnaavoq: +299 58 39 00

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest