Inuit innarluutillit tapersersorneqarnissaannut inatsisitaaq

Inatsisartut inuit innarluutillit tapersersorneqarnissaannut inatsisissatut siunnersuut juunip tallimaanni pingajussaanik suliaralugu akueraat. Tamannalu malunnartinniarlugu Tiliumi juunip arfernani innuttaasunut kaffillerpugut, kaaginik kissartunillu sassaalliuteqarluta.

Inuit innarluutillit tapersersornissaanut inatsisitaaq nuannaarutigisorujussuuarput, tamannami inuit innarluutillit pisinnaatitaaffiinik tunngaveqarpoq, inuit innarluutillit illersuisuaq Christina Johnsen oqarpoq.

Inatsisissatut siunnersuutip pingajussaanik suliarineqarnissaa tikillugu suliaqarluartoqarpoq. Tilioq inatsisissatut siunnersuummut 2018-imi novemberip aallartilaarnerani tusarniaasoqarnerani akissuteqaasiorpoq. Isumaginninnermut aqutsisoqarfiup aaqqissugaanik seminarertitsisoqarmat inunnik innarluutilinnut susassaqartut allat peqatigalugit aggersarneqarpugut, tassanilu periarfissinneqarpugut inatsisissatut siunnersuummut isummersuuteqarnissamut.

Inuit innarluutillit tapersersorneqarnissaannut inatsisissamik suliaqartoqarnerata nalaani suleqataanissamut periarfissinneqarluarsimavugut, inatsisissarlu 2020-mi januaarip aallaqqaataani atuutilissaaq.

Inatsisissap atuutilersinneqarnissaanut sulinermut periuserineqartussamut pissangavugut aamma aningaasanik naleqquttunik immikkoortitsisoqarnersoq pissangatsigaarput. Kommuninilu inunnut innarluutilinnut tunngasuni naammattunik sullissisussaqarnersut pissanngatigaarput.

Inatsisissami immikkut nuannaarutigaarput § 24, illersuisoqarnissamik tapersersorneqarsinnaanermik pisinnaatitaaneq. Taamatut aalajangiinermi neriuutigaarput, pitsaasutsimik, nakkutilliinermik aamma pisinnaatitaaffinnik qulakkeerinernik malitseqassasoq.

Suliaq pitsaasoq pingaaruteqartorlu inatsisitaarnikkut naammassivoq, suliaq aamma pingaaruteqartoq aallartinneqartariaqarpoq, tassa inatsisip nutaap malinneqarnissaa kiisalu inuit innarluutillit atugarisaat pitsaanerulernissaat.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest