Inuit pisinnaatitaaffitik ilisimanerusariaqarpaat

©Oline I. Olsen Allatseqarfik/ Sekretariat

Inuit Innarluutillit illersuisuata Christina Johnsenip Tiliumilu sulisut Kommune Kujallermut tikeraarnertik naammasseqqammerpaat, illoqarfinni Narsami, Nanortalimmi Qaqortumilu Nunaqarfinnilu Alluitsup Paani Narsarmijinilu savaatilinnilu marlunni, Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat pillugu sammisaqartitsisarlutik inunnillu ataasiakkaanit saaffigineqartarlutik angalanertik iluatsilluartumik naammassivat.

Narsarmijit, borgeraktivitet
©Oline I. Olsen Borgeraktivitet Narsaq

Tiliumit maluginiarneqartoq tassaavoq, inuit pisinnaatitaaffitik ilisimanerulissallugit pisariaqartippaat, soorlu kommunini sullissisunik naapitaqaraangamik, peqqinnissaqarfimmit sullinneqaraangamik, atuarfeqarfinnit sullinneqaraangamik pisortaniillu allanit, inunnut annertuumik innarluuteqalersimasunut tapersiisarnermut inatsit malillugu sullinneqarnermi pisinnaatitaaffiit ilisimanerusariaqarpaat. Kisianni aamma pisortanit sullinneqarnermi itigartinneqarsimatillutik maalaaruteqarfinnut periarfissat pillugit aamma qaammarsaavigineqartariaqarput kiisalu inuit innarluuteqartut pillugit isumaqatigiissummi pisinnaatitaaffinnut tunngasunik, tamannalu Kalaallit Nunaannit 2012-imi atuutilersinneqarpoq.

-Uannut pingaaruteqarluinnarpoq sutigut tamatigut inuit pisinnaatitaaffimminnik ilisimasaqarnerunissaat, tassami innuttaasut pisinnaatitaaffiit pillugit tamakkiisumik ilisimatinneqartanngillat. Inuit pisinnaatitaaffitik ilisimalluartuuppatigit, taava pisortanut pisinnaatitaaffiit atuutinneqarnissaat piumasarisinnaavaat, pisinnaatitaaffiillu sakkussaapput atugassarititaasunik pitsanngorsaaniaraanni, Inuit Innarluutillit Illersuisuat Christina Johnsen oqarpoq nangillunilu Kommune Kujallermiut tamaasa qutsavigai, Tiliumik tikilluaqqusimmata inuillu innarluutillit qanigisaasullu tatiginnillutik inuttut atukkaminnik oqaluttuarsinnaasimammata.

Inuit innarluutillit pillugit inatsisissamut piareersartoqartariaqarpoq

Inuit innarluutillit illersuisuata Christina Johnsenip inuit innarluutillit pillugit inatsisissap januaarip aallaqqaataani atuutilersinneqartussamut qilanaarpoq, tassani innuttaasoq periarfissaqalissaaq pisortanut saaffiginninnermini illersuisumik peqateqartarnissaminut.

-Illersuisoqarnermi pisinnaatitaaffiit malinneqartarnissaat qulakkeerneqarsinnaapput, innuttaasullu pisinnaatitaaffii pitsaanerusumik paasissutissiissutigineqarsinnalissapput, soorlu aamma suliami aalajangiussanut tunngatillugu maalaaruteqarfiusinnaasunut periarfissat paasissutissiissutigineqarlutik, Christina Johnsen oqarpoq.

Inuit Innarluutillit Illersuisoqarfiata Tiliup Kommune Kujallermi angalaarnermini inuit innarluutillit angerlarsimaffii, ataatsimoortumik najugaqarfiit, illersukkamik sannaviit, atuarfinni immikkut atuartitsiviit aamma kommunini sullissisut pulaarpaat. Kommunini inuit innarluutillit pillugit inatsisissamut piareersarluarneqarnissaat pisariaqartoq maluginiarneqarpoq.

©Oline I. Olsen Nanortalik dagtilbud

-Inuit innarluutillit pillugi inatsisissaq qaammatit sisamaannaat qaangiuppata atuutilersussaavoq, kommuninilu pisariaqartinneqarpoq inatsimmut piareersarluarneqarnissaq, Christina Johnsen oqarpoq. Inuit innarluutillit pillugit inatsisissami inuit innarluutillit ataqatigiissaangaasumik tamakkiisumillu isiginnittumik sullinneqartassasoq piumasaavoq, tamannalu pisortat assigiinngitsut ataatsimut inuk innarluutilik pillugu suleqatigiinnissaannut piumasaqaatitaqarpoq.

Kommune Kujallermi angalaneq pillugu nalunaarusiaq decemberip aallartinnerani saqqummiunneqassaaq.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest