Inuusuttut oqariartuutaat

Tilioq SUMH (Sammenslutningen af unge med handicap) suleqatigalugit iluatsilluartumik inuusuttunut novemberip ulluisa 14.-15.-anilu isumasioqatigiisitsivoq.  

Inuusuttut Nuummi najugaqartut qulingiluat kiisalu Danmarkimi SUMH-imi ilaasortat inuusuttut marluk ZOOM-ikkut isumasioqatigiinnermi peqataapput. Naapinnermi inuusuttuuneq innarluuteqarneq, allannguineq peqatigiinnerlu sammineqarput, soorlu aamma inuusuttut innarluuteqartut inooqataaniarnermikkut akimmiffigisartakkaminnik eqqartuipput, soorlu akimmiffiit inuiaqatigiinni, politikkerit aamma inuusuttut allat akornanni sammineqartanngitsut eqqartorneqarlutik.

Inuusuttullu eqqartukkatik aallaavigalugit social media aqqutigalugit oqariartuutissanik naatsukullannik, ersarissunik assinik videoliaaqqanillu suliaqartinneqarput. Suliarineqartullu saqqummersinneqaraangata ukua #Tiliyoung aamma #sumh hashtag-itut ilisarnaatigineqarput. Piffissamilu aggersumi Tilioq.gl-.imi aamma facebookimi Tiliop quppernerani SUMH-illu quppernerani saqqummersinneqarumaarput.

Nunani avannarlerni meeqqat inuusuttullu innarluuteqartut pillugit suleqateqarpugut, nunatsinnilu meeqqat inuusuttullu innarluutillit atugaat soqutigineqarlutik suleqatigisatsinnit apeqqutigineqartarput.

-Inuusuttullu naapisinneqarnerat iluatsilluarpoq, inuttut innarluutilittut pisinnaatitaaffitik paasisaqarfigivaat Isumasioqatigiinnermi pingaartinneqarpoq, SUMH-imi ilaasortanik napaitaqarnissaat aamma inuusuttut peqataasut innarluuteqarlutik atukkatik pillugit oqaloqatigiipput, inuusuttuullu ilinniagaqarnermi, tapersersorneqarniarnermi, inooqataaniarnermi akimmiffiit aammali piginnaasatik eqqartorpaat. Pilersaarutaavorlu upernaamut inuusuttunik isumasioqatigiisitsinissamik aamma aaqqissuusseqqinnissaq, tassa siunertaavoq inuusuttut naapillutik misilittakkaminnik eqqartuisinneqarnissaat aamma atukkatik pitsanngorsarniarlugit sunniuteqaqataarusussuseqalernissaat, inuit innarluutillit illersuisuat Christina Johnsen oqarpoq

Inuusuttut isumasioqatigiinnerat NAPA-mit aningaasaliiffigineqarpoq, Tiliumiit qutsavigaagut.

Assi toorlugu Tiliup facebookimi quppernera takuuk

Klik her