Isigiarsuttut aperaat: Kikkunnut inissialiortarpisi?

Hans Peter Larsen inissiami kaamisartakkanik atuisumut naatsorsuussami najugaqarpoq.
Isigiarsuttutut tamanna iluarinngilluinnarpaa

Hans Peter Larsenip #NIIKGIVEME 5 aamma qinersinermi paasissutissiinermut aviisi “Innnarluuteqartut pitsaanerusunik atugaqartariaqarput” peqataaffigai. 

Foto: Leiff Josefsen

Komminit inissiat innarluutilinnut naleqqussakkat nutaat tulluussimaarlutik oqaluttuarisarpaat.
Aap, ajunngilaq, innarluutilinnulli naleqqussagaappat? Kaamisartakkanik atuisunuinnangajak pitsorluttunullu. Uagummi?
Uagut taagamiuk 50-inik ukiullip Hans Peter Larseni inuppassuit allanik innarluuteqartut eqqarsaatigai. Innarluutaat
assigiinngitsorpassuupput, timikkut, malussaatikkut, eqqarsartaatsikkut tarnikkullu, inissiallu pineqartillugit ataatsimoortinneqassanngillat.

Nammineq Nuummi Nuussuarmi inissiami innarluuteqartunut nalequssakkamik taasami najugaqarpoq. Siorna marsimi
iserterpoq. Kajungernartinngikkaluarlugu nuuttariaqarsimasoq, inissiarmi naammaginartinngilaa.
– Illoqarfiup immikkoortuani tassani najugaqanngisaannarpunga, apussuarlu tikippara, taamaalillunga erngerlunga paasivara uannut ilungersunassasoq, oqaluttuarpoq.

Inissiaq innarluuteqartunut naleqqussagaagaluarpoq, Hans Petermuunngitsorli.
Inissiaq kaamisartakkanik issiavilinnut naatsorsuusaavoq. Kalaallit Nunaanni inissiat innarluutilinnut tulluarsakkat tamangajammik taamaapput.
– Oqartussaasut isumaqarput inuit innarluutillit taamaallaat kaamisartakkaniittartut. Taamaanngilluinnarpoq, oqarpoq.
Hans Peterip inigisaani igaffik appasippoq, peruruersartarfimmi asaffik appasilluni aamma taamatut perusuersartarfik.

Hans Peterli mikisuunngilaq. Ilami angisuujuvoq. Innarluuteqarporlu. Kisianniliuna kaamisartakkamik issiavimmik
atuisuunngitsoq. Isigiarsuttuuvoq tappeeqaluni. Inuit allat takusinnaanngilai. Qaamaneq soorlu qullermi silamilu
qaamanermeersoq takusinnaavai. Tupinnanngitsumillu inissiamut iserternissani nangaanartippaa. Kommunimilli
paasitinneqarpoq aqaguani nalunaarutigissagaa inissiaq piumanerlugu piumannginnerluguluunniit.

– Taamaattumik akuerivara, isumannaarniarlunga, angerlarsimaffeqanngitsunngornangalu, oqarpoq. Meeraalluni isiginiarnermik ajornartorsiuteqanngilaq, inuusuttuaraallunilu allanngoriartortoqartoq malugisinnaavaa.
1993-imi 23-nik ukioqarluni nakorsamit siunissami eqqanartoqarneranik paasitinneqarpoq tassalu tappiitsunngorsinnaasoq.

2017-imi inuit allat takusinnaajunnaarpai. – Taamaalillunga qujanartumik isuma inissisimanissaralu sungiunniarsaraara,
oqarpoq.

Isiginiarneqanngitsut
Hans Peter Larsen Maniitsumit kingoqqisuuvoq. Ukiuni marlunni taamanikkut arnaatinilu Danmarkimi najugaqarpoq,
2019-imi Nuummut nuulluni, innarluuteqartunut inissiamik tuneqartinnani ilaquttamini ikinngutiminilu najugaqarluni.
Isertermat iserternermullu misissuisoqarluni aperineqarpoq inissiami allannguisoqassanersoq.

– Soorunami igaffimmi nerriviit perusuersartarfillu taavakka, akineqarpungalu allanneqartoq immaqalu iluarsineqarumaartoq.
Ilisimasakipput, taamaattumik akiinnarpunga taava tamanna pisariaqassanngitsoq inissiamimmi nutaamik ujaasilereerpunga, oqaluttuarpoq.

Inissiamik innarluuteqartunut naleqqussakkamik nutaamik neqeroorfigineqarpoq. – Kikkunnilliuna naleqqussagaasoq? Kaamisartakkanik issiavilinnut isigisinnaasunullu. Igaffimmi iggavik kissakkasuartartuuvoq, atorsinnaanngilaralu,
taamaattumik qujaannartariaqarpunga, naak illoqarfiup qeqqani inissisimanera pitsaagaluartoq aqqusinermullu qanilluni,
majuartarfiit eqqaanni taxanit niusinnaallungalu isersinnaallunga, oqarpoq.

Maannakkut inigisaani isigiarsuttut tapiitsullu mianerineqarneq ajorput. Aputaajaasartunit allaallu blokkimi najugaqatinit.
Ineqartut allat kaamisartakkatik manioraavitsillu silatiminni inissittarpaat, taamaalilluni sukat nammineq matuminut ingerlasut kisillugit tikissinnaanagit.

Arlaleriarluni majuartarfiit eqqaani kaamisartakkamut aporpoq. Iluatsitsinerinnarmigut majuartarfikkut ammut nakkakattarsimanngilaq. – Ajornannginnerujussuussagaluarpoq assersuutigalugu namminerisannik isaariaqartuuguma,
oqarpoq.

Najoqartut allat pigisamik silatiminniititsisarnerat assuerinngilaa, inissiarsuarmi taakkununnga naatsorsuussaavoq –
kaamisartakkanik issiavilinnut isigisinnaasunut. Kisianni soorunami mianerineqannginnini katsussinnaasarpaa.
– Aammai allat errortaat manioraavinniittut attorusunngilakka, oqarpoq.

Ikiorneqarnissani isumalluutigigaa
Ullumikkut Hans Peter kommunimit inummik tapersersorneqarpoq qujamasuutigeqisaminik. Allanilli taama isumalluuteqartigineq sungiusimanngiinnarpaa. 2017-imi isigisaarukkami Danmarkimullu nuulluni nammineernissaminik
ilinniartinneqarpoq pisariaqartitaminullu ikiorneqarluni. Assersuutigalugu nammineerluni Nørrebromi isigiarsuttunut
ornittakkamukarsinnaavoq akunnerup aappaata affaanik pisulluni suliartorluni. Tassalu pisulluni, bussimik qimuttuitsunillu.
– Maani nammilerluunniit aqqusininnguamut ingerlasinnaanngilanga taxarniarlunga, oqarpoq.

Tapiitsunut qimmeqalernissaminik kommunimut qinnuteqarsimavoq. Tamanna Kalaallit Nunaanni misilinneqarsimagunanngilaq, taamaattumik sullissisua nalornivoq. – Sullissisoq oqarpoq, inatsit ima aaqqissuunneqarsimasoq qimmeqartoqarsinnaangnitsoq, depositumimillu akiliisoqartariaqarluni. Keermiaasiit aporfissat siulliullugit taaneqarput. Danmarkimi naammattarpoq ataasiarluni aperineq, taava suliaq aallartittarpoq, uangalu saaffigineqartarpunga arlaanik piareertoqaraangat. Maani pisortanut ilungersuasoqaqqaartarpoq. Ajoraluartumik.

Aammali tamanna sungiutiinnarsimavara, 1993-imi sullissisoqaleqqaaramali, oqarpoq, Kalaallit Nunaanni sullissisunit assigiinngitsunit arlaleriarluni aperineqarsimavoq, siusinaartumik suliunnaarnersiuteqalerusunnginnersoq.
Tamanna kissaatigisimanngisaannarpaa.

– Innarluuteqarluta inuusugut qanoq sullisissanerluta naluaat. Taamaattumik taakkununnga ajornannginnerpaavoq siusinaartumik suliunnaarnersiuteqalersissalluta, Hans Peter Larsen meeqqat angerlarsimaffiani tamakkiisumik sulisoq
oqarpoq.

Sisunaartumik suliunnaarnersiuteqarpat taammanngippalluunniit inuit innarluuteqartut tamarmik immikkut isiginiarneqassapput. Ilaat tarnimikkut innarluuteqarput, ilaat tappiitsuullutik, allat kaamisartakkanik issiaveqarlutik
ilaallu autismimik atugaqarlutik. – Maani nipaallunilu eqqissisimanaqaaq, taamaattumik immaqa autismertunut tulluarluni, oqarpoq.

– Kommunit innarluuteqartugut paasiniaaffiginerusinnaavaatigut innut ataasiakkaanut innarluuteqartunut inissiani sunik pisariaqartitsinersugut, oqarpoq.

 Inigisaq
 Ineqarnermut politikki peqataatitsinerusoq!
 Najugaqarfigerusutanni najugaqatigerusutakkalu peqatigalugit
 inissannik qulakkeerisoq.
 Namminerisannik inigisaqarsinnaanngikkuma inissianik illersukkanik naammattunik
 qulakkeerisoq.
 Ineqarnermut akiligassaq akissaqartitara.
 Napparsimalissagaluaruma, ajoquserlunga innarluuteqalerlungaluunniit
 inissiama allanngortinnissaanut tapersersuisoq.
 Namminerisannik inissaqarnissaanik periarfissiisoq.

Hans-Peter Larsenip ineqarnermut tunngasumik kommunimut qineqqusaartunut piumasaqaateqarluni oqariartuuteqarpoq. #NIIKGIVEME5 aamma uani: www.niik.gl/kommunalvalg-2021