Isumaginninnermut, Ilaqutariinnut Inatsisinillu Atuuttitsinermut Naalakkersuisumut allakkat ammasut

Inuit Innarluutillit illersuisuata Christina Johnsenip matumuuna Pitsaaliuinermut Isumagininnermullu Aqutsisoqarfimmut aamma Isumaginninnermut, Ilaqutariinnut Inatsisinillu Atuuttitsinermut Naalakkersuisumut ammasumik allakkiorpoq, Kalaallit Nunaanni tusilartunut ussersorlutillu oqaasilinnut aaqqissuussamik nutserisarfeqannginnera kingumut ajornartorsiutaanera pillugu erseqqissaaqqilluni.

Inuit Innarluutillit tapersersorneqarnissaat pillugu inatsimmi erseqqissumik allaqqasoqanngilaq, aamma nalunaarummi imaluunniit ilitsersuummi, taamaasilluni nalorninarsivoq kiap tusilartunut nutserisoqarnissaq isumagissaneraa, aningaasartuutigissagaa aamma qanoq pisoqarnerani nutserisumik periarfissaqartoqartassanersoq.

Inuit Innarluutillit tapersersorneqarnissaannut inatsimmut ilitsersuummi erserpoq, peqqinnissaqarfiup tusilartup misissorneqarnerani aamma uninngatinneqarnerani ussersorluni nutserisoqarnissaanut aamma akilerneqarnissaanut pisussaaffigigaa. ilitsersuummilu atuarfeqarfiup meeqqat innarluutillit atuartuutigissallugit naleqquttunik aaqqissuussinissamut pisussaaffeqartut allaqqavoq, tassa tusilartunut tutsarluttunullu nutserisoqartarnissaannut pisussaaffeqartut.

Tusilartut inuiaqatigiinni peqataaniarunik nutserunneqartariaqarput                                                                                        Tilioq Kalaallit Nunaanni tusilartunut nutserisoqarniarnermut qanoq aaqqissuussaqartoqarneranut tunngasunik Namminersorlutik Oqartussanut 2020mi maajimili apeqquteqaateqartarluni saaffiginnissuteqartaraluarpoq, Pitsaaliuinermut Isumaginninnermullu Aqutsisoqarfimmut innersuunneqaannartarluni. Arlaleriarluni akineqarnissamut tuavisaarisaraluarluni suli kinguneqanngilaq.

Inuit Innarluutillit inuiaqatigiinni allatuulli peqataanissaminnut pisinnaatitaaffeqarput, ussersorlutilli nutserisinnaasunik amingaateqarnerup kinguneranik inooqataaniarnermi peqataatinneqanngitsoortarput. Tusilartoq suliffissarsiornermi oqaloqatiginnissappat, imaluunniit tarnip pissussaanik ilisimasalimmik oqaloqateqassappat, arlaannilluunniit sunngiffimmi sammisassamut peqataassappat, kiap nutserisussaq isumagissavaa? Meeqqat atuarfianni ataatsimiisitsinermi atuartumut angajoqqaaq tusilartuuppat nutserisussamik kina periarfissaqartitsinissamut akisussaava? Ilaqutariit tusilartumik ilallit ussersorlutik oqaaseqalernissaannut kiap ilinniartinneqarnissaanut ikiussava?

Tilioq sullissisunik aamma tusilartunik attavigineqartarpoq, taakku ajuusaarutigisaqaat tusilartunut siunnersortit aamma tusilartunut atuarfik atorunnaarsinneqarsimammata. Sooruna nunatsinni 38-nik tusilartoqartoq aammali tutsarluttut amerlagaluartut tusilartunut siunnersortit aamma tusilartunut atuarfik atorunnaarsinneqartut? (Tusilartut amerlassusii Naalakkersuiut inuit annertuumik innarluutillit pillugit 2017-imi naatsorsuinerannit nassaarineqarput). Tusilartut kisimik nutserisussamik pisariaqartitsinngillat, taakkumi ilaqutaqarput, ataata, anaana, aanaakkut, qatanngutit, aappaqarput, meeraqarlutik minnerunngitsumillu aamma sulianik ingerlatsisut nutserisussamik pisariaqartitsipput imaluunniit ussersorlutik oqaaseqalernissaminnut ilinniartittariaqarlutik.

-Naalakkersuisut aamma Pitsaaliuinermik Isumaginninnermillu Aqutsisoqarfik saaffiginnissutinut akisannginnerat akuersarneqarsinnaanngilaq.

Akuersaarsinnaanngilarput nunatsini innuttaasoqaratta qanoq ikiorneqarsinnaanerminnik ilisimatinneqartanngitsunik. Nutserisoqarfik tunngaviusumik inuiaqatigiini peqataaanissamut ikiuutaasussaavoq pingaaruteqarluinnartoq, nutserisoqarfillu innuttaasunut tusilartunut tikikkuminarlunilu pissarsiariuminartuusariaqarpoq, Christina Johnsen oqarpoq nangillunilu

– Kalaallit Nunaata Naalagaaffiit Peqatigiit isumaqatigiissutaat atuutilersinnikuaat, tamannalu tunngaviusumik allannguisoqarnissaanik kiisalu pisinnaatitaaffinnik tamakkiisumik malinnikkumanermik ineriartortitsiumanermillu qulakkeerisussaavoq. Tassa inunnut innarluutilinnut atugassarititaasut pitsanngorsartuarlugillu ineriartortinneqassasut. Tusilartut eqqarsaatigalugit Tiliumiit isumaqarpugut, tusilartunut atuarfiup 2008-imi matuneraniit pissutsit arriitsumik ajorsiartuinnaavissimasut. Naalakkersuisut aamma Pitsaaliuinermut Isumaginninnermullu Aqutsisoqarfik kaammattorumavagut apeqqutigisartakkagut pillugit nassuiaateqassasut, tusilartunullu nutserisoqarnissaanut qulakkeerinissaq qanoq aaqqissuunneqassanersoq, taamaasillutik inuiaqatigiinni allatuulli inooqataanissaat qulakkeerlugu. Ilaqutaasut, qanigisaasut, sulisitsisut aamma suleqatit qanoq ussersorlutik oqaatsinik pisarialinnik ilinniartinneqarsinnaanerat ilanngullugu.

Kalaallit Nunaanni nutserisinnaasut aalajangersimasunik amerlassuseqarnissaat ussersorlutik nutserisoqarsinnaanermut apeqqutaanngilaq. Avataaniit attaveqarluni ussersorlutik nutserisinnaasut periarfissaapput, taakkulu nunatsinnut atuutilersinneqarsinnaallutik. Oqartussallu sinerissami sumiikkaluarunilluunniit ussersorlutik nutserisunik periarfissaqarsinnaapput.

Isumassarsiorfissaq:

Danmarkimi nalunaaruteqarput killeqanngitsumik ussersorlutik nutserisoqarnissamut, soorlu sulilernissamut oqaloqateqarnermi, kattuffinni ataatsimiinnermi, angajoqqaanut ataatsimiisitsinerni il.il. pisuni assigiinngitsuni ussersorlutik nutserisoqarsinnaapput.

https://www.dntm.dk/index.php/tolkebruger/hvad-kan-jeg-fa-tolk-til#tab-tidsubegraenset-tolkning 

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest