Isumassarsiorluni angalaneq: Ilisimasat attaveqaatillu allannguinermik pilersitsisarput

Februaarip aallartinnerani Inuit innarluutillit illersuisuat Christina Johnsen, inuit innarluutillit atugassarititaasa Inuit innarluutillit illersuisoqarfianit qanoq pitsaanerpaamik allannguiffigineqarsinnaanerinut pitsanngorsaavigineqarsinnaanerinullu tunngasunik isumassarsioriartorluni Danmarkimiippoq, inuit innarluutillit illersuisoqarfiani periusissianik suliaqarnermut atatillugu angalalluni, qanorlu sumiiffinni allani inuit innarluutillit atugassarititaat pitsanngorsarniarlugit suliaqartoqartarnera pillugu isumassarsiorfittut atorneqarluni. Angalanermi ilisimasaqarneq qitiutitsilersitsisarnera pitsaasumillu allannguuteqartoqartarnera qitiutinneqarluinnarput.

Ilaatigut Christina Qitiusumik inuit innarluuteqartut pillugit Siunnersuisooqatigiit ukiumoortumik ataatsimiinnerannut peqataavoq. Ataatsimiinnermi kommuninit assigiinngitsuninngaanneersut ataatsimeeqatigiittarput misilittakkanillu avitseqatigiillutik misilittagaqarnerulerlutillu. Christina isumaqarpoq, taamatut attaveqaateqalerneq pissarsinartoq, ukiumoortumik ataatsimeeqataanermini misigisani pillugit ima oqaasertaliivoq, “misilittakkanik avitseqatigiittarneq attaveqaateqarnerlu inuiaqatigiinni innuttaasunik nukissaqarluartitsilertarpoq, sammivimmullu eqqortumut politikerit saatsinneqarsinnaallutik”. ”Taamatut suliniuteqartarnerit Kalaallit Nunaanni isumassarsiorfigisinnaavavut,” taama isumaqarpoq. ”Inuit innarluutillit pillugit inatsisissami allassimavoq kommunit tamarmik inuit innarluutillit pillugit siunnersuisooqatigiinnik pilersitsinissaannik pisussaaffilerneqassasut. Neriuppunga, aammalu suliniutiginiarlugu, inuit innarluutillit pillugit siunnersuisooqatigiittunngortussat kommunini suliallit akuleriisillugit katerisinneqarnissaminnut misilittakkanillu avitseqatigiinnissaminnut periarfissinneqarumaartut.”

Ilisimasat qanorlu ilisimasaqalertoqartarneq, Danmarkimut angalanerup nalaani ullormut oqaluuserisassat ilagaat. Danmarkimi marloriarluni inuit innarluutillit suliffeqarniartinnerinut procentit, ilinniartitaanerisa qaffasissusaat, inuunerisa pitsaassusaat, peqqissusaat il.il. pillugit paasissutissaatinik kisitsisitigullu paasissutissaatinik katersisoqarnikuuvoq. Tassa imaappoq, inuit innarluutillit atugarissaarniarnerisa tungaatigut paasiniaasoqarsimavoq innuttaasunullu allanut sanillersuussisoqarsinnaalluni. Paasinarsivoq Danmarkimi ingammik suliffeqartitsiniarnerup ilinniartitaanerullu tungiisigut annertuumik assigiinngissuteqarujussuartoq. Inuit innarluutillit atugassarititaat pisinnaatitaaffiallu qanoq inissisimanerinik kisitsisit taakku piviusumik takussutissiipput. “Kalaallit Nunaanni tamakku kisitsisigiutiginissaat pisariaqartipparput!” Christina Johnsen ersarissaavoq. ”Taamaammat peqatigiiffinnik assigiinngitsunik ilisimasanik kisitsisinillu katersuinikunik, qanoq ililluta inunnik innarluutilinnut tunngasunik paasissutissaatinik Naalakkersuisut katersinissaannik qulakkeerinnittalernissaannut nukingisaarisinnaanerluta oqaloqateqarnikuuvugut, – tassami aamma Namminersorlutik Oqartussat taamaasiornissaminnut inuit innarluutillit pillugit isumaqatigiissummi pisussaaffilerneqarnikuupput.”  

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest