Kikkut tamarmik sumi najugaqassanerlutik aalajangiisinnaatitaapput!

§§§ Pisinnaatitaaffikka – Pisinnaatitaaffitit – Pisinnaatitaaffivut §§§

Tiliumit Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaanni immikkoortut sammiumavagut, taakkulu Kalaallit Nunaanni ilinnut uannullu qanoq isumaqarnersut itisilerlugit. Pisinnaatitaaffiit atuarlugit ilikkagaqarfigikkit.

Kikkut tamarmik sumi najugaqassanerlutik aalajangiisinnaatitaapput

Inuit innarluutillit allatuulli sumi najugaqassanerlutik aalajangernissaminnut pisinnaatitaaffeqarput. Namminerisaminnik najugaqarusunnerlutik, najugaqatigiiffimmi imaluunnit illersukkanik angerlarsimaffinni najugaqarusunnerlutik aalajangersinnaatitaaneq pisinnaatitaaffigaat. Soorlu inuit aamma nammineq aalajangersinnaatitaasut. Inuit innarluutillit pillugit isumaqatigiissummi immikkoortoq 19-imi tamanna aalajangersarneqarpoq- Kikkut tamarmik nammineq inuuneqarnissamut inuiaqatigiinnilu peqataanissaminnut pisinnaatiaaffeqarput.

Kisianni inuit innarluutillit inunnit allanit ikiorneqarnerunissaminnut pisariaqartitsisinnaasarput. Taamaanneranilu Kalaallit Nunaata pisussaaffigaa inuit innarluutillit periarfississallugit sumi najugaqarusunnerannik aalajangiisinnaalersissallugit. Soorlu aamma najugarisaanni eqqortumik ikiorserneqarsinnaanissaat pisussaaffigigaat. Sumiluunniit qanorluunniit najugaqaraluarpata ikiorneqarnissaminnut tapersersorneqarnissaminnullu pisinnaatitaaffeqarput.

Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat:

Kalaallit Nunaanni Inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat 2009-mi augustip 24-anni atuutilersinneqarput.

Isumaqatigiissummi Namminersorlutik Oqartussat imminnut pisussaaffilerput inuit innarluutillit naligiimmik periarfissaqartut pisinnaatitaaffeqartullu. Inuit innarluutillit pisinnaatitaaffii pillugit Nalagaaffiit Peqatigiit isumaqatigiissutaat pingaaruteqarluinnarpoq, tassami inuit innarluutillit allatuulli pisinnaatitaaffeqarnerat siuarsassallugu, illersussallugu aamma qulakkeermagu. Inuit innarluutillit pisinnaatitaapput inuiaqatigiinni allat naligalugit periarfissinneqarnissamut. Taamatullu Namminersorlutik Oqartussat imminut pisussaaffigilerpoq.

Nammineq najugaqalernissamut periarfissaqanngitsut

Tiliup Kommune Kujallermut angalanermik nalunaarusiaani najugaqarfissanik amigaateqarneq allaaserineqarpoq (Nalunaarusiaq atuaruk: https://tilioq.gl/wp-content/uploads/2019/11/Tilioq-Rejserapport-2019-ENDELIG.pdf )

Kommune Kujallermi angalanermi Tiliumit oqaloqatigineqarpoq inuk, kommunip najugaqatigiiffiutaani inisimasoq oqaloqatigigaa, taanna nammineq angerlarsimaffeqalernissaminik kissaateqaraluarpoq. Inuk nammineq aamma attaveqarfigisartagaata nalileraluarpaat namminerisaminik ineqalernissaminut naleqqukkaluartoq, taamaattorli nuuffigisinnaasaanik periarfissaqanngilaq. Tilioq Ilisimatinneqarpoq aamma inunnik innarluutilinnik angerlarsimaffinni najugaqartitsisoqartoq, naak taakku najugaqatigiiffinnut nuunnissaminnut piukkunnaateqaraluartut, tassanilu nammineernerullutik inuuneqarsinnaangaluartut.

Pissutsillu tamakku atuunnerisigut inuit innarluutillit aalajangersimasuni najugaqartariaqarnerannik kinguneqarput, tamannalu inuit innarluutillit namminerisaminnik inuuneqarnissaminnut aalajangersinnaannginnerannik ajornartorsiutinik pilersitsivoq. Kalaallit Nunanni arlalinnit inissaaleqineq ajornartorsiutigineqartarpoq, inuillu innarluutillit angerlarsimaffinni najugaqatigiiffinniillu allamut nuussinnaajunnaartutut inissillugit najugaqartinneqaraangamik inuiaqatigiinni peqataatinneqarnissamut periarfissaat killeqalersarpoq, tassami angerlarsimaffinni najugaqatigiiffinnilu toqqorlugillusooq inissillugit pineqalersarmata. Taamaattumik nammineq najugaqarnissamut aalajangersinnaatitaanerup malinneqarnissaa pisariaqarluinnarpoq.

Peqataatitsineq pillugu pisinnaatitaaffik nutaaarsiassami kingullermi allanneqartoq atuaruk https://tilioq.gl/kl/inuiaqatigiinni-peqatatinneqarneq-tamanna-nunatsinni-kikkut-tamarmik-pisinnaatitaaffigaat/.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest