Kommunit inunnut innarluutilinnut inatsisissamut piareersimappat?

Inuit Innarluutillit illersuisuat Christina Johnsen inuit innarluutillit tapersersorneqarnissaannut inatsisissaannut isumalluartupilussuuvoq taannalu inatsit qaammatit marluk qaangiuppata atuutilersinneqartussaavoq, inatsimmi atuutilersussami inuit innarluutillit pitsaasunik periarfissaqalissaput, soorlu aamma inuit innarluutillit pillugit isumaqatigiissummi tunngaviit inatsimmi malittarineqarumasut,  inuit innarluutillit inuttut naleqarnerat kiffaanngissuseqarnerallu ataqqineqassalluni.

-Neriuutigeqaarput kommunit inatsisip nutaap atuutilersinneqarnissaannut piareersimassasut, aamma inuit innarluutillit inatsimmi nutaami iluaqutissanik iluaquserneqarluarumaartut. Inatsimmi illersuisumik aaqqissuusisoqarnissaanut isumalluartorujussuuvugut, tassami ullut tamarluinnaasa innuttaasunit siunnersorneqarumasunik ilitsersorneqarumasunillu attavigineqartarpugut. Paasiumavarpullu nunatsinni kommunit aamma Naalakkersuisut inuit innarluutillit inatsisissaannut piareersarnerminni sumut killinnersut, uanilu Naalakkersuisut malittarisassanik aalajangiussaqarsimanersut illersuisussanik toqqaasarnissamut, ilinniartinneqartarnissaannut aamma aningaasarsiaqartinneqarnissaanut tunngasunik paaserusunnarpoq, Inuit innarluutillit Illersuisuat Christina Johnsen oqarpoq nangillunilu

-Ilisimaarivarput assigusunik aaqqissuinerit aallartinniarnerinut ajornartorsiortoqarnikuuvoq, aamma najortinik/illersuisunik aaqqissuussiniarneq aallarnisaanerlu sivisunikuuvoq, inuit innarluutillit illersuisuat Christina Johnsen oqarpoq nassuiaallunilu illersuisut pisariaqartinneqarluinnarmata, inuit innarluutillit kommuninut ikiorneqarnissamik aamma tapersersorneqarnissamik kissaateqarlutik saaffiginnikkaangata. Innuttaasunut, kommuninut pisortaqarfinnullu tamanut iluaqutaassaaq, innuttaasoq siusissukkut eqqortumik siunnersoqartalerpat.

Inuit Innarluutillit illersuisoqarfiat Tilioq innuttaasunit saaffigineqarluartarpoq, taakku kommunimi sullinneqarnerminni pisinnaatitaaffimminnik siunnersorneqarnissaminnut pisariaqartitsisarput, aamma kommunimi inuit annertuumik innarluutillit ikiorserneqartarnissaannut inatsit malillugu qinnuteqaatinik suliani aalajangiinernut naammangittaalliuuteqarsinnaanermut pisinnaatitaaffinnik, soorlu inunnut isumaginninnermi naammangittaalliuuteqartarfimmut kiisalu Ombudsmandimut tunngasut.

-Inatsisissamut oqaaseqaatini allassimavoq, inuit innarluutillit 1400 missaanniittut affai illersuisumik pisariaqartitsisinnaajumaartut. Tilioq isumaqarpoq, tamavimmik illersuisoqarnissamik neqeroorfigineqartariaqartut, qanorluunniit ilaqutaasut qanigisaasullu taamatut atuuffeqarsinnaanerannik ilimasuttoqartigigaluarpat. Aamma ilisimavarput kommunini meeqqanut illersuisut meeqqanut inatsit naapertorlugu pilersinniarneqarneri sivisulaartumik ingerlanneqartut, taamaattumik siusinaarluta akimmisaarfiusartut iliuuseqarfigisariaqarpagut, inuit innarluutillit inatsisissaat naapertorlugu illersuisussanik atorfinitsitsiniarneq inatsisissaq malillugu piaartumik aaqqissuteqarfigineqarniassammat, tamannalu aamma tusarniaanermut akissutigisatsinni tikkuareerparput, Christina Johnsen oqarpoq.

Inuit innarluutillit illersuisuat Christina Johnsen attavigineqarsinnaavoq uunga +299 34 50 91 imalt. uani info@tilioq.gl

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest