Najugaqarfik Elisibannguaq innarluutilinnut utoqqalisunut nalequkkukkunnaarluinnar- poq

Maniitsumi inunnut innarluutilinnut najugaqarfik Elisibannguaq inunnut innarluutilinnut utoqqalisunut naleqqukkunnaarluinnartoq nutaamik illutaartariaqalerpoq.

Allattoq: Oline Inuusuttoq Olsen, Informationsmedarbejder Tilioq

Maniitsumi eqqarsartaatsimikkut innarluutillit najugaqarfiat Elisibannguaq 1991-imili ingerlanneqalerpoq. Tamaani eqqarsartaatsimikkut innarluutillit 18-ileereersimasut najugaqarput, Elisibannguup najugaqarfittaani 12-inut inissaqarpoq, immikkoortortaqarfimmi Ukaliusami tallimat Sikkernermilu sisamat inissaqartinneqarlutik. Najugaqarfiit Elisibannguaq Sikkernerlu eqqarsartaatsimikkut innarluutilinnut naleqqukkunnaavipput. 

– Illumut qaqqajunnannguamiittumut majuartarfippassualimmut naliginnaasumik angerlarsimaffittut sanaajusumut 1971-ernisamut 1998-imi nuunnikuuvugut, taava ukiut ingerlanerini najugaqartuutigut utoqqaliartornerini malunnaramik ilaatigut aamma noqartarnermikkut iisartarissaaraluarlutilluunniit, ilaatigut toqqissisimajunnaaraangamik noqarsinnaasarneri tunngavigalugit, ernumagisartangarinikuuara utoqqalipanneriunissaat, Elisibannguami pisortaq Ane B. Jensen, oqarpoq nassuiaallunilu Sikkernermi najugaqartut pitsorluttuummata tummerarparujussuakkullu majuaraangata ikiorteqartariaqartartut.

– Pitsorluttut timimikkut utoqqaliartorneranni nangiartut sulisunit marlunnit pingasunit tunuaniit paarineqaqqissaarlutik, nivinnginniassammata majuartariaqartarput, Ane B. Jensen oqarpoq.

Immikkoortortaqarfik Ukaliusaq utoqqalisunut paaqqutarineqarnissaminut pisariaqartitsisunut immikkoortortaavoq 2010 naammassilluni atorneqalersoq, tassani inuit eqqarsartaatsimikkut innarluutillit utoqqalisut inuppassuillu akornanniissinnaanngitsut najugaqartinneqarput.

Najugaqarfiilli marluk Elisibannguaq aamma Sikkerneq najugaqartunut naleqqukkunnaarluinnarput. Noqartoqannginnissaat anguniarlugit kiisalu eqqarsartaatsimikkut innarluutillit pisariaqartitaat naapertorlugit sulisut ullormut pilersaarusiorluaqqissaartuartarput.

– Taamaattumik ulluinnarput aaqqissuulluartarparput, aaqqissuulluaqqissaagaavoq tamakku pinaveersaarniarutsigit, kisianni illu Sikkerneq, taanna tulluanngilluinnarpoq. Aamma nutarterneqaqqissinnaannginnami taamaallaat aserfallatsaaliuinnarneqarsinnaagami, Ane B. Jensen oqarpoq.

Inuit innarluutillit utoqqalipput

– Najugaqartuutivut amerlanerit Danmarkiminngaanniit tigusarinikuuavut, Sungiusarfik Ikinngummiillu ukioqqortusisut tigunikuuagut, tassa imaappoq uagut najugaqarfipput nunatta oqaluttuarisaanera eqqarsaatigigaanni ukiut 40-t missaannaani inunnik innarluutilinnik sullissisoqarnikuuvoq. Siornatigut Danmarkimut aallartinneqartarnikuuneri pillugit, ullumikkut nunatsinni siullerpaajulluta ataatsimoortunik eqqarsartaatsimikkut kinguarsimasunik sullissivugut Maniitsumi, Najugaqarfik Elisibannguami pisortaq Ane B. Jensen oqarpoq, nangillunilu najugaqartut innarluuteqartuusut maanna utoqqalisut.

Elisibannguami najugaqartuni utoqqaanerpaaq maanna 72-inik ukioqarpoq. Najugaqarfik Elisibannguami pisortap Ane B. Jensenip erseqqissaatigaa inunnik innarluutilinnik utoqqalisunik pitsaasumik sullissiniarunik illumik najugaqarfissamik nutaamik pisariqartitsillutik ukiorpaalunngulertuni qullersanut oqariartuutigisarlugu.

– Elisibannguassamik nutaamik sanasoqartariaqartoq qullersaqarfimmut politikerinullu piumasaqaatigisarnikuuarput, ukua utoqqaliartortut timimikkut ilaatigut allaniit utoqqalipallannerusussat soorlu noqartartut eqqarsaatigalugit, taakkua siunissami iluamik sullisissagutsigit, aamma uagut immikkut pikkoriffigerusukkatsigut eqarsartaatsimikkut kinguarsimasut utoqqalisut, taakkua eqqarsaatigalugit qinnuteqaqattaarnikuuvugut, Ane B. Jensen nutaamik illutaartariaqalernermik qinnuteqartuarneq pillugu oqarpoq.

Najugaqarfiit allatut siunertanut qanga sanaajupput.

Najugaqarfik Elisibannguaq 1979-imi specialkostskoletut atulerpoq, illutaa betonimik sanaajuvoq ungbotullu pilersinneqarpoq, kingorna specialkostskolenngorluni. Politikkikkut 1991-imi aalajangerneqarpoq inunnut innarluutilinnut najugaqarfittut Elisibannguaq atulissasoq, Aasiannilu Ado Lyngep atuarfia atulersinneqassasoq. Nunatsinnit Danmarkimi inuit innarluutillit najugaqartinneqartut angerlartillugit taamani nuusinneqarput.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest