Innarluutinga ersinngitsoq

NIIK aamma Tilioq suleqatigiillutik ersinngitsunik innarluuteqarneq pillugu paasisitsiniaalerput

 

Aajuna Anders Meilvang NIIK-imi siulittaasoq aamma Inuit Innarluutillit Illersuisuat Christina Johnsen Washington D.C.-imi ataatsimiinnermi naapittut.

 

Nunatsinni Inuit Innarluutillit Kattuffianni NIIK-imi Siulittaasoq Anders Meilvang, inuit innarluutillit allatuulli inuuneqarsinnaatitaasariaqartut oqarpoq.

 

-Tamannalu tassa aatsaat pisinnaavoq inuiaqatigiit soqutiginnillutik peqataatitserusussuseqarlutillu aaqqissuunneqarpata. Taamaattoqassappallu annerusumik paasisimasaqarnissaq ilisimasaqarnissarlu pisariaqarpoq. Paasisitsiniaalluni videoliani takutinniarneqassapput, ersinngitsunik innarluuteqarnerit assigiinngitsorpassuusinnaasut aamma inuit innarluutillit inuttulli allatuulli assigiinngitsorpassuusinnaammata. NIIK-imiit neriuutigaarput uani suliniummi inuit innarluutillit qitiusumik inuiaqatigiinni pingaartinneqalerumaartut. Aammali neriuutigaarput inuit innarluutillit allat inuunertik aamma anguniakkatik pillugit sassarlutik oqaluttuarsinnalernissaannut uku paasisitsiniutissat kaammattuutigissagaat, Anders Meilvang oqarpoq.

 

NIIKimiit aamma nuannaarutigineqarpoq Tilioq suleqatigisinnaagamiuk, soorlu aamma Namminersorlutik Oqartussat suliniummut aningaasaliuumammata.

-Inuiaqatigiit inuit innarluutillit assigiinngiiaaqisut pillugit annerusumik paasissutissiiffigisarneratigut inuit pigiliutiinnakkamik isiginnittariaasiat allanngortissavarput. Tiliumit misissuinitsinni nutaanerpaami paasivarput inuiaqatigiinni inuit ersinngitsunik innarluutillit suli pitsaanerusumik pissuseqarfigisariaqarivut. Imatut paasisitsiniaalluni suliniuteqarneq pingaaruteqartorujussuuvoq, tassami inuit ersinngitsunik innarluutillit qanoq pissuseqarfigineqartarusunnerlutik kiisalu qanoq paasineqartarusunnerlutik namminneq oqariartuuteqarfigissavaat, Inuit Innarluutillit Illersuisuat Christina Johnsen oqarpoq. 

Ersinngitsumik innarluutinga pillugu videoliat inunnut innarluutilinnut sapaatip akunneqartitsinermi saqqummersinneqarnissaat naatsorsuutigineqarpoq. 

Filminik assiliisartoq Dennis R. Ingemann inunnik assigiinngitsunik ersinngitsunik innarluutilinnik Sisimiuni, Nuummi aamma Qaqortumi assiliilluni maanna sulileruttorpoq. Videot inunnut innarluutilinnut sapaatip akunneqartitsinermi uge 41-mi saqqummersinneqassapput.

 

Nunatsinni Inuit Innarluutillit Kattuffiata nittartagaani www.niik.gl    Kattuffik pillugu annerusumik paasisaqarit. 

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest