Inuit innarluutillit illersuisoqarfia Tilioq Qaqortumi ulloq unnuarlu angerlarsimaffimmi pisoq ajorluinnartoq pillugu ilisimatinneqarpoq. Pisoq alianarluinnarpoq tamaattoqarsimassussanngikkaluarporlu. Niviarsiannguamut qanigisaannullu, sunnerneqartunullu tamanut ajorluinnarpoq.
- Suliap ilungersunartup takutippaa arlalitsigut kukkuluttortortoqarlunilu sumiginnaasoqartoq, naak taakku arnap pineqartup inatsisitigut illersugaaneranik, isumannaatsuunissaanik, ataqqinassusaanik kiisalu pinngitsaalineqarnissaanut illersuisussaagaluartut. Taama pisoqarsinnaasussanngikkaluarpoq.
Suliaq pinerliineruvoq. Pissusissamisoorpoq suliaq politiinit, naalakkersuisunit naalakkersuisoqarfimmiillu pimoorunneqarluni suliarineqalermat, piaartumillu iliuuseqarmata. Tiliumiit Ilaqutariinnut naalakkersuisoqarfik aamma Isumaginninnermut aqutsisoqarfik qinnuigaavut qulaajaaqqullugit, qanoq iliuuseqartoqartarneranik, iliuusissanik kiisalu malittarisassanik soqarneranik nassuiaaqqullugit, kinguaassiutitigut atornerluisoqartannginnissaa anguniarlugu. Tassa ulloq unnuarlu angerlarsimaffinnut aamma kommunini najugaqarfissianut tunngatillugu.
Meeqqat arnallu innarluutillit aarlerinartorsiornerusarput
Nunarsuaq tamakkerlugu meeqqat arnallu innarluutillit innarluuteqanngitsunut sanilliullugit kinguaassiutitigut atornerlunneqarnissamut marloriaammik pingasoriaammilluunniit aarlerinartorsiornerusarput. Inuit innarluutillit timimikkut aamma tarnimikkut persuttagaanissamut imaluunniit kinguaassiutitigut atornerlunneqarnissamut aarlerinartorsiornerusarput.
Aamma takornartaanngilaq nunatsinni ulloq unnuarlu angerlarsimaffittut aaqqissususani atornerluisoqartarnera. Tiliumut saaffiginnissutigineqartartut tamakkiisut isigissangaanni taava pingasut, najugaqatigiiffinni kinguaassiutitigut atornerluisoqarneranut tunngasumik qanoq iliuuseqartoqarnissaanut apeqquteqartoqarluni saaffiginnittoqartarnikuuvoq. Pisinnaatitaaffiit pillugit siunnersuisarnermi politiinut ingerlatitseqqiineq, sakkortusisamik nalunaaruteqartussaatitaaneq naapertorlugu nalunaarutiginninnerit kiisalu eqqortumik maalaarfissanut siunnersuinerit pisarsimapput.
Pinaveersaartitsinerit pillugit iliuusissat tigussaasut amingaataapput
Mimi Karlsenip najugaqartut allat taamatut pinerlineqarsimanersut misissuiffigalugu ilisimatitsivoq, tamannalu pissusissamisoorpoq, paasiniassallugu nunatsinni ulloq unnuarlu angerlarsimaffinni kinguaassiutitigut atornerluinerit qulaajassallugit.
- Isumalluutigineqartut maannamut tamaviaartinneqarput, sulisussaaleqisoqarpoq, avatangiisinut sinaakkutinut aningaasaliisarnerit annikipput aamma aningaasaliissutit amingaataapput. Uani pisumi, ersarippoq meeqqanut aamma arnanut innarluutilinnut kinguaassiutitigut innarliisarnerit pinaveersaartinniarlugit iliuuserineqartartussat, periutsit aamma pinaveersaartitsinerit pillugit paasissutissat tigussaasut amingaataammata.
Inuit innarluutillit Kalaallit Nunaanni ikinnerussuteqartut annersaraat, taakkuuppullugu pinaveersaartitsilluni suliniutini ilanngunneqajuitsut, soorlu Killiliisami, imigassamik aanngajaarniutinillu katsorsaanermi aamma imminut toqunnissaq pinaveersaartinniarlugu suliniutini. Naak pineqartut tassaakkajuttut aningaasaqarnermikkut inooqataaniarnermikkullu immikkut aalerinartorsiornerpaajusartut.
Politikkikkut iliuuseqartoqartariaqarpoq
Piffissanngorpoq nunatsinni qinikkat eqqarsaqqinnissaannut, suliniutini maanna ingerlasuni inuit innarluutillit qanoq ilanngunneqartarnerat qulakkeerneqarnersoq. Inuit ulloq unnuarlu angerlarsimaffinni najugaqartut amerlanertigut imminnut ikiorsinnaasanngillat, atornerluisoqartannginnissaalu pinaveersaartinniarlugu qularnaatsunik minnerpaamik periutsinik iliuusissanillu pilersitsisoqartariaqarpoq, taakkununngalu aamma aningaasat isumalluutillu pisariaqartinneqartut tunniunneqartariaqarlutik. Tiliumi pisinnaatitaaffiit pillugit siunnersuisarnissarput naapertorlugu innersuussutigissavarput, isumaginninnermut aqutsisoqarfik iliuusissanik, periutsinik aamma malittarisassanik pilersitsisariaqartut, inuit innarluutillit ulloq unnuarlu angerlarsimaffinni najugaqartut atornerlunneqartannginnissaat siunertaralugu.
Akuersaarneqarsinnaanngilaq, arnaq annertuumik innarluutilik, oqalussinnaanngitsoq qanoq ingasatsigisumilluunniit nassuianeqarsinnaanngitsumik kinguaassiutitigut atornerlunneqartarnera paasineqanngitsoorsimammat. Tamatumalu kingunerisaanik naartunera paasineqanngitsoorluni tallimanngormat ernimmat. Neriuutigilluinnarpara arnaq suliaminnut ilisimasalinnit kiisalu immikkut ikiorserneqassasoq, aamma erloqinartumik atugaqartinneqarsimanera annertuumillu innarluuteqarnera eqqarsaatigalugit sulisoqassasoq. Tiliumiit arnaq pineqartoq ilaqutaasullu misiginneqatigaavut.
Ila taamaattoqarsimasussaanngikkaluarpoq. Taamaattoqaqqinngisaannassaaq. Inunnut isiginnittariaaseq naleqartitallu pineqarput. Politikkikkut taamatut pisoqaqqinnginnissaa qulakkeerniarlugu qanoq pisoqarniarpa?
