Kalaallit Nunatsinni angutinut sungiusaasoq Morten Rutkjær aamma Danmarkimi angutinut nunanut allanut unammisartunut sungiusaasoq Kasper Hjulmand meeqqat cerebral paresemik (CP), assigiinngitsunik qaratsamikkut nukillaarnermik atugaqartut, Frederiksbergimi nunanit tamanit arsaannermi unammiuaaqatigiinneranni sapaatip akunnerata naanerani pulaarput. Niviarsiaqqat nukappiaqqallu Englandimiit, Irlandimiit, Norgemiit, Kalaallit Nunatsinniit aamma Danmarkimiit 100-t missaaniittut peqataapput.
Kalaallit Nunaanneersoq Arn Inuk Hynne Nielsen 14-nik ukiulik peqataavoq, Arn Nuummi inunngorpoq Sisimiunili najugaqarluni. Kalaallit Nunaalli suli CP-mik imaluunniit meeqqanut CP-mik atugaqartunut aaqqissuussasumik arsaattartoqatigeeqanngilaq. Arn SAK-mi arsaattarsimanini nuannarinikooqaa. Arn Inuk KB-mi aamma CP-mi nunanut allanut unammisartuni piginnaasalinnut arsaqataasarpoq. CP, Nunanut allanut unammisartut aamma CP, piginnaasallit arsaattartut Naalagaaffeqatigiinnit, aamma inuusuttunit Nunatsinneersunit Savalimmiuneersuniillu peqataaffigineqartarpoq.
Arn Inuk Inuit innarluutillit pillugit oqaaseqartartup Anja Hynne Nielsenip erneraa, taannalu ima oqarpoq: ”FNp innarluutillit pillugit isumaqatigiissutaani allaaserisaq 30-mi allaqqavoq kikkut tamarmik timersornermut, kulturikkut sunngiffimmilu sukisaarsarfinniissinnaatitaasut – tamanna Kalaallit Nunaata aamma Danmarkip qulakkeertussaavaa. Kisianni Kalaallit Nunaanni aamma Danmarkimi meeqqat CP-mik atugaqartut isikkamik arsaannermi neqeroorutinik soqarpianngilaq. Unammiuaartoqartussanngormat nunanut allanut sungiusaasoq saaffigisimavara, soorluttaaq aamma Tiliup GIF inuit piginnaanikillisimasut timersornerup silarsuaani pitsaanerusumik amerlanerusunillu pilersitsisoqarnissaa suleqataaffiginiarlugu saaffigisimavaa. Tamanna aamma 2022-mi ataatsimeersuareernerup kingorna saqqummiunneqarsimasumi Leave No One Behindimit tunngaveqarpoq kiisalu aamma ukioq manna ataatsimeersuarnermi, inuk qitiutillugu ukkatarineqartumi, tamatumani nammineq inuuneqarsinnaatitaanermik ukkassisumit, aallaaveqarpoq – tamatumani aaqqiissutit peqataatitsinissamillu aaqqiissutit ukkatarineqarsimapput – aamma timersornerup ataatsimoornerullu silarsuaanni.”
Aappaagu meeqqat Savalimmiuninngaanneersut unammiuaarnermi peqataassapput neriuutiginarporlu Kalaallit Nunatsinniit meeqqat CP-mik atugaqartut amerlanerit aamma Football Festivalimi Bristol-imi 2024-mi aggustip aappaaniit sisamaat ilanngullugu pisussami peqataasoqarumaartoq.
Kalaallit Nunaanni nunanut allanut sungiusaasoq Morten Rutkjær, Tilioq aamma Kasper Hjulmand
Kalaallit Nunaanni inuit piginnaanikillisimasut arsarnermik pitsaanerusumik periarfissaqalernissaat pillugit
suleqatigerusuppai. Taanna ima oqarpoq: ”Meeqqat CP-mik allatigullu piginnaasakillisimasut ataatsimut isigalugu arsartalernissaminnik periarfissaqarpallaanngillat, tamanna aamma Kalaallit Nunaanni atuuppoq. Ukiuni tulliuttuni tamanna nunanut allanut sungiusaasutut Kalaallit Nunaanni allanngueqataaffigerusuppara. Taamaattumik ullumikkut unammiuaarneq nunanut allanut sungiusaasoq Kasper Hjulmand peqatigalugu tapersersuinerput takutinniarlugu pulaarpugut kiisalu inuit CP-mik atugaqartut pitsaanerusumik periarfissaqarsinnaanerannik isumassarsiorfigerusupparput, aamma arsarnerup silarsuaani.”
Kasper Hjulmand aamma DBU pulaarnerminni naatsumik isiginnaagassaliorput, taannalu uani takusinnaavat:
Elsass Fonden, Nuummi 2021-mi ataatsimiisitsivoq, unammiuaarnermilu pingaarnertut aningaasaliisuuvoq. CP pillugu uani paasisaqarnerusinnaavutit:
https://elsassfonden.dk/sportforbrains/viden/hvad-er-cerebral-parese/
