Piffissaq eqqorluarlugu nuna tamakkerlugu iliuusissatut pilersaarusiortoqalerpoq

Tiliumit nuannaarutigaarput inuit innarluutillit tapersersorneqarnissaannut inatsisissatut siunnersuut ataatsimiittialiamut suliassatut ingerlateqqinneqarmat, qaammallu una naalerpat inatsiartunit aappassaanik suliarineqarnissaminut piariissammat. Inatsisissatut siunnersuut ajunngeqaaq, kusanarluni, angusaqarluarniartuulluni Naalagaaffiit Peqatigiillu inuit innarluutillit pisinnaatitaaffii pillugit isumaqatigiissutaannik aallaaveqarluni.

Inatsisissarlu akuerineqarluni atuutilersinneqarpat, kisimiissinnaanngimmat aamma iliuusissatut pilersaarusiortoqartariaqarpoq. Inuiaqatigiit peqataatinneqartariaqarput, inuiaqatigiit tamakkiisumik isigalugit iliuusissatut pilersaarusiorfigisariaqarpagut, inuit innarluutillit pisinnaatitaafffii pillugit Naalagaaffiit Peqatigiit isumaqatigiissutaat aallaavigalugit suligaanni tamanna qulakkeerneqassammat.

Inatsisartuni aalajangiiffigisassatut siunnersuut (immikkoortoq 48) takullugu nuannaarutigaarput, taamatummi Naalakkersuisunut kaammaattuutigineqarpoq kingusinnerpaamik UPA 2020-mi inuit innarluutillit pisinnaatitaaffii pillugit Nalaagaaffiit Peqatigiit isumaqatigiissutaasa atuutsinneqarnerisa qulakkeerneqarnissaannut nuna tamakkerlugu iliuusissatut pilersaarummik saqqummiussaqassasut.

Nuna tamakkerlugu iliuusissatut pilersaarusiornissami politikki akimorlugu siunissaq ungasinnerusoq eqqarsaatigalugu Tiliumit siunnersuuteqarnissamut ikiuerusuttorujussuuvugut, soorlu ukua:

  • Inuit innarluutillit immikkoortinneqartarnerannik inerteqquteqarluni inatsit
  • Sanaartornermi maleruagassat nutaat tamanut iserfigineqarsinnaasunngorlugit illiuliortitsertoqartarnissaanik ilalik,
  • IT, TV teknologimillu periarfissat allat eqqarsaatigalugit tikikkuminarsaaneq atoruminarsaanerlu
  • Kommunini, ilinniarfinni, suliffeqarfinni aamma inuiaqatigiinni inunnut innarluutilinnut tunngasunik akulikitsumik misissuinerit/nalilersueqqinnerit aamma nalunaarusiat
  • Kalaallit Nunaanni inuit innarluutillit pillugit naatsorsueqqissaarinermi databaseqalernissaq
  • Inunnut innarluutilinnut isumaliortaatsit pigiliutiinnakkat qaangerniarlugit peqataatitsiniarlunilu paasisitsiniaanerit
  • Inunnut innarluutilinnut ilinniarfissatut neqeroorutit aamma periarfissat amerlanerit
  • Inunnut innarluutilinnut suliffissat amerlanerit aamma nikerarsinnaasumik sulisitsisinnaanerit
  • Ilanngaatit qaffasinnerusut imaluuniit isumaginninnermi frikorti, inuit innarluutillit arlariinnik suliffeqalersinnaaniassammata aningaasaqarnikkullu pillaatisiarinagu, ilutigisaanillu inuiaqatigiinni peqataatinneqarnerulerlutik
  • Tamanut peqqinneruneq. Inuit tarnikkut nappaatillit/napparsimasut piffissaq eqqorlugu nakorsiarnissaannut qanoq iliuuseqarutta qulakkeersinnaavarput?
  • Attaveqaqatigiinneq ataqatigiissoq, inuit innarluutaannik aamma pitsorluttut eqqarsaatigineqarlutik angallannermi pissutsit atuuttut naleqqussarlugit.

Inuit innarluutillit pisinnaatitaaffiisa atuutsinneqarneri qulakkeerniarlugit tamakkunatigut iliuuseqarsinnaavugut, inuiaqatigiinnilu tamat naligalugit inooqataasinnaapput. Maannatut pissutsit isikkoqartillugit, soorlu ilaanni aatsaat naalaatsornerinnakkut inunnut innarluutilinnut tunngasuni pisoqartarpoq. Malitassanik anguniagassanillu pisariaqariaqartitsivugut, taakkulu partiit kikkuungaluarnersulluunniit akimorlugit aamma nunamik politikkikkut aqutsisut apeqqutaatinnagit pisariaqartitsivugut.

Nuna tamakkerlugu iliuusissatut pilersarummik siunnersuut

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest