Piviusulersaarut: Uanga innarluutigaanngilanga

Tilioq aamma Uilu Stories piviusulersaarusiornissamut suliniutissamik isumaqatigiissusiorput, Kalaallit Nunaanni inuit innarluutillit ulluinnarni inuunerannik takutitsisussanik. Suliniut immikkuullarissuuvoq, innarluutillit innuunerisa oqaluttuassartaannik tusarneqanngisaannarnikunik oqaluttuartoqassalluni. Inuiaqatigiinni qanoq ililluni inunnut innarluutilinnut aporfiliisoqarsinnaanersoq pillugu nangittaqattaartartuliani takutinneqassaaq, kisiannili aamma inuiaqatigiit inuillu qanoq ilillutik aporfinnik taakkuninnga piuneerutitsisinnanersut aamma takutinneqassaaq, taamaalillunilu allat naligalugit inuit innarluutillit inooqataasinnaaniassammata.

Piviusulersaarutitut nangeqattaartuliassaq pingaaruteqarpoq, pissutigalugu inuit innarluutillit inuunerminni atugassarititaannik ukkatarinnissammat. Kisiannili aamma inuttut innarluuteqarneq taamaallaat piginnaasakillisimanermik tunngassuteqannginnera ersersinniarlugu. Inuuneq tamaat, allatuulli nuannersunik nuanniitsunillu aqqusaagaqarfiuvoq. Taamaalilluni piviusulersaarut inuaqatigiinni inunnut innarluutilinnut isumaqareernermut piujunnaartitseqataassaaq, ilaatitsinermillu paasinninnermillu siuarsaanermut tapertaassaluni.

Nangeqattaartuliassaq sisamanik immikkoortoqassaaq, aallaaviatigut inuit innarluutillit marluk immikkut ulluinnarni inuuneranni iluatsitsisarnerannik unammilligassaannillu takutitsisoqassalluni. Innarluuteqartoqartarnerata iluani assigiinngisitaarneq takutinniarlugu, nangeqattaartuliatut aallakaatitassiani piginnaasakillinerit sisamat pingaarnerit qitiutinneqassapput: timikkut, tarnikkut, eqqarsartaatsikkut ilisarsiniarnikkullu piginnaasakillinerit. Piviusulersaarummi nangeqattaartumi nunap immikkoortuani tamani allakaatitassiortoqarnissaa kiisalu peqataasut ukiuisa assigiinngisitaartinneqarnissaat anguniarneqassaaq.

Aka Hansen Uilu Storiesiminngaanneersoq ima oqarpoq, ”Suliniummut uunga peqataavunga pissutigalugu Kalaallit Nunaanni inunnut innarluutilinnut pissutsit ukkatarineqarnissaat amigaatigineqarmat. Tamannalu uanga tapertaaffiginiarpara. Inuit naapinnissaat oqaluttuassartaannillu tusarnaarnissaq aammalu immikkoortuliat inuiaqatigiinnut siammasissumik takuneqarnissaat qilanaaraara. Oqaluttuarineqartussat oqaluttuarineqarneq ajukkajupput, kisiannili inuiaqatigiinni ilisimasarineqarnissaat pingaaruteqarpoq. Taamaammat suliniut una pillugu Tilioq suleqatigisinnaanngorakku nuannaarutigaara.”

Oktobarimi 2021-mi nuna tamakkerlugu inunnut innarluutilinnut sapaatip akunnerititami piviusulersaarutit nangeqattaartut takuteqqaarneqassapput. Taamaalilluni takutitseqqaarneq nangeqattaartorlu inuiaqatigiinni oqallitsitsinermut aamma pilersitsissaaq, inunnullu innarluutilinnut pisinnaatitaaffiit uatsitulli naleqatinnissaat qitiutinneqassallutik. Takutitseqqaarnermut atatillugu, aamma atuarfimmi atuartut angajulliit, ilinniarnertuunngorniartut kiisalu ilinniarnertuunngorniarfinni ilinniartitsisut piviusulersaarummit nangeqattaartumit immikkuualuttut saqqummiunneqassapput suliassaannillu tuniorarneqassallutik. Taamaaliornikkut piviusulersaarut ataavartuutinneqassaaq nunalu tamakkerlugu takutinneqassalluni.

Suliniut NunaFondenimit aningaasalersorneqarpoq, suliniutip aallartisarneqarnissaanut pingaaruteqaqataalluinnassalluni. Tamatuma saniatigut suliniut aamma Tips og Lottomit kiisalu Royal Artic Linemit aningaasalersorneqarnikuuvoq. Tapiissuteqartut pingasut taakku Tiliup qutsavigivai.