Ækvivalenten

Kinguaassiutitigut atornerlunneqarsimanermut ersiutit

Meeqqamiit meeqqamut kinguaassiutitigut innarligaasimanerup malitsigisai takussutissaasinnaasullu assigiinngitsorujuusinnaapput. Toqqaannartumik meeraq ilaanni oqarsinnaasanngilaq. Taamaammat pingaaruteqarluarpoq meeqqamut innarluutilimmut paaqqinnittutut, maluginnissinnaanerit annertusariaqartoq allannguutinut minnerpaanulluunnit aarlerinarsinnaasunut.

Timikkut ersiutit

  • Kinguaassiutitigut nappaatit imaluunniit aseruuttoornerit nassuiarneqarsinnaanngittut.
  • Kinguaassiutitigut nissulluunnit iluatungaani tilluusat.
  • Itikkut kinguaassiutitigullu aanaarnerit iluaalliornerilluunniit.
  • Quinermi anarnermiluunniit anniarnerit
  • Ilupaqutit aarasattut, simertinnikut siittornikulluunniit.
  • Timikkut nassuiarsinnaanngisamik kimillannerit. makkuusinnaapput: kilernerit tilluusarnerillu meeqqap ulluinnarni sammisartagaanut attuumassuseruminaattut. Imaassinnaavoq aamma pisunnermi ippigusuttoq, sivisuumilluunniit issiasinnaanani.
  • Ingattarsertumik asattorniarneq imaluunniit eqqiluisaarnissamik soqutigisaarunneq aamma ersiutaasinnaapput

Pissusilersuutsikkut takussutaasinnaasut

  • Meeraq eqqissiviinnermik, uukkatarinnissinnaaneraluunniit killeqalerpat imaluunniit isumaa nikeriapiloorsinnaalerpat takussutissaasinnaavoq
  • Ataatsimuualaarnerni, ilaquttaniit kammalaatiniillu ungasinnialerpat.
  • Ernumaneq imaluunniit ersilersimappat WC-mukarnissaminut uffarnissaminulluunniit
  • Nerisarnera allanngorpat neriumajunnaarpalluunniit
  • Sakkortumik misigisaqarsimanerup kinguneranik uippalleqqanermik innarleqqaneq (PTSD)
  • Imminoriarnerit
  • Sinnattupiluttarneq imalluunniit sinnarluttalerneq. Meeqqat innarluutillit sinnarlukkajunnerusinnaasarput, taamaammat eqqarsaatigilluarneqassaaq una aarlerinermut naliliinermut atussagaanni.
  • Iisiniarnermi ajornartorsiorneq immaqaluunnit qanip eqqaanukartunut erserujunneq.
  • Piffinnut assigiinngitsunut imaluunnit inunnut ersisalerneq
  • Pisimasunik eqqartueqateqarusunnginneq
  • Kinguaassiutitigut iliuutsinik titartaaneq imaluunnit takutitsineq.
  • Nammineq timimut isorinnittumik isiginnittariaaseqalerneq, pingaartumik kinguaassiutitigut.
  • Paaqqutarinnittumut ippinnartumik atoqatigiinnermut tunngassuseqarsinnaasumik attaveqartalerneq.
  • Kinguariarneq: Meeraq siusinnerusukkut ineriartornermini aqqusaartagaanut uteqqinneq soorlu siniffimmi quisoortalerneq imaluunniit kullutortalerneq.
  • Peqaaminut imaluunniit pinnguaqatiminut eqqunngittumik kinguaassiorpalaartumik pissuseqariaaseqalerneq ilisimasaqalersimanerluunniit.
  • Atuarfimmi ingerlanerluleriasaarneq, soorlu karakterit appartut, atuariarnissamut suqutiginninneq annikillisoq immaqaluunniit isumaqatigiinnginnerit/kamattarnerit annertusisut.
  • Meeraq annikilliulersinnaavoq paaqqutarinnittoq aalajangersimasoq qalligaangat.
  • Meeqqap ilaarsilluni atornerlunneqarsimaneq pisuusaarteqqissinnaavaa pinnguarnermi, meeqqat allat ilagalugit imaluunniit inuusanik pinnguarnermi.
  • Atoqatigiinnermut naartunermulluunniit tunngasut apeqqutigisalersinnaavai.

Misigissutsitigut ersiutaasinnaasut

  • Isumaata nikeriarujussualerneri takussutissaasinnaavoq, soorlu eqqisiiviilliorneq, kamassaqarneq, ersineq, erloqineq, avinngarusimanerulerneq tunuarternerulernerlu. Nikallungarujunnermut ernumanermut kinguniperluuteqarnermullu takussutissat ersersinnaallutik.
  • Naleqanngittutut imminut isigineq imaluunniit imminut kamassaqarneq meeqqap pissusigilersinnaavaa, soorlu oqaatigisinnaallugit nammineq naleqaratik imaluunniit ajortumik pineqarnissartik pillaatigisariaqarlugu.
  • Kamassaqarujuttarneq sakkortusaarnerlu: Kamarujussuartarnerit meeqqamut naliginnaanngitsut akulikillineri aamma takussutissaasinnaavoq.
  • Timimut allatut soqutiginnilerneq, timip pisinnaasai maluginiarnerulerlugit imaluunniit atoqatigiinnermut tunngasunik pisuusaartitsilluni kammalaatit ilaquttalluunniit ilagalugit.
  • Piareersimarusaarneq imaluunniit nipinut nikeriapiloortunulluunniit tuparujussuarsinnaaneq.
  • Inunnut allanut attaveqarniarnermut ajornartorsiorneq immaqaluunniit inunnut aalajangersimasunut pisariaqartitserujussualerneq.
  • Meeqqap avatingiisini misigisanilu aqunniarneranut pisariaqartitsinerulersinnaavoq, tamannalu meeqqamut toqqissisimanermik misigititsisinnaalluni.

Ersiutaasinnaasut allat

  • Ippinnartumik inersimasoq meeqqamut attaveqarniarnerulersinnaavoq, imaluunnit kisimeeqatiginissaanut periarfissarsiornialersinnaanera aarlerinaataasinnaavoq.
  • Meeraq nassuiaatissaqanngittumik anigaasanik pinngussanilluunnit tunisittalersinnaavoq.