Qaanaamut paasisassarsiorluni angalanissaq

-Illoqarfiit avannarpasinnersaanut tikeraarnissatsinnut erinisuttupilussuuvugut, Inuit innarluutillit illersuisuat Christina Johnsen Tiliup Qaanaamut paasisassarsiorluni angalanissaanut nalunaaruteqarnerminut atatillugu oqarpoq.

Inuit innarluutillit illersuisuat Christina Johnsen aamma allatseqarfik Tilioq Qaanaamut paasisassarsiorlutik angalassapput maajip 20-aniit 27-ata tungaanut, Qaanaami inuit innarluutillit atugaat takusassallugit nalilersussallugillu.

-Illoqarfiit avannarpasinnersaannut tikeraarnissatsinnut erinisuttupilussuuvugut, inuillu innarluutillit, qanigisaat inunnillu innarluutilinnik sullissisut atugaat paasisaqarfigiumallugit naapinnissaannut. Inuit innarluutillit illersuisoqarfiat Tilioq Kalaallit Nunaanni innuttaasunut tamanut atuuppoq, inuillu innarluutillit illersuisuattut pingaartippara, isorliunerusuni innuttaasut tikillugit naapinnissaat, Inuit innarluutillit illersuisuat Christina Johnsen oqarpoq.

Inuit innarluutillit illersuat pillugu inatsisartut inatsisaat naapertorlugu inuit innarluutillit illersuisuata inuit innarluutillit Naalagaaffiit Peqatigiit inunnut innarluutilinnut pisinnaatitaaffinnut naapertuunnersut nalilersuiffigisussaavai.

Tiliup Qaanaami naapitsinissanut, innuttaasullu saaffiginnissinnaanissaannut aaqqissuussassanillu pisussanut pilersaarusiuleruttorpoq.

-Qaanaami inuit innarluutillit, qanigisaasa aamma inunnik innarluutilinnik sullissisut atugaannik paasisaqarusuppugut, periarfissaqarpallu aamma nunaqarfinnut tikikkusuppugut. Aamma kommunip inunnut innarluutilinnut tunngatillugu ingerlatsinerannik aaqqissuussinerannillu paasisaqarusuppugut, innuttaasullu kommunip neqeroorutaannut tunngatillugu qanoq misigisaqarnersut paasinnikkusulluta, Christina Johnsen oqarpoq.

Paasisassarsiorluni angalanermi pilersaarut naammassineqariarpat tilioq.gl-imi takuneqarsinnaalissaaq soorlu aamma tusagassiuutinut nalunaarutigineqarumaarluni. Angalanissamut pilersaarut Covid-19 corona virusimit sunnerneqarataannaavoq, angalanissamullu pilersaarutit allannguuteqassappata tamanna nalunaarutigineqarumaarpoq.