Nanortalimmit nutaarsiassaq nuannersoq

Nanortalimmiu Hans Lothsen Semsen nuannersumik nutaarsiassaateqarpoq, tassami angerlarsimaffia kaassuartakkamik issiavianut naleqqussarneqarpoq. –Nuannaaqaanga ajornaquteqanngitsumik inimiit, iggavimmut silammullu ingerlasinnaanngorama, Hans oqarpoq nassuiaallunilu innaallagiatortumik kaassuartakkamik issiavissaminik tikittoornissaminut utaqqilluni.  

Tiliup Nanortalimmiu Hans Lothsen Semsen Kommune Kujallermut angalanermik nalunaarusiamini allaaseraa, taanna najukkami naleqqussarneqarnissaanut ilungersuuteqarpoq. Maanna Kommune Kujallermut angalanermit qaammatit qulingiluat qaanngiussimalerput, Hansilu nuannersumik nutaarsiassaateqarpoq.

-Maanna ajornaquteqanngitsumik inimiit iggavimmut silammullu ingerlasinnaanngorpunga, Hans Lothsen Semsen nuannaaqaluni Tiliumut 14.maj sianerluni oqarpoq.

Tiliup Nanortalimmiu Hans Lothsen Semsen 2019-imi augustimi pulaaramiuk, Hansip ulluinnarni namminerisamik inuuneqarnermigut aamma kaassuartakkamik issiaveqarnermigut ilungersuutigisartagai takuai. Hans 2014-imi anorersuarnerani tinngussaalluni ilisimajunnaarpoq aamma pisussinnaajunnaarluni ajoquserpoq. Danmarkimi Rigshospitalimi ukiup affaa uninngareerluni Nanortalimmut kaassuartakkamik issiaveqalersimalluni angerlarpoq.

-Paaralugit uku kaassuartakkat aamma tummeqqat sinaakkutai immineq ammukarujoortarpunga, sapileraangama issiaqqaartarpunga, Hans Lothsen Semsen taamani silatimini tummeqqat pillugit oqaluttuarpoq. BSU-mik  type 18-imik affarleriit aappaani Hans illoqarpoq, isaariaaniillu tummeraqarluni.

Tilioq sulianik ataasiakkanik ingerlatsilluni aalajangiisinnaanngilaq, kisianni inatsisit atuuttu kiisalu inuit innarluutillit pisinnaatitaaffii pillugit siunnersuisinnaavoq, imaluunniit Inunnik isumaginninnermi maalaaruteqartarfimmut ombudsmandimullu naammangittaalliorsinnaanermut tunngasunik siunnersuisinnaalluni. Ilaanni aamma inuit innarluutillit peqqissusaannut, ineriartornerannut atugarliornerannullu ernumassuteqarnermi kommuninut nalunaarutiginnissinnaasarluni.

-Nuannaarutigeqaarput Hansimut siunnersuinerput iluaqutaasimammat, aamma Hansi pillugu oqaluttuaq saqqummiussinnaasimagatsigut. Inuit innarluutillit tapersersorneqarnissaannut inatsit nutaaq arlalinnik periarfissaqartitsivoq. Nuannaarpugullu Kommune Kujalliup inatsit nutaaq atulersimammagu, Hansilu pisinnaatitaaffini naapertorlugit tapersersorneqarmat ikiorneqarlunilu, Inuit innarluutillit Illersuisuat Christina Johnsen oqarpoq. 

Tiliup Nanortalimmiu Hans Lothsen Semsen 2019-imi augustimi pulaaramiuk, Hansip ulluinnarni namminerisamik inuuneqarnermigut aamma kaassuartakkamik issiaveqarnermigut ilungersuutigisartagai takuai.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest