Sooruna siunissamut pitsaasumik pilersaarusiornissamut tunuarsimaartoqartoq?

Inuit innarluutillit illersuisuata inatsisartuni nuna tamakkerlugu iliuusissatut periusissiamik siunnersuummik UPA2019/48 oqallinnnerannut malinnaavoq. Nuannerpoq oqallinneq tusarnaarlugu, tassami inuit innarluutillit atugaannik pitsanngorsaasoqarnissaanut piumassuseqartoqarmat. Eqqarsarnartoqarporli aalajangiiffigisassatut siunnersuutip siunertaa allanngorluinnarmat, siunissamut pilersaarusiornissamiik kingumut isigaluni misissuinissamut saatinneqarmat.

Allannguutissatut siunnersuut ima kinguneqarpoq, Naalakkersuisut kingumut qiviarlutik inuit innarluutillit atugassarititaannik takunnikkumasut. Aamma tamanna ajunngikkaluarpoq. Tassami AAMMA ataavartumik misissuisoqartarnissaa nalilersuisoqartarnissaalu pisariaqarpoq. Kisianni aatsaat 2023-miunngitsoq. Ila ataavartumik tamanna pisariaqarpoq

Nuna tamakkerlugu iliuusissatut periusissiassamik siunnersuutigineqartoq, siunissamut isigisuuvoq pitsanngorsaatissatut suliniutigineqarumaartussanut tunaartalersuilluni. Ataavartumik ingerlasunik nalilersuisoqarlunilu aamma siunissamut pilersaarusiortoqarsinnaavoq, ataatsikkut suliarineqarsinnaapput.

Tupinnarpoq eqqumiiginarlunilu, siunissamut pilersaarusiornissamut tunuarsimaaartoqarmat

Nunatsinni suna siunniunneqarnersoq paasissallugu toqqissisimanarnerussannginnerluni, sunaana piumagipput? Paasiuminaappoq issiaqatigiilluni pilersaarusiornissamut piumassuseqanngittoqarmat. Isumaqatigiissusiorniaritsi siunissamut piumasavut pillugit suliaqarnissamut.

Kalaallit Nunaanni pilersaarusiorniaritsi ukiut aalajangersimasut qaangiutsinnagit angusassanik iliuusissanik imaqartunik, soorlu suliffeqarfinni inuit innarluutillit peqataatissinnaalerumallugit ilusilersuiffigissallugit pilersaarusiorlugu. Meeqqat immikkut pisariaqartitsisut imaluuniit innarluutillit amerlanerusut atuartinneqartalernissaannut aamma ingerlaqqinnissaminnut atorsinnaasaannik naggataarutaasumik soraarummeeruteqartalernissaannut. Inuit innarluutillit peqqissutsikkut pitsaanerusunik atugaqalernissaannut pilersaarusiortoqarniarli. Inuit innarluutillit immikkoortinneqartarnerisa inerteqqutinngortinnissaanut inatsisiliortoqarnissaanut pilersaarusiortoqarniarli. Sanaartornermi malerugassat nutarsarnissaanut pilersaarusiortoqarniarli, piumasarineqarlunilu inuit innarluutillit aamma killilinnik piginnaasallat sanaartukkani nutaani isersinnaasariaqartut.

Annerusumik itisiliinissannut piareersimavunga

Inuit innarluutillit illersuisuat Tilioq

Christina Johnsen

+299 55 19 50

 

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest