Tilioq Qeqqata Kommunia suleqatigalugu ”Sulisinnaavunga” saqqummiuppaat

Sulisinnaavunga pillugu takutitassiani Maniitsumiit Sisimiuniillu inuit arfineq marluk assigiinngitsunik innarluutillit suliffeqartut takusinnaavatit, sulinermikkullu immikkut suliffeqarfimmut inuiaqatigiinnullu tunniussassaqarnerat paasisaqarfigalugu.

Videomi siullermi Maniitsormiu Mikannguaq Kreutzmann Pisiffimmi sulisoq takusinnaassavat. Video 2020-mi januaarip 2-ni nal. 12.00 saqqummersinneqassaaq.

Assimi > toorlugu Sisimiuniit Maniitsumiillu peqataasunik videoliat takusinnaavatit. Sisimiormiut peqataasut ukuupput Dorthe Olsen, Karina Rasmussen aamma Aqqa Peter Lyberth. Maniitsumiit David Bech, Miki Poulsen kiisalu Seth Kristiansen. Videot pillugit paasissutissani ullut saqqummerfissai takusinnaavatit.

Takutitassiat arfineq marluk Qeqqata Kommuniata Tiliullu nittartagaanni, Facebookimi Youtubemilu quppernerini takuneqarsinnaapput, takutitassiat Dennis Rosing Ingemannimit suliarineqarput.

Videonik takusassiornermi siunertaavoq inunnut innarluutilinnut isiginnittariaatsip allanngortinneqarnissaa. Tilioq aamma Qeqqata Kommunia misiliummmik suliniuteqarnerminni “Sulisinnaavunga”-mik qulequtalimmi maluginiarpaat, inunnut inarluutilinnut isiginnittariaaseq peqqutaalluni suliffeqarnermut ilanngunnissaannut aporfeqarsinnaasaartoq. Inuit assigiinngitsunik innarluutillit suliffeqartut takutinnerisigut kikkut tamaasa assigalugit periarfissinneqaraangamik taperseeqataasinnaassuseqarnerat takutinniarneqarpoq. Taamatullu takutitassiani peqataanermikkut inuiaqatigiit ilisimasaqarnerulernissaannut isiginnittariaasiannullu allannguinissaannut tunniussipput.

-Una suliniut Tiliumut pingaaruteqarluinnarpoq, tassami inuit innarluutillit ajornannginnerusumik suliffeqarnermut ilanngunneqarsinnaalernissaat anguniarparput. Inuuniarnermikkut atugarisaatigut namminerisaminnillu aalajangiisinnaassusaat annertusarniarsaralugu. Tamanna inummut innarluutilimmut inuiaqatigiinnut suliffeqarnermigut peqataaneranut pitsaasuuvoq, illuatungaatigullu sulisitsisut suleqataasullu inuup innarluutaanik ilinniartarput, aamma innarluuteqarluni inuunermik paasisaqartarlutik, Inuit innarluutillit illersuisuat Christina Johnsen oqarpoq.

-Qeqqata Kommunianut pingaartuuvoq periarfissanik pitsaanerpaanik tunniussinissaq, inuiaqatigiinni kikkut tamarmik taperseeqataasinnaaniassappata. Tamannami inuit ataasiakkaat inuuniarnermikkut atugarisaarnerulernissaannut siuarsaataavoq, soorlu aamma suliffeqarfimmut suleqataasunullu naleqarnerulersitsisarluni. Akisussaaqataaneq ataatsimoornerlu kommunip pingaartitaannut ilaapput, aamma innuttaasunut tamanut atuuppoq, soorlu suliniummi Sulisinnaavunga-mi takutinneqartoq. Qeqqata Kommunia uani suliniummi suleqataarusuppoq aamma peqataanermigut maligassiuisoorusuppoq, taamaattumillu siunissaq eqqarsaatigalugu inunnik innarluutilinnik nammineq sulilersitsisalernissamut pitsaanerusumik suleriaaseqalerusulluni, Hans Frederik Olsen, Qeqqata Kommuniani kommunalbestyrelsemi Isumaginninnermut ataatsimiititaliami siulittaasoq oqarpoq.

Suliniutit allat

Qeqqata Kommunia aamma Tilioq misiliummik suliniutaannut “Sulisinnaavunga”-mut atatillugu Qeqqata Kommuniani Sisimiuni Maniitsumilu innarluutilinnut immikkoortortami sulisunut Majoriamilu sulisunut workshoppertitsisoqarpoq, tassani Arctic Circle Businessimiit aamma peqataasoqarluni. Tamatuma saniatigut sulisitsisut isumasioqatigiisinneqarput, inuit innarluutillit sulisorineqalernissaannut suut aporfiusarnersut oqaluuserineqarlutik, tassami suliniummi inuit innarluutillit ajornannginnerusumik suliffeqalersinnaanissaat anguniarneqarpoq.

Takutitassiat social mediami saqqummersinneqartut, KNR tvikkullu takutinneqartussap saniatigut sulisitsisunut innuttaasunullu paasissutissanik suliaqartoqarpoq 2020-milu saqqummersinneqarumaarlutik.

Tiliumit Qeqqata Kommunianiillu neriuutigineqarpoq, paasissutissat piareerpata sulisitsisunut saqqummiussinissamut aggersaasinnaajumaarlutik.

Qeqqata Kommuniani kommunalbestyrelsemi Isumaginninnermut ataatsimiititaliami siulittaasup Hans Frederik Olsenip aamma Tiliumi suliniutinik pilersaarsusiortup Anna Ida Jonssonip misiliummik suliniutissaq suliffeqarnermut tunngasumut isumaqatigiissut oktoberimi 2018-imi atsioqatigiissutigaat.