Tamat ilinniagaqarnissamut pisinnaatitaaffeqarput

§§§ Pisinnatitaaffikka- Pisinnaatitaaffitit- Pisinnaatitaaffivut §§§

Tiliumiit Naalagaaffiit Peqatigiit Inunnut innarluutilinnut isumaqatigiissutaanni immikkoortut sammisarpagut, taakkulu ilinnut qanoq isumaqarnersut erseqqissarlugit. Uani pisinnaatitaaffiit paasisaqarfigikkit.

Imikkoortoq 24: Ilinniagaqarsinnaatitaaneq

Inuit innarluutillit ilinniagaqarsinnaatitaapput. Kalaallit Nunaatalu isumagissavaa ilinniarfiit inunnit innarluutilinnut tikikkuminartuunissaata. Tamanna isumaqarpoq inuit innarluutillit allatuulli atuartitsinerni peqataasinnaasariaqartut. Allatuulli peqataasinnaanissaat qulakkeerniarlugit taava ikiorneqarnissaat tapersersorneqarnissaallu neqeroorutigisariaqarpaat. Soorlu tusilartoq ussersorluni nutserisinnaasumik atuartitsisup oqaasiinik nutserussisinnaasariaqartoq, imaluunniit assakaasulimmik issiaveqaraanni taava init atuartitsiviusut iserfigineqarsinnaasunngorlugit naleqqussarsimasariaqartut.

Kalaallit Nunaata isumagissavaa, nunatsinni ilinniartitsisut inunnik innarluutilinnik atuartitsiniarneranni eqqortunik sakkussaqarnissaat.

Kalaallit Nunaanni ilinniagaqarsinnaatitaaneq ilungersunarsinnaavoq. Tiliumiit ilungersunarsinnaasut arlaqartut paasineqarput, soorlu innuttaasunik, sullissisunik aamma ilinniagaqarfinnik oqaloqatiginnittarnernit paasineqarput. Meeqqat atuarfianni immikkut atuartitsivinni atuartut assigiinngitsunik pisariaqartitsisinnaapput, tamannalu ilinniartitsisunut annertuumik piumasaqaateqarnermik kinguneqartarpoq, tassami pisariaqartitat assigiinngitsut naapertorlugit sulisariaqartaramik, taavalu immikkut atuartitsisussatut ilinniartitsisorineqartut immikkut perorsaanermik ilinniarsimasuusanngillat imaluunniit qaffassaqqillutik ilinniarsimasuusaratik. Taamaattumik eqqortunik piginnaasaqarnersut apeqquserneqarsinnaapput taamatut meeqqanut immikkut atuartinneqarnissaminnut pisariaqartitsisunut atuartitsisinnaanerat. Aamma ilinniartitsisut akornanni piginnaanngorsaqqiinerit pisariaqarluinnarput tassaappummi atuartuutiminnut tapersersortaasussat.

 

Tiliumiit naliliineq ”Ilinniartitaaneq innarluuteqarnerlu” suliarineqarluni saqqummiunneqarpoq, tassani ilinniartitaanermi inuit innarluutillit ilungersunartorsiorfigisinnaasartagaat qulaajarneqarput. 

Tiliup ilisarnaataa toorlugu naliliineq atuaruk. 

Inunnut innarluutilinnut isumaqatigiissut

Kalaallit Nunaanni Naalagaaffiit Peqatigiit inunnut innarluutilinnut isumaqatigiissut 2009-mi augustip 24ani atuutilersinneqarpoq, isumaqatigiissutillu atuutilersinneqarnerata malitsigisaanik Namminersorlutik Oqartussat pisussaaffeqalerput inuit innarluutillit allatuulli periarfissaqarnissaat.

Inunnut innarluutilinut isumaqatigiissut pingaaruteqarpoq, tassanimi siunertarineqarpoq inuit innarluutillit allatuulli inuttut pisinnaatitaaffeqarnerat qulakkeermagu, illersorlugit siuarsarniassallugillu. Tassa inuit innarluutillit tamarmik allatuulli inuiaqatigiinni periarfissaritinneqartunut pisinnaatitaaffeqarmata. Tamannalu Namminersorlutik Oqartussanit pisussaaffigiumallugu suliniuteqarfigisussaavaat.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest