Tikikkuminassuseq pillugu pisuttuaqatigiineq

Inunnut innarluutilinnut sapaatip akunneritinneqartoq Sisimiuni tikikkuminassuseq pillugu pisuttuaqatigiinnermik malunnartinneqarpoq. Tikikkuminassuseq pillugu pisuttuaqatigiinnerup ersersippaa inuit innarluutillit ulluinnarni atugaat unammerlernartoqarsinnaaqisut. Pingasunngorneq 11. oktober 2018 Inuit innarluutillit illersuisoqarfiat Tiliup Sisimiuni inuit innarluutillit peqatigiiffii Puigornanga, Ingerlariaqqiffik aamma ISI suleqatigalugit tikikkuminassuseq pillugu pisuttuaqatigiinneq aaqqissuuppaat.

– Ukiuni kingullerni ornitassat tikikkuminartut amerliartorput, naammanngilluinnarpulli. Inuit innarluutillit pisortaqarfinnut tamanut isersinnaasussaapput, allalli ornitassat aamma iserfigisinnaanissaannut aamma inuit innarluutillit pisinnaatitaaffeqarput. Taamaatumik tikikkuminassuseq pillugu illoqarfitsinni pisoqatigiinnermik aaqqissuussivugut. Tamatta inuinnaavugut, kaassuartakkani issiagaluarutta, amitsuarannguugutta silikkaluarutta, qaamasuugutta, taartuugutta tarnikkulluunniit innarluuteqarutta, taamat oqarpoq Inuit Innarluutillit Illersuisuat Christina Johnsen.

Pisuttuaqatigiinnermi pisiniarfiit allaffiillu assigiinngitsut saneqquaneqarput uniffigineqartarlutillu. Uninngaffigineqarnerani eqqartorneqartarput ulluinnarni tikikkuminaassinnaanerannut suut peqqutaanersut.

Pisuttuaqatigiinnermi pisiniarfippassuit, allaffeqarfippassuit suliffeqarfippassuillu tikinneqarsinnaagaluarput. Pisuttuaqataasunili pitsorluttut eqqarsaatigalugit pisuttuaqatigiinneq illoqarfiup qeqqani ingerlanneqarpoq, Tiliumit aallartittumik.

Iseriartortunut majorallaffissaq kusartut – tikinneqarsinnaanngitsulli
Piffiit ilaanni iseriartortunut majorallaffissat pitsaalluinnartuupput, illuliornermilu malittarisassat maleqqissaarneqarsimapput. Majorallaffissalli tikinneqarsinnaanngillat tungaanut aqqutit ujaraaqqanik ilioraavigineqarsimammata. Taamaattoqartillugu eqqarsaatigineqarsimanngilaq ujaraaqqat kaassuartakkanik ingerlasut ingerlaffigisinnaanngikkaat.

Aamma tikinneqartut ilagaat kaassuartakkani issiasunut iserfissat illup tunuani inissisimasut. Amerlasuutigulli iserfissaq nalinginnaasoq kaassuartakkanik atuisunut iserfigineqarsinnanngikkaangat iserfissap allamiinnera pillugu paasissutissiissutinik malitseqarneq ajorpoq. Assersuutigalugu illoqarfitsinni aningaaserivituatsinni. Aammali inuk innarluutilik iserfiginiakkaminut iserniartillugu illup tunuanukaqqaartariaqarnera Inuit innarluutillit pisinnaatitaaffii pillugit isumaqatigiissummik malinninnerunngilaq.

Sumiiffinni allani aamma kaassuartakkanik atuisut imaluunniit aalassarlunnermik arlaannik innarluuteqartunut iserfigiuminnaassinnaasut naammattoorneqarput, soorlu illoqarfitsinni timersortarfik aamma illoqarfitsinni pisataarniarfituaasoq JYSK.

Timersortarfimmi aaqqissuussat arlallit ingerlanneqartarput soorlu sunngiffimmi kulturikkullu sammisassat. Assersuutigalugu upernaaq timersortarfimmi qineqqusaartitsisoqarpoq. Qineqqusaarneq inuit innarluutillit peqataaffigiuminaatsisaat. Timersortarfik iseriartorfissamik majorallaffeqaraluarpoq, taanna illuliortarnermi malittarissasat naapertorlugit sanaajunngilaq, kaassuartakkanillu atuisunut tulluartuunani. Aammali inunnut innarluutilinnut perusuersartarfinnik tulluuttunik soqanngilaq.

Isumaqatigiissut malinneqanngilaq
Pisataarniarfik qulaani eqqaaneqartoq silataani illutaatalu iluani majuartarfeqarpoq. Tamanna isumaqarpoq inuit aalajaniarnermikkut innarluutillit pisiniarfiup silataani utaqqisariaqartarnerat sulisunillu oqaluttuussisariaqartarnerat pisiarerusutamik suunnerannik. Imaappoq inuk nammineq iserluni pisiarerusutani ilittut uattullu akilerlugit pisiassani alakkarsinnaanangillu attorsinnaanngilai.

Illuliortarnermik malittarissassat massakkut atuutut naapertorlugit illuliassat nutaat illullu pioreersut tamakkiisumik allanngorsaaneqartillugit inunnut innarluutilinnut tulluussarneqartussaapput. Malittarisassalli Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaannik malinneqqissaarnissaanut suli tulluarsagassartaqarpoq.

Pisuttuaqatigiinnermut peqataasut 40-t missaaniipput, peqataasunilu arlallit aalajaniarnikkut innarluuteqartuupput.

– Inuiaqatigiit ataatsimoortut pilersinneqassapput tamatta susassaqaqatigiikkutta. Nunatsinni tamatta inissaqartariaqarpugut, Christina Johnsen naggasiivoq.

Pisuttuaqatigiinnitsinnut tapersersuisunut qujanaq. Radio Tusaataat-nit pisuttuaqatigiinnissaq ussassaarutigineqarmat qujavugut, taamaasilluta pisuttuaqatigiinnissaq tamanut siammartersinnaavarput.

Pisuttuaqatigeereernerup kingorna Tiliup allaffiani naapilaarnitsinnut sutugassaqartinniarluta Pisiffik aamma Brugseni Sisimiut naatitamik paarnanillu tunisineranut qujanaq. Minnerunngitsumillu pisuttuaqatigiinnermut peqataasut tamaasa qutsavigaagut, peqataasoqanngikkaluarpat pisuttuaqatigiinneq piviusunngorsimassanngikkaluarmat.