Tilioq aallaannaleqaaq….

Kommune kujallermut augustip 10-aniit 23-anut tikeraassalluni, kujataani illoqarfinni nunaqarfinnilu inunnut innarluutilinnut atugassarititaasut takusarlugit, inuit innarluutillit illersuisoqarfiata innuttaasunut sammisaqartitsilluni inuit innarluutillit pisinnaatitaaffii pillugit isumaqatigiissutip ilisimaneqarnerulernissaanut aaqqissuusisassaaq soorlu aamma ataasiakkaaraluni inunnik oqaloqateqartassalluni.

-Tiliumit assorsuaq erinigaarput kujataanut tikeraarnissarput, tassani inuit innarluutillit qanigisaasullu takullugillu tusarnaassavagut. Taakku saniatigut inunnut innarluutilinnu tsullissisut assigiinngitsut aamma naapissavagut, soorlu aamma innuttaasut kujataani pissutsinik atugassarititaasunillu tusagaqarfigerusukkigut.

Inuit innarluutillit illersuisoqarfiata kommunimut paasisassarsiorluni siullerpaamik angalanerissavaa, tikeraarnerminilu inuit innarluutillit atugarisaanik nalilersuissaaq. Tiliup aamma inunnut innarluutilinnut angerlarsimaffiit pulaassavai, ataatsimoortumik najugaqarfiit, illersukkamik sulliviit aamma sullissisut susassaqartut naapissallugit.

Illoqarfinni assigiinngitsuni Narsami, Nanortalimmi Qaqortumilu nunaqarfinnilu Alluitsup Paani Narsarmijinilu innuttaasunut inuit innarluutillit pisinnaatitaaffii pillugit isumaqatigiissummik aallaaveqartumik sammisassaqartitsilluni aaqqissuisoqassaaq ataasiakkaaralunilu oqaloqateqartoqartassalluni.

Kommune Kujallermi angalaneq pillugu nalunaarusiortoqassaaq, inuit innarluutillit pisinnaatitaaffii pillugit isumaqatigiissut naapertorlugu inunnut innarluutilinnut atugassarititaasut pissutsillu ilisimatitsissutigineqassallutik, oqartussallu assigiinngitsut, soorlu Kommuni, Naalakkersuisut aamma Inatsisartut pissutsit atugassarititaasullu pillugit siunnersorneqarumaarlutik, Inuit innarluutillit illersuisuat Christina Johnsen oqarpoq.

Sumiiffinnut tikeraarnissanut ullut:

Narsaq           10.-13. august

Alluitsup Paa       13. august

Narsarmijit           14. august

Nanortalik       15.-17.august

Qaqortoq         17.-21.august

Savaatillit  22.august (Suli inissiviginngilaq )

Sammisassaqartitsilluni aaqqissuussinernut aamma ataasiakkaaraluni oqaloqatiginniffissat piaartumik tilioq.gl-imi, Tiliup facebookimi qupperneranut kiisalu KNRimi nalunaarutini saqqummiunneqaruumaarput.

 

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest