Tilioq Avani

Inuit innarluutillit illersuisuat Nuummi Qaanaamut angalanermik nalunaarummik tusagassiortunut Jens Kreutzmannip aqq. 4-imi talerpimmi ataatsimiittarfimmi saqqummiissaaq septemberip 21-ani nal. 10.00

Tilioq Avanip saqqaa toorlugu nalunaarut atuaruk.

KNR-imit apersorneqarpoq

-Qaanaami inuit Innarluutillit atugaat aamma ajornartorsiutigisartagaat sineriammi allanisut ipput. Kisianni Qaanaap avinngarusimasumiinnera, tikikkuminaannera aammali kommunip aaqqissugaanermigut sulisunik taarseraattoqarfiuneratigut (soorlu sulianik ingerlatsisut aamma ikorfartortit) taava inuit Innarluutillit ajornartorsiutaat sakkortunerusutut ajornerusutullu misigineqartarput. Taamaasillunilu FN-ip inuit Innarluutillit pisinnaatitaaffii pillugit isumaqatigiissutaat malitsikkuminaanneqarluni, Inuit Innarluutillit illersuisuat Christina Johnsen Qaanaamut angalanermik nalunaarut Tilioq Avani saqqummiunneqarneranut atatillugu oqarpoq.

Christina Johnsen Avannaata Kommunianut telefonikkut attaveqarpoq
Borgmester Palle Jerimiassen
Avannaata Kommuniani qullersat

Inuit Innarluutillit illersuisuata Christina Johnsenip Qaanaamut angalanermik nalunaarut Avannaata Kommuniani borgmesterimut Palle Jerimiassenimut, kommunalbestyrelsemi isumaginninnermut ataatsimiititaliami siulittaasumut Apollo Mathiassenimut kiisalu Avannaata Kommuniani qullersanut marlunngornermi septemberip 15-ani oqarasuaatikkut oqaloqatigiinnermi saqqummiuppaa.

Inuit Innarluutillit illersuisuata Nuummut sulilluni angalanerminut atatillugu Qaanaamut angalanermik nalunaarut “Tilioq Avani” tusagassiortunut Jens Kreutzmannip aqq. 4 talerpimmi ataatsimiittarfimmi septemberimip 21-ani nal. 10-nut saqqummiutissavaa.

-Qaanaarmiut uummammiui ilaatigut saqqummiutissallugit tamaaniippunga. Avannaata Kommuniata Qaanaami inunnut innarluutilinnut tunngassuteqartut kisimiilluni kivissinaanngilai aamma kisermaassinnaanngilai. Tilioq nalunaarusiami arlariinnik inassuteqaasiorpoq, soorlu pisortaqarfinnut assigiinngitsunut Nuummiittunut. Tassa Naalakkersuisunut, Namminersorlutik Oqartussanut, Inatsisartunut, Peqqinnissaqarfimmut, Tele Greenlandimut aamma KNR-imut tunngatinneqarput. Inassuteqaatit Qaanaami inunnut innarluutilinnut atugassarititaasunut pitsanngorsaanissamik siunertaqarput, Inuit Innarluutillit illersuisuat Christina Johnsen oqarpoq.

Inassuteqaatigineqartut aallaavigalugit iliuuseqartoqarsinnaavoq, isumassarsiorfiusinnaapput. Tassami imaassinnaasoq pisortat oqartussallu maanna iliuuseqalereersut. Pingaaruteqarporliinassuteqaatit iliuuseqarfigineqarnissaat, taamaasillutalu Kalaallit Nunaanniit Naalagaaffiit Peqatigiit inuit Innarluutillit pisinnaatitaaffii pillugit isumaqatigiissutaannik malinnissinnaalissaagut inuillu Innarluutillit ikiorneqarlutillu tapersersorneqarnissaat qulakkiissavarput, soorlu tamanna inuit Innarluutillit tapersersorneqarnissaanut inatsimmi pisinnaatitaaffigigaat, Inuit Innarluutillit illersuisuat Christina Johnsen oqarpoq.

Tilioq Qaanaamut paasisassarsiorluni maajimi angalavoq. Angalanermi inuit Innarluutillit qanigisaallu 47-t ataasiakkaarlugit pisinnaatitaaffii pillugit siunnersorneqarnissamik ilitsersorneqarnissamillu pisariaqartitsisut oqaloqatigineqarput. Tilioq aamma Siorapalummik Savissivimmilu inunnik innarluutilinnik, qanigisaannik aamma kommunimi sullissisunik oqaloqateqarpoq. Qaanaamilu Peqqissaavik. Utoqqaat angerlarsimaffiat, Avanersuup Atuarfia, kommunip allaffia, ilaqutariinnut Sullissivik aamma pulaarneqarput tassani inunnut innarluutilinnut sullissisut oqaloqatigineqarlutik. Tilioq aamma inuit Innarluutillit pisinnaatitaaffii pillugit isumaqatigiissut sammillugu innuttaasunut aaqqissuusivoq.

Qaanaami innuttaasut systemimik atorneqarsinnaasumik pisariaqartitsipput

Qaanaamut angalanermik nalunaarut Tilioq Avani inuit innarluutillit Qaanaami nunaqarfiinilu atugarisaannik allaaserisanik imaqarpoq. Nalunaarusiami Avannaata Kommuniata Qaanaami allaffiata inunnit kaassuartakkanik issiavilinnik iserfigineqarsinnaannginnera sammineqarpoq, taakkulu igalaakkut sullinneqartariaqarnerat kiisalu sulianik ingerlatsineq arriippallaartoq sammineqarput, taamaasillutillu innuttaasut inatsisitigut innarlitsaaliugaanerata ajornartorsiuteqarfiunera uparuarneqarluni. Inunnut innarluutilinnut sullissisut taarseraanerujussuaq inuillu Innarluutillit tapersersorneqarnissaannut inatsisip atuutsikkuminaatsinneqarnera qulaajarneqarput, soorlu aamma inunnut innarluutilinnut najugaqatigiiffiit ornittakkallu kiisalu ikorfartortit amigaataaneri.

-Qaanaami innuttaasut systemimik atorneqarsinnaasumik pisariaqartitsipput. Aamma ikiorneqarnissamik tapersersorneqarnissamillu qulakkeerisumik suleriaatsimik aaqqissuussisoqarnissaa pisinnaatitaaffigaat, Qaanaami innuttaasut allat naligalugit inuit Innarluutillit inuuneqarnissaminnut pisinnaatitaaffeqarput, tassami massakkut Qaanaami nunaqarfiinilu inunnut innarluutilinnut atugassarititaasut ilungersunarput, Inuit Innarluutillit illersuisuat Christina Johnsen oqarpoq.

Inuit innarluutillit illersuisuat Christina Johnsen attavigiuk uani: cjo@tilioq.gl imalt. +299 55 19 50

Pilersaarusiortorluunniit Anna Ida Jonsson uani annaida@tilioq.gl