Kajumissuseqarpit innarluutilinnut pisinnaatitaaffiinik inuiaqatigiinnilu atugassarititaasunik siuarsaanissamut? Aamma innarluutilinnut suliassaqarfik soqutigisarigukku? Taava Handicaptalsmanditut atorfinitsitaaneq ilinnut tulluarnerussaaq

2017-imi Kalaallit Nunaat siullerpaamik Innarluutillit Illersuisoqalerpoq, aamma Inunnut Innarluutilinnut illersuisoqarfik (Tilioq).

Tilioq 2018-ip aallartinnerani pilersinneqarpoq atoqqaartinneqarlunilu. Innarluutillit Illersuisuat Kalaallit Nunaanni inuit innarluutillit pisinnaatitaaffiinik inuuniarnerminnilu atugarisaannik siuarsaanissamik siunertaqarpoq.

Innarluutillit Illersuisuat taannaavoq pisinnaatitaaffiit pillugit pisortat suliffeqarfiutaanni Tilioq-mi aammattaaq allattoqarfittalimmi takussaalluni sallersaasussaq. Innarluutillit Illersuisuat pisortat suliffeqarfiutaanni qullersaalluni pisortaassaaq. 

Sulinermut aallaavigineqassaaq inuit innarluutillit atugarisaasa pisinnaatitaaffiisalu, inuit innarluutillit piginnaatitaaffii pillugit Naalagaaffiit Peqatigiit isumaqatigiissutaat aallaavigalugu, sammineqalernissaat ilisimaneqarnerulernissaallu.

Innarluutillit illersuisoqarfiat Sisimiunut inissisimavoq.

Innarluutillit illersuisuattut atorfeqarnermi inuit innarluutillit atugarisaasa pisinnaatitaaffiisalu ineriartorteqataaffiigineqarnissaat aamma inuttut suliamullu tunngatillugu sunniuteqaqataaffigineqarnissaat asseqanngitsumik periarfissaalissapput.

Innarluutillit illersuisuata suliassai pingaarnerit tassaapput:

• Ulluinnarni allattoqarfimmi aqutsinermik qulakkeerinninneq, matumani ilaatigut suliassanik agguaassisarneq, suleqatigiinnut tapersersuineq aamma Tiliup suliaani qitiusoq Tiliup suliassaannit takorluugaannillu ingerlanneqarnissaannik qulakkeerinninneq

• Inuit innarluutillit atugarisaat pisinnaatitaaffiilu oqallisigisassanngortittassallugit, sinnerlugit oqaaseqartartuusassalluni aamma inuit innarluutillit taakkulu ilaqutaat oqalliseqataanissaannut periarfissittassallugit

• Pisinnaatitaaffiit naammagittaalliorsinnaanerlu pillugit meeqqanut inersimasunullu innarluutilinnut taakkulu ilaqutaannut siunnersuisassallunilu ilitsersuisassaaq

• Inuit innarluutillit atugarisaat pisinnaatitaaffiilu pillugit oqartussaasunut, pisortat suliffeqarfiutaannut, soqutigisaqaqatigiiffinnut inuinnarnullu siunnersuisassalluni ilitsersuisassallunilu

• Pissutsit inuit innarluutillit inuunerminni atugarisaat nalilersuiffigisassallugit, inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaanni aalajangersakkat aallaavigalugit

• Ataatsimut isigalugu inuiaqatigiit ineriartortitaaneranni pissutsit inuit innarluutillit atugarisaannut periarfissaannullu tunngasut uparuartassallugit

• Inuit innarluutillit inatsisitigut isumannaatsuunissaata siuarsarneqarnissaanut suliassanik siunnersuuteqartassalluni

• Inuit innarluutillit atugarisaat pillugit ilisimasanik katersineq, siuarsaaneq ingerlatitseqqittarnerlu qulakkiissallugit

Innarluutillit Illersuisuat naalakkersuinikkut arlaannaannulluunniit pituttorsimanngilaq inuiaqatigiinnilu tamarmiusuni inuit innarluutillit atugarisaat pisinnaatitaaffiilu pillugit apeqqutini killeqanngitsumik oqaaseqarsinnaatitaalluni.

Innarluutillit illersuisuannut inatsimmi periarfissarissaartitsisoqarpoq Innarluutillit Illersuisuata paasissutissanik innarluutilinnut tunngassuteqartuni naalakkersuinikkut, allaffissornikkut suliamullu tunngasutigut periaatsinik nalilersuisarnissaanut pisariaqartitaasunik qularnaatsumik pissarsisarsinnaanissaanut.

Innarluutillit Illersuisuattut atorfeqarnermi ilinniit naatsorsuutigaarput:

• Atorfiup imarisaanut naleqquttumik ilinniagaqartuussasutit misilittagaqarlutillu

• Naammattumik attaveqaqatigiissinnaassuseqassasutit, taamatuttaaq inuppassuarnik assigiinngitsunik oqaloqateqartarsinnaassallutit

• Innarluutillit pillugit suliassaqarfiup iluani annertuumik ilisimasaqartutit

• Pilersaarusiukkamik aqutsinermik suleqateqarnermillu misilittagaqassasutit

• Annertuumik nammineersinnaassuseqartutit, tamatigoortuullutillu soqutiginnilluartuusutit

• Akisussaassusermik ilisimaarinnilluartutit, suliannut tunngatillugu naapertuilluarnermik ilisimasaqartutit innarlitsaaliuisutillu

• Kalaallisut, qallunaatut/nunani avannarlermiut oqaasiinik tuluttullu oqaatsitigut pitsaasunik piginnaaneqartutit

• Isumassarsiullaqqissuusutit, ilakkuminartuusutit alapernaatsuusutillu

• Pisortat allaffeqarfianni sulinermik misilittagaqartuusutit, tamannali piumasaqaataanngilaq pitsaaqutaassallunili

Innarluutillit Illersuisuat naalakkersuinikkut toqqagaasarpoq, Naalakkersuisuninngaanniillu toqqagaasarluni.

Qinnuteqarfissaq:

13. november nal. 15:00

Innarluutillit illersuisuattut siunnersortaaneq ukiut aalajangersimasut malillugit atorfiuvoq ukiuni 3-ni atorfeqarfiusussaq, ukiuni pingasuni ingerlaqqinnissamut toqqaqqinneqarnissamut periarfissaqarluni.

Soqutiginnittut tamaasa ukiorisat, suiaassuseq, ammip qalipaata, upperisaq, inuiannut sumut ilaaneq apeqqutaatinnagit atorfimmut qinnuteqarnissaannut kajumissaarpagut.

Siunnersortaanermut atatillugu piffissap ilaatigut angalasarnissaq naatsorsuutigineqassaaq.

Aningaasarsiatigut atorfinitsitaanermilu atungassarititaasut.

Ukiuni pingasuni atorfinitsitsinermut piffissami ukiuni aalajangersimasuni atorfinitsitsinermut tapisiaqartitsisoqassaaq.

Innarluutillit illersuisuat LR 38-mut naapertuuttumik akissarsiaqartinneqartarpoq aammalu inuit ataasiakkaarlugit isumaqatigiissuteqarfigalugit atorfinitsitsisoqartarluni

LR 38-mut akissarsiat 1. april 2020-mi qaammammut 68.047 koruuniupput ukiumullu 816.570 koruuniullutik.

Atorfimmut atatillugu piffissap suliffiusussap sivisunerpaaffissaa aalajangersagaanngilaq, aamma qaangiuttoornermi ajunngitsorsiassaqarneq pillugu aalajangersakkat kiisalu ullunik sulinngiffiusussanik annaasaqarnermi ajunngitsorsiassat pillugit aalajangersakkat atuutinngillat, aallaaviatigut sap. akunneranut 40 tiimit sulisoqartassalluni.

Atorfik pillugu paasisaqarnerorusukkuit attaveqarfigisinnaavat: Meeqqanut Inuusuttunullu Naalakkersuisoqarfik, Naalakkersuisoqarfimmi pisortaq Heidi Lindholm, e-mail: heli@nanoq.gl

Innarluutillit Illersuisuannut tunngatillugu inatsiseqartitsineq pillugu paasissutissat nassaarisinnaavatit nittartakkami uani: www.lovgivning.gl kiisalu Tiliup suliai pillugit uani www.tilioq.gl

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.