TILIUP KOMMUNE KUJALLERMUT ANGALANERMIK NALUNAARUSIAA

“Tilioq aallaannaqaaq Kommune Kujallermut Angalanermik nalunaarut 2019”-ip saqqaata assitaa toorlugu nalunaarusiaq atuaruk. Nalunaarusiami inuit innarluutillit atugaat Naalagaaffiit Peqatigiit inuit innarluutillit pillugit isumaqatigiissutaannut naleqqiullugit sukumiisumik nalilersuiffigineqarput.

Angalanermik nalunaarut arlalinnik innersuussutinik Kommune Kujallermut, Naalakkersuisunut, Inatsisartunut, Namminersorlutik Oqartussanut allanullu sammitinneqartunik imaqarpoq, Kommune Kujallermi aammali Kalaallit Nunaanni sumiluunniit inunnut innarluutilinnut atugassarititaasunik pitsanngorsatissanik siunnersuuteqartoqarluni.

Inuit Innarluutillit illersuisuata Christina Johnsenip Qaqortumi Kommune Kujallermut nalunaarusiamik decemberip 3-anni saqqummiussinissani pilersaarutigigaluarpaa, angalanissamili kinguaattoornerit allannguinerillu kingunerisaanik angalanissaq taamaatiinnartariaqarlugu.

-Ajuusaarutigilluinnarpara Inuit Innarluutillit Illersuisuattut Kommune Kujallermut tikillunga angalanermik nalunaarut tigusisussanut tunniussinnaannginnakku. Tiliup angalanerminik nalunaarutaa una siullerpaajuvoq, suliaavoq annertooq, erinigisimaqaarpullu Kommune Kujallermut tunniunnissaanut kisianni aamma nunatta sinneranut. Tassami paasisitsiniaalluta angalanitsinni ajornartorsiutigineqartartutut takusavut sinerissatsinni allani aamma misigineqartarput, Inuit Innarluutillit Illersuisuat Christina Johnsen oqarpoq.

Inuit innarluutillit illersuisoqarfiat Tilioq Kommune Kujallermut augustip 10-aniit 23-annut paasisitsiniaalluni angalavoq. Inuit innarluutillit illersuisauta Christina Johnsenip Tiliumilu allatseqarfimmi sulisut Narsamut, Alluitsup Paanut, Narsarmijinut, Nanortalimmut, Qaqortumut Savaateqarfinnullu marlunnut tikeraarput. Maannalu angalanermik nalunaarusiaq saqqummerpoq: “Tilioq aallannaqaaq, Kommune Kujallermut angalanermik nalunaarut 2019”.

Inuit Innarluutillit Illersuisuata Christina Johnsenip angalanermik nalunaarut Kommune Kujallermut Skypekkut ataatsimiinnermi saqqummiutissavaa. -Inuit innarluutillit Illersuisuattut, oqariartortartussatut ingerlateqqiisartussatullu pingaartilluinnaqqissaarpara, paasissutissat, takusat, maluginiakkat ilisimasaqarfigilikkagullu oqartussanut pisortanullu oqariartuutigissallugit, Christina Johnsen oqarpoq.

“Tilioq Aallaannaqaaq Kommune Kujallermut angalanermik nalunaarut 2019” kalaallisut qallunaatullu allataavoq 90-inik qupperneqarluni. Nalunaarusiami paasisitsiniaalluni angalanerup siunertai, suliniutit aamma Tiliup innuttaasunik innarluutilinnik, taakku qanigisaannik inunnullu innarluutilinnut sullissisunik allarpassuarnillu oqaloqateqarnermikkut ilisimaligaannik imaqarpoq. Nalunaarut inunnut innarluutilinnut isumaqatigiissummi immikkoortortat qulequtaralugit immikkoortortaqarpoq, inunnillu innarluutilinnik ulluinnarnilu atugaannik allaaserinninnernik imaqarluni.

-Ajuusaarnaqisumik maluginiarparput innuttaasut atugassarititaasut pillugit kisimiittutut kiserliortutullu misigisartut, oqartussanullu aalajangiisartunut ungasissupilussuarmiittutut misigisartut. Angalanitsini innuttaasunik naapitsiuarpugut kommunimut ikioqqullutik tapersersorneqarumallutillu saaffiginninnerminni, kommunip aaqqissugaaneranut paasiuminaasinnaasumut aporfeqartuartunik. Naapippagulli aamma inunnut innarluutilinnut tunngasunik ilisimasaqarlutik sullissisut misigisartut, susassaqarfimminni sipaarniarfiusartumi ilisimasalittut sullissinerminni tatineqartutut misigisartut piginnaatinneqartanngitsutulli misigitinneqartartut. Aammali isumaginnillutik sullissisartut ilinniarsimanngitsut suliffinni attatiinnassallugit ajornartorsiutinik taarseraanneranillu paasisaqarpugut, Christina Johnsen oqarpoq.

Nalunaarummi inerniliisoqarpoq Kommune Kujallermi inunnut innarluutilinnut isumaqatigiissummi immikkoortortanik atuutitsiniarnermigut akimmiffeqartartoq, soorlu tikikkuminassuseq eqqarsaatigalugu, tapersersortinik sulisussanillu amingaateqarnermigut aamma suliffeqartitsiniarnermi peqataatitsiniarnerlu eqqarsaatigalugit.

Tiliup inuit tunniusimallutik sullissisut aamma takuaat, inunnut innarluutilinnut allanngueqataajumallutik anersaaqartut, taamaattorli aaqqissuussaanikkut atugassarititaasut ilungersunartunngortitsisarput. -Ajuusaarnaqisumik misigivarput pisinnaatitaaffinnik inatsinillu atuuttunik ilisimasat annikippallaarujussuarnerat, inuiaqatigiinni atugarissaartuni akuerineqarsinnaanngitsut amerlaqisut naammangittarlutik atorpaat, Christina Johnsen oqarpoq.

Tilioq nalunaarummi katillugit 27-inik innersuussuteqarpoq, taakkunannga 10t Kommune Kujallermut tunngatinneqarput, sinneri Namminersorlutik Oqartussanut, Naalakkersuisunut, Inatsisartunut, Peqqinnissaqarfimmut aamma inuiaqatigiinni susassaqartunut allanut.

-Ingerlatsiviit, oqartussat, naalakkersuisoqarfiit, aqutsisoqarfiit, inunnut innarluutilinnut qanigisaasut, borgmesteriluuniit imaluunniit Inuit innarluutillit illersuisuata kisimiillutik ajornartorsiutit pineqartut aaqqivigisinnaanngilaat. Kalaallit Nunaanni inuit tamarmik peqatigiillutik inunnut innarluutilinnut tunngasut iliuuseqarfigisariaqarpaat. Neriuutigaara innersuussutigineqartut tamanit tiguneqarlutik iliuuseqarfigineqarumaartut, Christina Johnsen oqarpoq.

Inatsisartut Ilaqutariinnermut Peqqissutsimullu Ataatsimiititaliaat sapaatipa akunnerani matumani Sisimiunut paasisitsiniaalluni angalavoq, taakkulu aamma nalunaarummik saqqummiivigineqassapput

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest