Tiliup Kristian Pivat Filateliami ukiuni 30-ni sulinermi nalliuttorsiornerani pilluaqquaa

Foto Mikkel Bianco

Tiliumi Inuit Innarluutillit Illersuisuata Christina Johnsenip Kristian Pivat Post Greenland Filateliami septemberip aallaqqaataani sulinermini ukiuni 30-nik nalliuttorsiornerani pilluaqqujumavaa.

Kristian Pivat sanasutut ilinniagaqarpoq, qamuteralannilli 1987-imi ajutoornermini qitimigut napivoq pisussinnaajunnaarlunilu, tamatuma kingunerisaanik kaassuartakkami issiaveqalerpoq. Tamannali sulisartutut sulinngiffimmilu sammisaqarsinnaaneranik unititsinngilaq.

-Kristian Pivat suleqatikkuminartuuvoq suliassanut tamanut tunniusimasuuvoq, sunngiffimminilu peqatigiiffilerineq nuannaraa peqatigiiffiit assigiinngitsut siulittaasuuffigisarpai, Post Greenland Filateliami Tele postimilu centerimilu aqutsisoq Mikkel Bianco Tiliumut allappoq nangillunilu oqarpoq Kristian Pivat inuk soqutigisarpassuaqartoq uninngaannarsinnaanngittuusorlu, tassami qamuteralaqarpoq umiatsiaqarlunilu aasaappat ukiuuppallu angalajuartuusoq.

– Naak pisussinnaanngikkaluarluni uninngasinnaanngilaq inuttut allatuulli angalajuarpoq ukioq aasaq apeqqutaatinnagit. Taamatuttaaq suliffimminut tunniusimasuuvoq sialuk anori apeqqutaatinnagit aammalu piteraq apussuarlu apeqqutaatinnagit suliffimmut takkuttuarpoq suliuaannarlunilu, Mikkel Bianco oqarpoq Kristian Pivat nersualaarlugu ima nangilluni.

-Kristian angutaavoq nukittooq suleqatitsialak, pisussinnaannginnini aporfiginagu sunut tamanut tunniusimasoq, suleqataarusuttoq ikiuukkumatoorlu, assut nersortaqaara nammineq takusinnaallugu pisussinnaanngikkaluarluni qanoq pisinnaasaqartigisoq, Mikkel Bianco oqarpoq.

Kristian Pivat nalliuttorsiutigalugu suliffimmi septemberip 2-ani kaffillerput, kaagit sodavandillu, suleqatigiillu ataatsimuualaarlutik neriartoqatigiillutik. Post Greenland Filateliami qullersat Tasiilamut oktoberimi tikeriarpata aamma nalliuttorsiornera malunnarteqqinneqassaaq.

-Suliffinga nuannareqaara uannullu orniginartuaannarpoq, Kristian Pivat oqarpoq. Nammineq isumaqarpoq kikkulluunnit suliumassuseqartut suliffissaqartut aamma inuttut innarluuteqaraluarpataluunniit, piumassuseqaraanni soqutiginnikkaannilu.

– Uanga aamma nammineq meeqqakka pilersorukkakkit pitsaanerutikkakku suliffeqarpunga nammineq, Kristian Pivat oqarpoq nassuiaallunilu peqqitsilluni tassa sulisinnaajuaannarnissani ornigalugu.

Tasiilami Post Greenland Filateliami illu inunnut kaassuartakkanik issiavilinnut iserneqarsinnaasunngorlugu naleqqussarneqarsimavoq, isaariamut majorallaqarpoq, matut alloriusaat nalorsangaallutik soorlu aamma perusuersartarfiit inunnut innarluutilinnut naleqqussangaasut.

Inuit Innarluutillit pisinnaatitaaffii pillugit Naalagaffiit Peqatigiit isumaqatigiissutaanni immikkoortoq 27-imi allassimavoq, kikkut tamarmik suliffeqarsinnaatitaasut. Inuit innarluutillit allatulli suliffeqarnissamut pisinnaatitaaffigaat. Suliffisaqartitsiniartarfik inunnut innarluutilinnut tikikuminartuussaaq. Suliffimmi avatangiisit pitsaasuussapput. Kikkut tamat ajunngitsumik naligiimmillu pineqarnissaannik isumaqarpoq.

-Tiliumit Kristian Pivat Post Greenland Filateliami ukiuni 30-ni sulinermi nalliuttorsiornerani pilluaqquarput. Kristian Pivat pillugu oqaluttuami takutinneqarpoq, eqqortumik ikiorneqaraanni suliffeqarfiullu naleqqusarneratigut angusaqarluartoqarsinnaasoq, inuit innarluutillit inuiaqatigiinni allatulli peqataasinnaapput aamma suliffeqarnermi allatulli tunniussassaqarput, inuit innarluutillit illersuisuat Christina Johnsen oqarpoq.

Foto Mikkel Bianco
Foto Mikkel Bianco
Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest