Tiliup ukiumoortumik nalunaarusiaa 2019 saqqummerpoq

Ukioq 2019 ataatsimoorfiup ukiuattut eqqaamassuarput. Innuttaasut amerlasuut suleqatillu amerlasuut naapippagut kiisalu inuit innarluutillit inuiaqatigiinni peqataatinneqarnissaat sammingaatsiarlugu, soorlu ilinniartitaanermi, suliffeqarnermi, attaveqaqatigiinnermi aamma tikikkuminarsaasariaqarneq il.il. eqqarsaatigalugit. 

Ukiumoortumik nalunaarusiap saqqaa toorlugu atuarluariuk. 

Tilioq 2019-imi Kommune Kujallermut aallaannaqaaq inuillu innarluutillit, qanigisaat sullissisullu illoqarfinni, nunaqarfinni savaatilinnilu naapillugit, tamatuma kingorna Kommunimut, Namminersorlutik oqartussanut, Peqqinnissaqarfimmut nunatsinnilu innuttaasunut tamanut inuit innarluutillit atugarisaanik pissutsinillu pitsanngorsaataasinnaasunik innersuussutinik saqqummiussilluni. 

Inuit innarluutillit inuiaqatigiinni peqataatinneqarnissaat

Ukioq 2019-p ingerlanerani inuit innarluutillit inuiaqatigiinni peqataaniarnerminni akimmiffigisartakkatik pillugit namminneq saqqummerfigaat. Soorlu Helga Ajaaja Jakobsen iluatsinngitsumik praktikkerfissarsiortoq saqqummerpoq. Marita Jessen inuiaqatigiinni peqataaniarnermini akuuniarnerminilu aamma ilinniarfimminut iserniarnermini ajornakusooruteqartarnini pillugit saqqummerpoq, tassami kaassuartakkamik issiaveqarluni tikikkuminaassuseq misigisaqarfigisaqaa. Angajoqqaallu meeqqanik innarluutilinnik Kalaallit Nunaanni angalaqateqarniarnerminni akimmiffigisartagaat saqqummiussuunneqarput, soorlu utaqqisarfiit amigaataaneri, inunnut innarluutilinnut perusuersartarfiit amigaataaneri aamma angallassissutit naleqquttut amingaataaneri pillugit saqqummiussaqarlutik.

Inunnut innarluutilinnut inatsit nutaaq

Inunnut innarluutilinnut inatsit nutaap akuersissutigineqarnera malunnartinniarlugu kaffillerpugut. Inatsit pingaaruteqaqaaq taannalu inuit innarluutillit pisinnaatitaaffii pillugit naalagaaffiit peqatigiit isumaqatigiissutaannik aallaaveqarpoq. Ukiorlu aamma taanna nunatsinni inunnut innarluutilinnut tunngatillugu politikkikkut iliuusissatut pilersaarusiortoqarnissaanut sorsuuteqarpugut,

Christina Johnsen

Tilioq nuna tamakkerlugu inuit innarluuutillit peqatigiiffiinik kattuffiinillu siuttuuneq aamma peqataatitsineq pillugu Nuummi isumasioqatigiisitsivoq, inuillu susassaqartut, oqartussat aamma politikkerit peqatigalugit peqataatitsineq pillugu oqallippugut, soorlu ilinniartitaanermi, suliffeqarnermi, attaveqaqatigiinnermi, peqqinnissaqarfimmi allarpassuarnilu tassanilu iliuuserineqarsinnaasunik innersuussusiorluta. 

Ila Tiliumut ukioq pikkunaqaaq ulapaarfiunikuullunilu, inunnit innarluutilinnit paasisaqaqaagut aamma Kalaallit Nunaanni, nunani avannarlerni nunanilu allani attaveqaatinik nutaanik pissarsivugut,

Inuit innarluutillit illersuisuat Christina Johnsen

Tiliup ukiumoortumik nalunaarusiaani aamma pisussat pillugit allaaserinnittoqarpoq, soorlu 2020-mi aamma 2021-mi saqqummersitassat suliniutissallu inuit innarluutillit pisinnaatitaaffiisa atugraisaasalu paasisitsiniaanikkut siuarsarneqarnissaannik siunertallit aamma inuit Tiliumut saaffiginnissutigisartagaannik misissuilluni nalunaarusiaq sammineqarlutik.

Inuit innarluutillit illersuisuat Christina Johnsen tusagassiortunit saaffigineqarsinnaavoq uani: 

+299 563956

cjo@tilioq.gl

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest