Angajoqqaaqatigiit Ivaaqqamiittuutillit: Ulloq unnnuarlu angerlarsimaffiit pitsanngorsaavigineqarnissaanut piumasaqaatit

Angajoqqaaqatigiit tassaasut Ivaaqqami najugaqartunut angajoqqaat aamma qangisaasullu isumaqarput, Ivaaqqami pisoq ilungersunartoq, tassaasoq politikkikkut sivisuumik inuit innarluutillit najugaqatigiiffiinut neqeroorutinut sivisuumik pingaarnersiuinnginnerup kingunipilua, tassami arnaq annertuumik innarluutilik kinguaassiutitigut atornerlunneqarpoq.

Ivaaqqami najugaqartunut angajoqqaaqatigiit apeqqusiipput, najugaqartup atornerlunneqarneranik paasinninnerup kingorna ilumut qitornaasut najugaqartut pitsaasumik misissorluarneqarsimanersut.

-Ilisimaannarparput Ivaaqqami najugaqartunut arnanut naartunermut misissuummik atuillutik misissuisimasut. Paasitinneqanngilavullu itinerusumik allatulluunniit qitornavut misissorluarneqarnersut. Tarnikkut eqqisserusoqaavut qularnaatsumillu paasitinneqarluta ilumut qitornavut kinguaassiutimikkut atornerlunneqarsimannginnerat qulakkeerumallugu, angajoqqaaqatigiit Ivaaqqami najugaqartuutillit oqarput.

Ivaaraq marlunnik immikkoortortaqarfeqarpoq, tassa sungaartoq tungujortorlu. Ivaaqqamili arnap kinguaassiutitigut atornerlunneqartup najugaani immikkoortortaqarfimmiittut kisimik ikiorneqarnissamik neqeroorfigineqarsimapput. Immikkoortortaqarfimmi sungaartumi ineqartunut angajoqqaat angajoqqaatullu akisussaassusillit misissuinernut ilanngunneqarsimanngillat aamma neqeroorfigineqarsimanngillat pisup ilungersunartup kingorna immikkut ittumik pulaartinneqarlutik angalanissaannut. - Angajoqqaaqatigiiusugut apeqquserparput sooq uagut misissuinermut ilanngunneqarsimannginnersugut.

Angajoqqaatut aamma qanigisaasutut maanna piumasaqaateqarpugut, qitornatta qanigisattalu ulloq unnuarlu angerlarsimaffinni najugaqarfiini pissutsinut pitsanngorsaataasussanik:

1. Ivaaraq angerlarsimaffiuvoq angisooq, perorsaasutut ilinniarsimasut Qaqortumi naammanngillat, pitsaanerussaaq Ivaaraq immikkoortortaqarfilersorlugu sineriammut aggulukkaanni.
2. Najukkami avatagiisit sinaakkutillu najugaqartunut pitsaasuusariaqarput. Ivaaraq angerlarsimaffippalaanngilaq, pitsanngorsarneqartariaqarpoq. Soorlu kiassanermut tunngasunik ajornartorsiuteqarpoq.
3. Ulloq unnuarlu angerlarsimaffiit pitsaanerusumik sakkortusisamillu nakkutigineqartariaqarput. Najugaqartut nammineersinnaassusiiagaasimasut angajoqqaartut akisussaasui angerlarsimaffinni pisunut malinnaatinneqartariaqarput, nakkutilliisup aamma pulaarnerani. Nakkutilliisussaatitaasut angajoqqaatut akisussaassusilinnut attaveqartassaaq, tassami najugaqartut namminneq oqarsinnaanatillu isummersinnaanngillat. Angajoqqaatut akisussaassuseqartutut nakkutilliineq apeqquserparput, tassami inunnut annertuumik innarluutilinnut naammattunik ilisimasaqarnersut, soorlu aamma nammineersinnaasusiiagaanerannut kiisalu angajoqqaatut akisusaassuseqartunut tunngasunik aamma.
4. Siunnersortit terapeutillu amerlanerit sineriammi naliliisinnaasariaqarput ikiuutit pisariaqartinneqartut qulakkeerniarlugit, sungiusaanerit aamma ingerlatitsinerit soorlu pillorissaaneq aamma timimik suniusaasut amerlanerit. Siunnersortit tamanut atuuttariaqarput (meeqqanut aamma inersimasunut), innuttaasumut ilungersunartitaanut akimmiffiinullu siunnersuillutik ikiuisinnaasut. Siunnersortit ilinniarsimasunut, inunnut innarluutilinnut qanigisaannullu atuuttariaqarput.
5. Sulisut akisussaaffiinik nalunaarsuinerit, nalunaarsuivimmi sulisut qanoq najugaqartumut akisussaanersut takuneqarsinnaasariaqarpoq. Soorlu iisartakkanut, kina uffaasarnersoq, unnuarsiortut najugaqartunut nakkutilliisut aamma qaqugukkut pisarnersut. Taamatullu nalunaarsuivinnut atortunik pisiortortoqartariaqarpoq.
6. Ulloq unnuarlu angerlarsimaffinni sulisut amerlassusisssaanut akuerisat amerlanerusariaqarput. Maanna Ivaaqqami sulisukippalalarpoq ulluinnarni suliassat naammasiniassallugit. Taamaalillutik sulisut tunngaviusumik pisariaqartinneqartunuinnaq naammassinnissinnaasarput, soorlu nerisitsinerit, nanginik taarsersuinerit aamma sinitsitsinerit. Angalanernut, sammisaqarnernut sungiusarernullu allarpassuarnullu piffissaqartoqanngilaq.
7. Arnanut najugaqartunut angutit unnuarsiortinneqassanngillat.

Angajoqqaat allat, qanigisaasut innuttaasullu piumasaqaatitsinnut tapersersuinissannut kaammattorpagut.