Avannaamiut inuusuttut Sisimiuni naapilerput
Norgemiut, Qallunaat aamma kalaallit suleqatigiillutik avannaamioqatigiit inuusuttut naapinnissaannut pilersaarusiaat maanna piareerpoq, Sisimiunilu novemberip 11-aniit 14-at ilanngullugu politikkikkimik aamma peqatigiinnissamik, nutaanik isumassarsiornikkut ingerlatassarsiornissamut aamma inunnut innarluutilinnut pisinnaatitaaffiit sammineqassallutik naapittussanngorput.
Sammenslutningen af unge med handicap (SUMH Danmarkimiit), Unge Funksjonshemmede Norgemiit aamma Tilioq inuusuttut 21-t naapinnissaannut pilersaarusiortuupput, saqqummiisussallu qilanaarineqarsinnaapput. Inuit innarluutillit pillugit isumaqatigiissut sammineqassaaq, attaveqatigiiffimimk pilersitsiniartoqassalluni, aaqqissuussinermik aamma peqatigiiffilerinermik sulineq, inuusuttuuneq innarluuteqarluni aamma sammineqassapput. Inuusuttut innarluutillit periarfissinneqassapput misigisartakkaminnik misilittakkaminnillu avitseqatigiissallutik, soorlu aamma tapersersorteqarnermut ikiuutinullu tunngasunik kiisalu atoqatigiittarnermut apeqqutinik eqqartuisinnaallutik. Workshoppertinneqarnikkullu pisinnaatitaaffinnik aamma aaqqissuussilluni suliaqartarnermik ilinniassapput, immaqa nutaanik isumassarsiorluni ingerlatsinikkut imaluunniit politikkikkut suliniuteqarnikkut tunngasumik workshoppertinneqarnermi, tassuuna akunnerminni misilittakkaminnik paarlaasseqatigiissinnaapput nutaanillu suliniuteqalerlutik, nunat avannaamiut aamma akimorlugit suleqatigiissinnaallutik. Aaqqissuisuniit neriuutigineqarpoq inuusuttut naapisinneqarnerata kingunerisaanik Kalaallit Nunaanni inuusuttunut innarluutilinnut peqatigiiffiliortoqassasoq, aamma nunat avannaamiut attaveqaataat inuusuttunik innarluutilinnik peqataaffigineqartoq pilersinneqassasoq.
Inuusuttut naapinnissaannut pilersaarut
Norgemiu Ingrid Thunem Danmarkimiit Kalaallit Nunaanniillu inuusuttunik naapitsinissaminut qilanaarpoq.
– Sisimiunukarnissara assorsuaq qilanaaraara, tassami tikissimanngisaannarpara, inuusuttullu naapinnissaat isumassarsiffigilluassallugu isumalluarpunga. Torrassuuvoq inuusuttut naapinnissat, ilikkarnissaat aamma immitsinnut sunnersinnaanissamut periarfissatsialaavoq, inuusuttut naapinnissaannut qilanaaqaanga, Ingrid oqarpoq. Norgemiuugami issi aamma arsarnerit sungiusimavai,
-Kisianni nunat killii akimorlugit suleqatigiissinnaaneq nutaajuvoq uannullu soqutiginarluni, Ingrid oqarpoq. Ingridip inuusuttoqatiminik pisinnaatitaaffiit pillugit , atoqatigiittarneq aamma inuusuttutullu piginnaanikillisimasutut inuuneq pillugu oqaloqateqarluarnissani, soorlu aamma kulturit nunallu assigiinngitsut akornanni misilittakkanik paasisaqarnissaq erinigaai.
Inuusuttut naapinnerat oqariartuuteqarnerannik kinguneqarniartussaavoq, tamannalu Hotel Søma-mi novemberip 14-ani pissaaq. Aaqqissuisuniit Qeqqata Kommuniani borgmesteri, innarluuteqarnermut suliassaqarfimmi susassaqartut minnerunngitsumillu Meeqqanut, inuusuttunut ilaqutariinullu naalakkersuisoq qaaqquneqarput. Hotel Sømamut takkunnikkut aammali nittartakkakkut attaveqarfitsigut peqataasoqarsinnaassalluni. Inuusuttut naapinnerminni workshoppini angusatik, tassa inuusuttut inuiaqatigiinni peqataatinneqarnissaannut qanoq iliuuseqartoqarnissaanik oqariartuuteqassapput.
Tiliumiit inuusuttut naapinnerat iluatsillugu sunniiniartoqassaaq nunatsinni inuusuttut innarluutillit attaveqarfiliornissaat anguniarlugu. Politikkikkut oqallinnerni inuusuttut isummersortarnissaat pisariaqarmat. Inuusuttut 21-t pisinnaatitaaffiit aamma aaqqissuisarneq pillugu sungiusarnermikkut ulluinnarni akimmiffigisartakkaminnut iliuuseqarnissamut kajumissaarneqassapput, aamma peqataatinneqartarnissamut ileqqoqartoqalernissaanut suliniaqataatillugit, soorlu aamma politikkikkut oqallinnerni oqalliseqataasalernissaat anguniarneqassalluni. Taamaasillutik najukkaminni, nunatsinni aamma nunani avannarlerni allannguinissamut suleqataanissaminnut piginnaasaqalerlutik-
Inuusuttut naapinissaat Arctic Indigenous Fundimit, Nordisk Kulturkontaktimit, Nordic Youth Pool-imit, NAPAmit aamma Nordisk Velfærdscenterimit aningaasaliiffigineqarpoq.