Avannaata Kommuniata Qaanaami inunnut innarluutilinnut najugaqatigiiffinnik neqerooruteqarnissaq qulakkeertariaqarpaa
25.09.2020
Qaaqqutsiannguaq Nielsen 23-inik ukiulik ineriartornermigut kinguarsimasuuvoq, Angajoqqaamini najugaqarpoq, namminerisaminik ineqalernissamik kissaateqarpoq, kisianni Qaanaami inunnut innarluutilinnut najugaqatigiiffiit neqeroorutaanngillat.
Qaanaami innuttaasut arlaqartut angerlarsimaffeqanngillat ineqarfiugallartuniluunniit najugaqarput. Kommunimiit inuit innarluutillit tapersersorneqarnissaannut inatsit naapertorlugu najugaqarfissaanik neqerooruteqarsinnaavoq.
Qaaqqutsiannguaq Nielsen 23-nik ukioqarpoq ineriartornermigut innarluuteqarpoq angajoqqaaminilu najugaqarluni, illuat 64 kvadratmeterisut angissuseqarpoq marlunnik sinittarfeqarluni. Inoqutigiit tallimaapput. Qaaqqutsiannguaq angajoqqaami sinittarfianni siniffeqarpoq. Namminerisaminik ineqalernissani imaluunniit inuit innarluutillit allat peqatigalugit najugaqarfimmiilernissaminut kissaateqarpoq. Qaanaamili illersukkanik najugaqatigiiffiit imaluunnit najugaqatigiiffiit neqeroorutaanngillat.
Qaanaami innuttaasut tallimararterutaat Avannaata Kommuniata 2019-imi naatsorsuinera malillugu inissiamut utaqqisunut allattuivimmiipput. Kommuninik nakkutilliinermi nalunaarusiami takutinneqarpoq Qaanaami kommunip illut attartortittagai tallimaagaangata marluk ukiut qulit ataallugit attartorneqarsinnaasutut pitsaassuseqartut, illullu attartortittakkat tallimaagaangata ataaseq ukiut tallimat ataallugit attartorneqarsinnaasutut nalilerneqarput.
Inissiat amigaataanerat ineqarnermilu pissutsit ajortut kinguneqarput inuppassuit inissakilliorlutik najugaqatigiikkajuttarnerat.
Innuttaasut amerlasuut Qaanaami ineqarniarnermi pissutsit pillugit Tiliumut saaffiginnipput. Innuttaasut arlallit angerlarsimaffeqanngillat ineqarfiugallartuniluunniit najugaqarlutik. Inigisamut akiliisinnaapput illumulluunniit aallaqqaatissatut akiliutissat akilersinnaallugit, inissiamilli attartortakkamik tunineqarneq ajorput, illoqarfimmilu ineriartortoqanngilaq, taamaammat pisiassaqanngilaq. Innuttaasut allat isumaginninnermi inissianik qinnuteqarnikuupput, Kommunilli naak angerlarsimaffeqanngikkaluartut aamma ikinngutiminni ilaquttaminnilu najugaqarallaraluartut qinnuteqaataat itigartittarpai. Kommuni INI-p inissiat attartortittagaasa 20%-inik isumaginninnermi innarluutilinnullu inissianut innersuussinissamik periarfissaqarpoq, INI-li naapertorlugu kommunip inissiat taakku tamakkiisumik qaqutigut atortarpai.
-Inunnguutsinnik innarluuteqarpunga. Isumaginninnermi inissiamik 2012-miilli inissarsiulerpunga. Paasivara INI A/Simiit kommunip aalajangertaraa kikkut inissiamik tunissanerlugit. Kommunimi sullissisut iluamik suliarinnittariaqarput inuttaasunullu innarluutilinnut kinaassusersioratik, Qaanaami innuttaasoq.
Inissiat amigaataanerat ineqarnermilu pissutsit ajortut kinguneqartarput inuppassuit inissakilliorlutik najugaqatigiikkajuttarnerat. Arlallit inissiani attartortakkani oqulinni najugaqarput, inersimasullu arlallit inimi ataatsimi sinittarlutik. Inissianik neqerooruteqannginneq kinguneqarpoq innuttaasut innarluutillit ilaquttaminnik qangisaminnillu isumalluuteqartorujussuusarnerat, akerleriittoqalerpallu ajornerpaaffianiluunniit atornerluisoqarpat taamatut isumalluuteqarneq qimassinnaanngilaat.
Inuit innarluutillit tapersersorneqarnissaannut inatsit naapertorlugu kommune inuit marluk arlallilluunniit ineqatigiissinnaappata taamatullu neqeroorfigineqarsinnaappata ataatsimut ineqarfimmik ineqarfimmilluunniit pilersitsissaaq.
Tilioq avanimi inassuteqaaigineqarpoq, Avannaata Kommuniata Qaanaami inunnut innarluutilinnut pisariaqartitaannut naleqqussakkanik illersukkanik inissiaqarnissaq qulakkiissavaa.