Borgmester Ane Hansenip AG nr. 5-imi 2021-mi saqqummersumi isummersuutaa

08.02.2021

Tilioq AG suleqatigalugu matumuuna Ane Hansenip isummersuutaa saqqummiuppaa, taanna pingasunngornermi februaarip 3-ani aviisimi saqqummersumi atuarneqarsinnaavoq. Tarnikkut nappaatillit sullinneqarnerat pillugu suleqatigiinneq annertunerusoq ujartorpaa. Tiliumiit isummersuutigineqartoq ilisarisinnaavarput. Tarnikkut nappaateqarneq aamma innarluuteqarneq pillugit ilisimasanik saqqummersitatsinni annerusumik atuartoqarsinnaavoq.

Tarnimikkut nappaatillit sullinneqartarnerat pillugu suleqatigiinneq annerusoq ujartorpara

Kommune Qeqertalimmi innuttaasut toqqissisimasumik inuuneqarnissaat kommunalbestyelsemi pingaartipparput. Illoqarfinni nunaqarfinnilu peqqinnissaqarfiit immikkoortortaqarfeqarput, kommunenilu uagut inunnik isumaginninneq akisussaaffigalutigu. Taakkulu akisussaaffeqarfiit aamma innuttaasut toqqissisimasuunissaat pillugu akisussaaffeqarput.

Ilisimaneqarpoq tarnimikkut nappaatillit nunatsinni 1.400 missaaniittut, taakkulu kommuneni tallimani innuttarigatsigit sullitarisarpagut. 2019-mi Naalakkersuisunut apeqquteqaammmeeqqat inuusuttullu tarnimikkut napparsimasut immikkoortortaqarfianni sullinneqartut 145-imapput. Kisitsillu nalunngisavut aallaavingalugit annertusisamik tarnimikkut napparsimasut iliuuseqarnissarput avaqqussinnaanngilarput.

Kommune Qeqertalimmi innuttaasut tamarmik inooqataasinnaanerat pillugu suliuteqarpugut, suliniarnitsinnilu peqqinnissaqarfiup suleqatiginerunissaa kissaatigaarput. Tarnimikkut napparsimasut sullinneqarneri inatsisit naapertorlugit ingerlatissagutsigit peqqinnissaqarfimmi inuit pineqartut misissorneqartussaapput, taakkulu mississuimanerat tunngavingalugu kommunemit iliuuserisassat sullitaq peqatigalugu suliarineqartussaallutik. Kommunemilu isumaqarpugut tarnimikkut napparsimasup nappaataata suussusersinissaanut misissortinniartarneq piffissami sivisuallaami pisartoq. Ingammik nunaqarfinni illoqarfinnilu mikinerusuni sivisuallaamik utaqqisinneqartarput.

Tamanna tunngavingalugu kommunet aamma Naalakkersuisut akornanni saqqummiussara pillugu suleqatigiinnerunissaq ujartorpara. Tamatta innuttaasut sullippagut, eqaatsumillu toqqissisimanartumillu sullissinissaq pillugu suleqatigiinnissarput pisariaqarpoq.
Ane Hansen,
Inuit Ataqatigiit,
Kommune Qeqertalimmi borgmesteri.