Christina Johnsen Inuit Innarluutillit Illersuisuattut toqqangaaqqippoq

Naalakkersuisut ilimatitsipput Christina Johnsen Inuit Innarluutillit Illersuisuattut toqqangaaqqittoq. 

Nuannaaqaanga tulluusimaaqalungalu Tiliumi suleqqinnissaannut periarfissinneqarama. Ukiut siulliit pingasut sukkaannaq ingerlapput, aamma maluginiarpara Tilioq inuit innarluutillit atugaat pillugit ersarissumik oqariartuuteqarluni sunniuteqartarsimasoq. Uannut pingaaruteqarujussuuvoq, innutaasut innarluuteqartut pisinnaatitaaffiisa siuarsarneqarnissaat anguniarlugit suliniutitsinnik naammassinninnissannut maanna periarfissaqalerama, Christina Johnsen Inuit Innarluutillit Illersuisuattut toqqangaaqqinnermini nuannaaqaluni oqarpoq. 

Inuit Innarluutillit Illersuisuat 2017-imi novemberimiit maannamut ukiut pingajussaat sulivoq, Inuit Innarluutillit Illlersuisuat pillugu inatsit naapertorlugu ukiut pingasut iluanni atorfeqarsinnaavoq. Taamaattumik Christinap ataasiaqqilluni toqqangaaqqinnermini sulini ingerlateqqissinnaalerpaa. 

Christina Johnsenip Inuit Innarluutillit Illersuisuattut siullertut Tiliup allatseqarfianik pilersitsivoq, tassanilu inuit innarluutillit pisinnaatitaaffiinut isumaqatigiissut inatsisillu atuuttut naapertorlugit siunnersuineq aallartillugu. Tilioq aamma Kommune Kujallermut Qaanaamullu inuit innarluutillit atugaannik pisinnaatitaaffiinut naleqqiullugit nalilersussallugit angalasarsimavoq. 

 Christina inatsisilerituutut ilinniagaqarnini aallaavigalugu inuit innarluutillit inatsisitigut illersorneqarnerat isiginiarsimavaa, Tiliumiit aamma innuttaasut saaffiginnissutigisartagaannik nalilersuineq “Namminerisamik Inuuneqarneq” qanittukkunni saqqummersinneqarpoq, tassanilu Kalaallit Nunaanni oqartussanut assigiinngitsunut, Naalakkersuisunut, Inatsisartunut Kommuninullu innersuussuteqarluni. 

-Maanna inuit 500t siunnersorneqarnissartik siunertaralugu uagutsinnut saaffiginnissuteqarsimalerput, tamatumalu takutippaa suliagut kiisalu saaffissaanerput pisariaqarluinnartut, Christina Johnsen oqarpoq. Taanna aamma inuit innarluutillit peqatigiiffiinut kattuffiinullu pitsaasumik attaveqaateqalersimavoq. 

 -Kalaallit Nunaanni inuit innarluutillit peqatigiiffiinut kattuffiinullu pitsaasumik attaveqarlualerpunga, soorlu aamma peqatigiiffinnut isumasioqtigiisitsinikkut peqatigiiffinni kajumissutsimik sulinermi aqutsisunut nukittorsaajumalluta pikkorissaasarsimalluta. Peqatigiiffiit tassaapput najukkaminni ilaasortaminnut innarluuteqartunut ilisimasaqarluartut attuumassuteqarluartuusullu. Suleqatigiilluaannarnissatsinnut neriuuteqarpunga. Sulinitta ingerlaqqinnerani suliniuteqarpugut nunatsinnit kiisalu nunanit avannarlernit peqataaffigineqartussanik, soorlu meeqqat inuusuttuaqqallu eqqarsaatigalugit aamma suliffeqarnermut tunngasumik, Christina Johnsen oqarpoq. Tiliumiit Qaanaamut angalanermik nalunaarusiaq maanna ulapputigineqaleruttorpoq, soorlu aamma inunnut innarluutilinnut isiginnittariaatsimik nalilersuineq suliarineqarluni, taakku nalunaarusiaq 2020-mi ukiakkut saqqummersinneqassamaarput. 

Annerusumik paasisaqarumangaanni attavissaq Inuit Innarluutillit Illersuisuat Christina Johnsen på cjo@tilioq.gl //