Inatsisartunut 2021-mi qinersinermut atatillugu inassuteqaatit

Tiliup siumut isiginissaq aaqqiiniartuunissarlu kissaatigai, taamaalilluni inuit innarluutillit, taakku qanigisaasaq inuillu innarluutilinnik suliaqartut atugaat pitsanngortinneqarniassammata. Taamaammat inassuteqaatit uku qineqqusaarnermi oqaluuserinissaannik politikerit, qinigassanngortittut partiillu kaammattorpagut.

Innuttaasut: Inassuteqaatit taakku politikerit qanoq piviusunngortinnissaat qulakkeerniarneraat aperisigit.

Politikkerillu: Inuit innarluutillit atugaat allanngortikkusukkussigit, inassuteqaatit taakku oqallisigisigit, inassuteqaatillu taakku piviusunngortinniarlugit inuit innarluutillit, taakku qanigisaat inuiaqatigiillu tamaasa neriorsorsigit.

Assigiinngisitsisarnermut inerteqquteqarneq
Inuit innarluuteqartut sulisitsisunit, innuuttasunit inuiaqatigiinnillu assigiinngisinneqartarneq misigisarpaat. Aalajangiisartut assigiinngisitsisarnermut inerteqquteqarnermik atuutilersitsinikkut inuit innarluuteqarnerat tunngavigalugu ajortumik immikkut pineqartarnerat assigiinngisinneqartarnerallu annikillisinniarlugu siuttuusariaqarput,

Inuiaqatigiit ilisimasaqarnerat
Inuit innarluutillit pillugit inuiaqatigiinni pigiliutiinnakkanik isumarparssuaqarpoq. Pigiliutiinnakkanik isumallit inuit ajortuunngillat ajoratilluunniit, innarluuteqarnerli pillugu naammattumik ilisimasaqalernikuunatik. Innarluuteqarneq qanoq ittuunersoq ilisimasaqarneq annertusarneqartariarpoq. Pingaartumik erserpianngitsumik ersinngisumilluunniit innarluuteqarnermut tunngatillugu. Taamaammat naalakkersuisoqarfiit aqutsisoqarfiillu inuit innarluutillit pillugit inuiaqatigiinni assigiinngitsunut paasissutissiisariaqarput, assersuutigalugu meeqqat atuarfinni meeqqanut, suliffeqarfinnut innuttaasullu ataatsimut isigalugit.

Paasissutissat naatsorsueqqissaarinerillu
Inuit innarluutillit inuunermi atugassarisaat pillugit paasissutissaqarpianngilaq naatsorsueqqissaarisoqarpiaraniluunnit, inuit innarluutillit nunatsinni najugaqartut taperserneqarnissaannut, ilinniagaqarnissaannut, suliffeqarnissaannut peqqissusaannullu tunngatillugu. Inuit innarluutillit inuunermi atugassarisaat, suliniutissat aallartinneqartariaqartut suliniutillu assigiinngitsut suut aallartinneqareernersut nalilesorsinnaajumallugit paasissutissanik pisariaqartitsisoqartorujussuuvoq.

Tarnikkut katsorsaasarneq
Meeqqat inuusutullu tarnikkut katsorsaavimmut atassuteqartut amerliartorput. Naalakkersuit Peqqinnissaqarfik kommunillu suleqatigalugit innuttaasut tarnikkut ajuutillit pillugit ataatsimut isiginnilluni siusissukkut iliuuseqartarnissaq inunnut tarnikkut katsorsaavimmiittut tapersersortariaqarpaat aamma inuttut atukkatigut tarnikkut katsorsaarnernik katsorsaanissamillu neqeroorutit annertusinneqarnissaat qulakkeertariaqarpaat.

Ilinniartitaaneq
Inuit innarluutillit innuttaasut sinnerinut sanilliullugit ilinniagakinnerupput. Tamanna aaqqissuussaanermi inuiaqatigiinnilu ajornartorsiutaavoq. Naalaakkersuisut pisortat ilinniagaqarnissamik neqeroorutaat tamarmik inunnut innarluutilinnut pilerinartuunissaat peqaatitsisuunissallu, inuit innarluutillit ilinniagaqarnermi tapersersorneqarnissaat atortorissaaruteqarnissaallu tamakkulu pillugit ilitsersorneqarnissaat qulakkeertariaqarpaat.

Suliffeqarneq
Inuit innarluutillit innutaasut sinnerinut sanilliullugit suliffeqannginnerusarput. Nuna tamakkerlugu periusissiortoqartariaqarpoq inuillu innarluutillit peqataatillugit inissaqartitsisumik suliffissaqarnissaq immikkut isiginiarneqartariaqarluni. Kiisalu kommunit suliffeqarfiillu inunnik innarluutilinnik atorfinitsitsinissamut eqqortunik sakkussaqarnissaat qulakkeerneqartariaqarluni.

Tusilartut ussersorlunilu nalunaarutinik nutserisarneq
Ussersorluni oqaatsinik atuisut nutserunneqartarnissaat killeqartorujussuuvoq, tamassumanilu inuiaqatigiit sinnerinit immikkoortinneqartarput. Inuunermi pisuni tamani nutserunneqarnissap qulakkeerneqarnissaanut kikkullu nutserinissamik akisussaanersut ersarissunik najoqqutassaqarnissaq atorfissaqartinneqarput. Nutserinermi ussersorluni oqaasillit inuiaqatigiinni allat naligalugit peqataanissaat qulakkeerneqassaaq. Assersuutigalugu qineqqusaarnerni qinersisartunillu ataatsimiititsinerni ussersorluni nutserinikkut ussersorluni oqaasillit tamat oqartussaaqataaneranni peqataasinnaanissaat qulakkeerlugu. Ajutoorfiusinnaasuni ajornatoornernilu tamani ussersorluni nalunaarutinik nutserussisarnissap qulakkeerneqarnissa immikkut pingaartuuvoq assersuutigalugu COVID-19-ip nunarsuarmi tuniluunnera pillugu paasissutissat pillugit.

Inuit innarluutillit taperserneqartarnissaat pillugu inatsisip atuutilersinneqarnera
Inuit innarluutillit pillugit inatsit nutaaq januaarip aallaqqaataani 2020 atuutilersinneqarpoq. Inatsimmi peqqussummut nutaanngitsumut sanilliullugu innuttaasut ikiorneqarnissamik taperserneqarnissamillu annertunerusunik pisinnaatitaaffeqartinneqalerput. Inatsit nutaat ajoraluartumik tamakkiisumik atuutilersinneqarnikuunngilaq.

Inuit innarluutillit pingaartumillu meeqqat innarluutillit inatsimmi pisinnaatitaaffigisaannik tamanik isiginnilluni ataqatigiisssaarillunilu suliniuteqarnissap qulakkeerneqarnissaa pisariaqartinneqartorujussuuvoq. Suliaqarfiit soorlu Peqqinnissaqarfik, Majoriaq, ilinniarfiit il.il. pisinnaatitaaffik qulakkeerniarlugu ilinniartinneqassapput, peqataatinneqassapput ilanngunneqarlutillu.

Kommunini sulisut inunnillu innarluutilinnik suliaqartut allat ‘Inuit innarluutillit taperserneqarnissaat pillugu inatsit’ aamma inuit innarluutillit pillugit isumaqatigiissut pillugit ingerlaavartumik piginnaanngorsarneqartarnissaanik pisaqartitsisoqartorujussuuvoq. Tamanna internetikkut videokkullu imaluunnit kommunini inuit immikkut ilinniarsimasut atorlugit pisinnaavoq.